Lukas 24 - Intas-Etipup Mat u Iesu Kristo 1863 (Aneityum Gospels)

¹ IS wat lahlah an nuhihialeg an nadiat uhup irai wiik, eris apan ara u unmun nij, um apos nitai auanipin upene eris ago ara, eris lep ahced ra nahaiji atimi.

² Eris ecetai inhat ara eris mun atcelcaigpagki u unmun nij.

³ Eris apan iran ara, jam eti ecetai nohui Iesu Natimarid.

⁴ Is wat ehioehio inliinmopura ara va nitai iji eigki, erus aiji ubutpotet ehele ra natimi is ero is ememina napelumai ira rau:

⁵ eris imtitaig ara um atpuse an nobohtan; erus ika ehele ra arau, Eka auri aijaua par ahilek yin ehele ilpu atimi emesmas et mun nusjai aien?

⁶ et ti aien igcaki, et mun nusjai aien: akumu imyiehva aijaua intas o un ehelemia an naopan iyehki an namen o un Calili,

⁷ um ika, Uhpu idim ati Inhal o natimi ehele atimi auatatimi, mika eri atgei yin an nauincai atgeig, ja et wit ti pan itac nadiat inyi eseij, etpu lep nusjai aien.

⁸ Eris imyiehva intas o un ara,

⁹ um ahes u unmun nij, um atga ura, um asuptecnaig nitai iji eigki asega ehele atimi is eleven, im lep ehele ra asega is eche.

¹⁰ Is asuptecnaig nitai iji eigki ehele ilpu apostolo a Mere nupu Mactala, im Joana, im Mere risi Jakobus, im lep nahaiji ilpu takata eris ahced ra ara.

¹¹ Ja is idivaig intas ahcil intas ura ehele ra, eris eti eteuc iran ara.

¹² Is atidai a Pitrus um athut pan u unmun nij; is atpuse aien um ecetai napelumai yilyil, eris echim ati, um atga o un, um imyiali nitai ineigki eris ago.

¹³ An nadiat iyehki erus apan natimi is ero ira ra an nuarin-pece is ethi, nidan Emeus, is apohod vaig Jerusalem is tup idivaig is eet mail.

¹⁴ Erus tas jipe arau va nitai iji eigki asega is yetpam.

¹⁵ Erus wat tas jipe arau um aktaktai nitai iji eigki, is uhum pan rau a Iesu, um ahced rau.

¹⁶ Is arupoig nesganimtarau arau, erus eti ato yin arau.

¹⁷ Is ika ehele rau aien, Inhe ineigki erau atga asaig aijaurau? et atpuh nesganimtamirau aijaurau vanhe?

¹⁸ Is tas natimi is ethi ira rau, nidan Kliopas, um ika ehelen, Na upu taka uarin aiek, jam amen Jerusalem, um eti ato nitai iji eigki et mun yetpam eahki an naopan ineig, ka o’o?

¹⁹ Is ika aien ehele rau, Nevitai? Erus ika ehelen arau, Nitai iji eigki vai Iesu nup an Nasared, is aprofeta aien, is esjilid nedo o un im intas o un an nuhup o Atua im lep atimi asega:

²⁰ eris ati yin a ilpu atimi ahlap esjilid im ilpu atimi alupas uja mika eri asaig inmas o un, eris um atgei yin ara an nauincai atgeig.

²¹ Ecris ika aijama is atimi iyehki aien eris ika etpu imyiatamaig nupu Isreel aien: im lep ineig, eris ago nitai iji eigki ja pah ti pan itac nadiat is eseij:

²² maiya, im lep ineig, ecris imyiali aijama vai intas o nahaiji ilpu takata irama, eris apan u unmun nij ara an nuhialeg;

²³ eris eti ecetai nohun ara, ja eris apam ara, um ika, Era mun ehcohos pam ehelema a ilpu agelo, um ika, Et mun nusjai aien.

²⁴ Eris apan u unmun nij nahaiji atimi irama, um ecetai et idivaig intas eris asaig a ilpu takata: eris eti ecet yin ara.

²⁵ Is ika ehele rau aien, Ak ohwat atimi ahnag, et auatialidi inliinmopomirau aijaurau par imyiisjis ninivaijec intas asega eris asaig a ilpu profeta:

²⁶ eris idim ika yi leucse nohocred iji eigki a Kristo, ja par leh natimi alupas o un.

²⁷ Is atupun aien um asuptecnaig ehele rau intas asega vai yin is aged a Moses im ilpu profeta asega.

²⁸ Ehtijis apan ahtaij ubutpotet u nuarin-pece iyehki erus apan iran arau: is ika aien yi ahtaregdei rau.

²⁹ Ja erus acaiji yin arau, um ika, Amen aiek ehelemrau; et ubutpotet u nepeig; injupura mun eigki. Is apan aien um amen ehele rau.

³⁰ Is wat ateuc ehele rau aien um hag, is leh nareto aien, um naaurineig iran, um aswaplec, um alaa rau.

³¹ Is wat weilah nesganimtarau arau, erus ato yin arau; ja is um tup ti ehpan aien ehele rau.

³² Erus tas jipe arau, um ika, Is wat tas eheleijau aien an nefalaig, um asuptecnaig intas eris aged, is emda inliinmopjau akaijau.

³³ Erus atidai arau an nuarin-nadiat iyehki, um adumoij pan Jerusalem, um ecet natimi is eleven eris asjapicnaig ara, im lep atimi amen ehele ra,

³⁴ eris ika ara, Et mun idim nusjai a Natimarid, um ehcohos ehele Saimona.

³⁵ Erus asuptecnaig arau nitai iji ehki an natga urau an nefalaig, im lep nato yin vaig urau an naswaplec nareto o un.

³⁶ Eris wat tas jipe ara, is aiji a Iesu an nuhup ura, um ika ehele ra, Etmu eteuc neigpa ehelemia.

³⁷ Is ehioehio alupas inliinmopura ara, um imtitaig, um aktaktai, mika eris mun ecetai natmas.

³⁸ Is ika ehele ra aien, Eka auri aijaua par imtitaig? eka auri aijaua et par ehioehio inliinmopomia?

³⁹ almoi nikmak ero aijaua im neduok ero, ainyak aigki: atcei pam nyak aijaua, um almoi; et eti ohu atmas im neduon, et idivaig nalum nyak unyimia.

⁴⁰ Is wat asan tas ineigki aien, ja par ehvaig ehele ra nikman im neduon.

⁴¹ Eris wat imyiali ara, is ti nimyiijis ninivaijec ura va nimyiacitak ura, is ika ehele ra aien, Et eteuc nitai caig unyimia aijaua, ka o’o?

⁴² Eris alaan nuari numu ara eris ahen, im nuari hunekom.

⁴³ Is leh aien, um caig an nuhup ura.

⁴⁴ Is ika ehele ra aien, Kis wat amen ehelemia ainyak kis asan tas iji eigki ehelemia ainyak, mika uhpu idim ehneijid irak nitai iji eigki asega eris aged vai nyak an nitasvitai o Moses, im lep an nitasvitai o ilpu profeta, im lep an nitasvitai Ohranitai.

⁴⁵ Is asalgei inliinmopura aien, mika eri ato ara intas eris aged,

⁴⁶ um ika ehele ra, Eris aged is ucce, im lep ineig eris idim ika yi mas a Kristo, ja et wit ti pan itac nadiat inyi eseij, etpu lep nusjai aien:

⁴⁷ mika eri atupun Jerusalem ara um asuptecnaig ehele nup urai iji pece asega, eri adumoij anliinmopura ara um leh nitai iknipagki nedo has ura an nidan.

⁴⁸ Eka atimi asuptecnaig nitai iji eigki aijaua.

⁴⁹ Ekpu alupai caua ainyak intas upyi asaig o Etmak: jam amen aijaua an nuarin-pece Jerusalem, um uhum pan naopan iyehki akupu leh nemda aijaua jipagko.

⁵⁰ IS imyiapan ra Bedane aien, um adaigjai nikman ero, um asan tas upene vai ra.

⁵¹ Is wat asan tas upene vai ra aien, eris atipagki yin ehele ra, um imyiaridjai yin an nohatag.

⁵² Eris alaigaheni vai yin ara, um adumoij pan Jerusalem, um imyiacitak alupas:

⁵³ eris amen ara an neom ahlap irai iji adiat, um acesaces nohranitai, um imyiahpas Atua. Emen.