Lukas 3 - Intas-Etipup Mat u Iesu Kristo 1863 (Aneityum Gospels)

¹ An naopan iyehki is wat atimarid a Taibiryus Sisar an mesese is fiftiin; is lep atimi alupas an pece Jutaia a Ponjus Pailet, um atimi alupas an pece Calili a Herot, um atimi alupas an pece Ituria im inpece Trakonaitis a Filip etoai Herot, um atimi alupas an pece Abilini a Laisenyas,

² um atimi esjilid an nahlap a Anas im Keafas, is yetpan intas o Atua ehele Joanes inhal o Sakaraias an namasacen.

³ Is apan aien irai iji uari pece asega u Jortan, um asuptecnaig nabaptiso mika eri adumoij anliinmopura atimi va uhpu iknipagki nedo has ura;

⁴ et idivaig eris upyi aged an nitasvitai o Aiseya naprofeta, um ika, “Nohran tah et ethi etpu ahlaig aien an namasacen, um ika, Akumu ahped nefalaig vai Ihova aijaua, um ago yi atoh efalaig vai yin:

⁵ etpu esjeuc asega niji iskanse asega, uhpu ahtahumiaig nau asega im nedoon asega; etpu atoh niji efalaig acalacal, etpu marara niji efalaig riduotriduot;

⁶ erupu ecetai nitai imyiatamaig ra o Atua natimi asega.”

⁷ Is ika aien ehele natimi is ahinag eris ahtag pan ehelen ara, mika eri leh nabaptiso ira ra, Ak ilpu imyiv, et mun ated caua a di, mika aki aha aijaua vai intavaitap etpu yetpam?

⁸ akumu ohoai itai aijaua yi idivaig nadumoij u inliinmopomia: akumu jim aktaktai anliinmopomia aijaua, um ika, Et etpoija a Ebraham; ek asaig ehelemia ainyak mika, Et emda a Atua par imyiatidai ilpu halav imi Ebraham irai hat iji eigki:

⁹ eh mun ati inpas u nohu auicai an naopan ineig: uhpu acaldei nauicai asega et eti upene nasau iran, um erekhaigjai an cop.

¹⁰ Eris ahodaig yin natimi, um ika, Ecri ago inhe aijama?

¹¹ Is tas aien, um ika ehele ra, Aien et o un napelumai et ero, etmu alupai natimi ineig aien et ti napelumai o un; etum lep ucce aien et eteuc nitai caig o un.

¹² Eris ahtag pan ehelen a ilpu atimi akwanaham, mika eri leh nabaptiso ira ra, um ika ehelen, Ak natimi esege, ecri ago inhe aijama?

¹³ Is ika ehele ra aien, Akumu leh nitai ineig ache aijaua eris asaig ehelemia.

¹⁴ Eris lep ahodaig yin a ilpu eucsupo, um ika, Ecri lep ago inhe aijama? Is ika ehele ra aien, Akumu jim ago nedo ipjin va atimi aijaua, um jim athai intas ahcil vaig tah; um jim auatiemda va nimtan imi caua.

¹⁵ An naopan iyehki, eris wat aitgaig Kristo natimi, eris wat aktaktai Joanes ara asega anliinmopura, um ika, Kit Kristo mun eigki, ka o’o?

¹⁶ is tas a Joanes, um ika ehele ra asega, Ek idim baptiso iramia ainyak an wai; ja etpu yetpam tah inyi ethi, inyi esjilid irak aien, ek eti upene ainyak par ahiyi nehtit an cedpun eduon: etpu baptiso iramia aien an Nesgan Upene im lep incop:

¹⁷ et apos nitai ucjucjai itai o un aien, etpu ago adicinadicin inuarin auud hwiit iran o un aien, etpu ikni hwiit o un aien anliin neom ikni hwiit iran; ja etpu atnamud narasin aien an cop inyi ti lep opos.

¹⁸ Is lep asuptecnaig niji itai is ahinag is eche ehele atimi aien, um ated ra.

¹⁹ IS wat acaiji Herot aien natimi alupas, vai Herotyas ehgai Filip etoan, im lep vai nedo has asega is ago a Herot,

²⁰ is lep ehcilpon nedo iji ehki asega aien, um ati Joanes anliin neom ipjin.

²¹ ERIS wat leh nabaptiso ira ra atimi asega, is lep leh nabaptiso iran a Iesu; is wat alaigaheni aien, is asalgei nohatag;

²² is asuol iran a Nesgan Upene, is idivaig nalaupa nalmun nohun; is ahes an nohatag nohran tah, um ika, Nai Halav cop unyak aiek; ek imyiacitak euc ainyak.

²³ Is idivaig dirte mesese irai Iesu an naopan iyehki, eris ika ache is hal o Josef aien, is hal o Hilai a Josef,

²⁴ is hal o Matdat a Hilai, is hal o Livai a Matdat, is hal o Melkai a Livai, is hal o Janna a Melkai, is hal o Josef a Janna,

²⁵ is hal o Matadaias a Josef, is hal o Emos a Matadaias, is hal o Neum a Emos, is hal o Eslai a Neum, is hal o Naci a Eslai,

²⁶ is hal o Mead a Naci, is hal o Matadaias a Mead, is hal o Semeai a Matadaias, is hal o Josef a Semeai, is hal o Juta a Josef,

²⁷ is hal o Joana a Juta, is hal o Risa a Joana, is hal o Serubabel a Risa, is hal o Sialtiel a Serubabel, is hal o Nirai a Sialtiel,

²⁸ is hal o Melkai a Nirai, is hal o Attai a Melkai, is hal o Kosam a Attai, is hal o Elmotam a Kosam, is hal o Er a Elmotam,

²⁹ is hal o Josi a Er, is hal o Eleiser a Josi, is hal o Jorim a Eleiser, is hal o Matdat a Jorim, is hal o Livai a Matdat,

³⁰ is hal o Simeon a Livai, is hal o Juta a Simeon, is hal o Josef a Juta, is hal o Jonan a Josef, is hal o Elaiakim a Jonan,

³¹ is hal o Melia a Elaiakim, is hal o Minan a Melia, is hal o Mattada a Minan, is hal o Nedan a Mattada, is hal o Tevit a Nedan,

³² is hal o Jesse a Tevit, is hal o Obet a Jesse, is hal o Boos a Obet, is hal o Salmon a Boos, is hal o Neson a Salmon,

³³ is hal o Aminatab a Neson, is hal o Eram a Aminatab, is hal o Esrom a Eram, is hal o Feres a Esrom, is hal o Juta a Feres,

³⁴ is hal o Jekob a Juta, is hal o Aisak a Jekob, is hal o Ebraham a Aisak, is hal o Tira a Ebraham, is hal o Nehor a Tira,

³⁵ is hal o Siruc a Nehor, is hal o Riu a Siruc, is hal o Pilec a Riu, is hal o Iber a Pilec, is hal o Sela a Iber,

³⁶ is hal o Kenan a Sela, is hal o Arfaksat a Kenan, is hal o Sem a Arfaksat, is hal o Noa a Sem, is hal o Lemek a Noa,

³⁷ is hal o Medusela a Lemek, is hal o Inok a Medusela, is hal o Jeret a Inok, is hal o Mahalaliil a Jeret, is hal o Kenan a Mahalaliil,

³⁸ is hal o Inos a Kenan, is hal o Sed a Inos, is hal o Atam a Sed, is hal o Atua a Atam.