Lukas 2 - Intas-Etipup Mat u Iesu Kristo 1863 (Aneityum Gospels)

¹ An naopan iyehki is tas alep a Sisar Acustus, um ika, eri aged nidai atimi asega an pece.

² (Eris atupun um aged ehni nidai atimi an naopan iyehki is atimi alupas Sirya a Sairinyus.)

³ Eris apan natimi asega irai uari-pece ura, mika eri aged idara.

⁴ Is lep ahes an nuarin-pece Nasared a Josef an pece Calili, um apan alaig Jutaia, an nuarin-pece o Tevit, nidan Bedleem, is mapoi Tevit aien um up uran pece o un,

⁵ mika eri aged nidan im lep Mere ehgan, eris upyi asanlai imi yin ehelen, is um opouc aien.

⁶ Erus amen eahki arau, um uhum pan naopan iyehki is apos inhal o un aien.

⁷ Is apos inhalav atamaig o un aien inmetto, um aso pam yin an napelumai, um ati yin an nelcau hag o kurimatau; is ti inuarin ineig eru amen iran arau anliin neom ehele atimi asega.

⁸ Eris amen an pece iyehki a ilpu atimi asgi siip, eris amen ara an lelitai, um aminjinaig siip ura an nepeig.

⁹ Is ehcohos pan ehele ra a nagelo is ethi o Ihova, is ehlo ra naijora Ihova; eris um imtitaig alupas ara.

¹⁰ Is ika ehele ra a nagelo, Jim imtitaig aijaua: ekpu idim asuptecnaig ehelemia ainyak intas upene: erupu imyiacitak alupas natimi asega:

¹¹ eh mun apos Natimi imyiatamaig caua, an nadiat ineigki an nuarin-pece o Tevit, et Kristo aien Natimarid:

¹² nitai asjaaicnaig imi caua ineigki; Akupu ecet inhalav aijaua er aso pam yin an napelumai, et asjeuc aien an nelcau hag o kurimatau.

¹³ Eris lep auroauro a ilpu agelo is ahinag an nohatag, um ehcohos pan ehele nagelo iyehki, um imyiahpas Atua, um ika,

¹⁴ Etmu eteuc nimyiahpas vai Atua an nohatag ijinies acen; um eteuc neigpa an nobohtan, im naiheuc va atimi.

¹⁵ Eris wat ude ra a ilpu agelo um aridjai an nohatag, eris tas jipe a ilpu atimi asgi siip, um ika, Ti apan Bedleem akaija, um almoi nitai ineig et mun ham, et mun asuptecnaig eheleija a Ihova.

¹⁶ Eris auroauro ara um apan, um ecet Mere, im Josef, im lep inhalav nasjeucvaig an nelcau hag o kurimatau.

¹⁷ Eris wat ecetai ara, eris asuptecnaig intas eris asaig ehele ra vai inhalav ineigki.

¹⁸ Natimi asega iji ehki eris atahaijeg intas ineigki ara, eris imyiali nitai iji eigki ara eris asaig ehele ra a ilpu atimi asgi siip.

¹⁹ Is imyiehva nitai iji eigki asega a Mere, um aktaktai inliinmopon.

²⁰ Eris atga ura a ilpu atimi asgi siip, um naaurineig vai Atua, um imyiahpas yin, va nitai iji eigki asega eris atahaijeg ara um almoi, et idivaig eris asaig ehele ra.

²¹ IS wat ti pan itac nadiat is eet eris aperitome irai inhalav, eris anvi nidan par ika IESU, is anvi nidan a nagelo an naopan iyehki is pam eti opouc iran a risin.

²² IS wat ti pan itac nadiat ago adicinadicin risin iran is idivaig intas alep o Moses, erus imyiapan yin Jerusalem arau mika eru ati yin an nuhup o Ihova;

²³ (et idivaig eris aged an tas alep o Ihova, um ika, “Erumu itaup vai Ihova a ilpu halav atamaig asega inmetto;”)

²⁴ um ahlap an nitai ahlap, et idivaig eris aged an tas alep o Ihova, um ika, “Nalaupa inyi ero, ka nucip haklin inyi ero.”

²⁵ Is amen Jerusalem natimi is ethi, nidan Simeon; is atimi upene aien um alaigaheni vai Atua, is aitgaig nitai imyiacitak imi nupu Isreel aien: is amen ehelen a Nesgan Upene.

²⁶ Is asuptecnaig ehelen a Nesgan Upene, mika yi upyi alum Kristo o Ihova aien, ja pah mas.

²⁷ Is apan aien anliin neom ahlap va Nesgan Upene: erus wat imyiapan Iesu inhalav ahwat atmil o un, mika eru ago nedo iyehki vai yin et idivaig intas alep,

²⁸ is leh yin aien, um ablim pam yin, um naaurineig vai Atua, um ika,

²⁹ Ak Natimarid, ek aheca unyum ainyak, an adceijaig eigpa nyak aiek an naopan ineig, et idivaig intas unyum:

³⁰ ek mun ecet natimi imyiatamaig cama unyum ainyak,

³¹ aien as ati yin aiek an nuhup u atimi asega;

³² mika yi itai lah aien imi nup urai iji pece, im lep nitai imyiahpas imi nupu Isreel unyum.

³³ Is imyiali a Josef im risin va nitai iji eigki eris asaig vai yin.

³⁴ Is asan tas upene vai rau a Simeon, um ika ehele Mere risin, Eris ati inhalav ineigki mika eri eropse nahaiji atimi inyi ahinag, um atidai inyi ahinag irai nupu Isreel, et lep itai asjaaicnaig uhpu asan tas has vai yin:

³⁵ (etpu idim ahcai inliinmopom nauitoga,) mika uhpu asuptecnaig naktaktai o inliinmopoi atimi inyi ahinag.

³⁶ Is amen naprofeta takata is ethi, nidan Ana, inhal o Fanuel, is mapoi Eser aien: is idim efatimi aien; is leh natamnyu un aien an natahaig o un, um amen ehelen an mesese is seven;

³⁷ is um mas a natamnyu un; is eete for inmesese iran; is amen aien an neom ahlap, um aheca o Atua an natwakam im nalaigaheni irai iji epeig im niji adiat.

³⁸ Is apan aien anliin neom an nuarin-nadiat iyehki, um lep naaurineig vai Ihova, um tas vai yin ehele ra asega Jerusalem, eris aitgaig natimi imyiatamaig ra ara.

³⁹ Erus wat atid niji itai asega arau, is idivaig intas alep o Ihova, erus adumoij pan arau Calili, an nuarin-pece urau Nasared.

⁴⁰ Is alupas a inhalav iyehki um emda inliinmopon, um esjilid narapakau o un: is aiheuc vai yin a Atua.

⁴¹ ERUS apan Jerusalem ahwat atmil o un irai iji mesese u nasjapicnaig va napaska.

⁴² Is wat twelv inmesese iran, erus apan Jerusalem arau, is idivaig nedo o atimi u nasjapicnaig iyehki.

⁴³ Is wat ti pan itac nadiat iji ehki, erus adumoij pan arau, is amen a Iesu Jerusalem is adualep aien; ja is eti ato a Josef im risin:

⁴⁴ erus aktaktai arau mika is ahced atimi aien; erus atga an nadiat is ethi arau, um ahilek yin ehele ilpu atimi ehpan ira rau im ilpu atimi eblaamnem urau:

⁴⁵ erus wat ti ecet yin arau, erus adumoij pan Jerusalem arau, um ahilek yin.

⁴⁶ Is wat ti pan itac nadiat is eseij, erus ecet yin arau anliin neom ahlap nateucvaig an niblai ilpu atimi esege; is atahaijeg ra aien, um lep ahodai ra vai itai.

⁴⁷ Eris imyiali yin ara asega eris atahaijeg yin, va nato upene o un im nasuptecnaig upene itai o un.

⁴⁸ Erus wat ecet yin arau, erus imyiali arau: is ika ehelen a risin, Ak inhal unyak, na auri aiek par ago nedo ineigki vai cumrau? ek mun ahilek euc ainyak im etmam, um imyitaig euc.

⁴⁹ Is ika ehele rau aien, Erau ahilek nyak aijaurau vanhe? erau idim ato aijaurau, nikavaig, eris idim ika ki ago niji auritai o Etmak ainyak.

⁵⁰ Ja erus eti ato arau intas ineig is asaig ehele rau aien.

⁵¹ Is ahced rau aien, um apan Nasared, um imyiaiji intas urau: ja is apos intas asega iji ehki anliinmopon a risin.

⁵² Is alupas a Iesu, is esjilid nato itai o un; is upene inliinmopoi Atua vai yin, im lep inliinmopoi atimi.