Lukas 19 - Intas-Etipup Mat u Iesu Kristo 1863 (Aneityum Gospels)

¹ Is yetpan Jeriko a Iesu, um atga ehni iran.

² Is amen eahki natimi is ethi, nidan Sakius, natimi alupas o ilpu atimi akwanaham; is atimi ikni itai aien.

³ Is eriss ehele Iesu aien mika yi alum yin um ato yin; ja is ehka vai yin va atimi is ahinag, is upoupo aien.

⁴ Is athut aien um uhup ira ra, um ahei nauyerop alupas is ethi, mika yi alum yin: eris ika inyi apan aien an nefalaig iyehki.

⁵ Is wat yetpan an nuarin iyehki a Iesu, is easji pan aien, um ecet yin, um ika ehelen, Ak Sakius, auroauro aiek, um asuol; ekpu idim amen ainyak an neom unyum an nadiat ineigki.

⁶ Is auroauro aien, um asuol, um leh yin, um imyiacitak.

⁷ Eris wat almoi ara, eris tas upoupo ara asega, um ika, Et apan aien alaig ehele natimi auatatimi.

⁸ Is aiji a Sakius, um ika ehele Natimarid, Ak Natimarid, ekpu alupai ilpu ihki atimi nahaiji padiaig unyak ainyak; el kis atoraliak tah nitai ainyak ehele tah natimi va nedo efaifa, ekpu ehcemanohwan aru ainyak.

⁹ Is ika ehelen a Iesu, Et mun yetpam nitai imyiatamaig caua an nimnim ineigki an nadiat ineig, et idim mapoi Ebraham aien:

¹⁰ et ham a Inhal o natimi mika yi ahilek ilpu atimi ahnag, um imyiatamaig ra.

¹¹ ERIS wat atahaijeg intas iji eigki ara, is lep ecsipece aien, va nitai ineig is ubutpotet Jerusalem aien, eris lep aktaktai ara mika yi auroauro um ehcohos pan nelcau o Atua.

¹² Is ika aien, Is apan an pece itac acen natimi alupas is ethi mika eri ati yin yi atimarid an pece o un, ja par lep adumoij.

¹³ Is asjapicnaig ilpu aheca o un is ten aien, um alupai ra nuarimune is ten, um ika ehele ra, Aminjinaig sji eigki aijaua um yetpan u nadumoij pam unyak.

¹⁴ Eris edemda vai yin a nup uran pece o un, um abrai atimi mika eri apitac yin, um ika, Ecra esjum aijama, nikavaig, yi atimarid an pece unyima natimi ineigki.

¹⁵ Is wat adumoij aien, um atimarid an pece o un, is ika aien eri asjapicnaig pan ehelen ilpu aheca iji ehki, is alupai ra mune iji ehki aien, mika yi ato is ehed mune iji eig eris leucse ara va nauarimtai itai ura.

¹⁶ Is apan ehelen natimi is ethi, um ika, Ak natimi alupas, ek mun leh nuari-mune et ten ainyak an nuari-mune et ethi unyum.

¹⁷ Is ika ehelen aien, Et upene, ak naheca upene, na mun aminjinaig upene nitai eti elpat aiek, napu atimi alupas aiek irai iji uari-pece inyi ten.

¹⁸ Is lep apan is ethi, um ika, Ak natimi alupas, ek mun leh nuari-mune et faiv ainyak an nuari-mune et ethi unyum.

¹⁹ Is lep ika ehelen aien, Napu lep atimi alupas aiek irai iji uari-pece inyi faiv.

²⁰ Is lep apan is ethi, um ika, Ak natimi alupas, nuari-mune unyum ap eigki, kis mun adei ainyak an napelumai um aminjinaig:

²¹ kis imtitai euc ainyak, na atimi ipjin aiek; na asjapienaig itai aiek an nuarin ineig as eti terimterim irai itai iran aiek, um leucse itai an nuarin ineig as eti ahoaig itai iran aiek.

²² Is ika ehelen aien, Ak naheca auatatimi, ekpu aru nedo has unyum ainyak et idivaig intas unyum: as ato aiek mika kis atimi ipjin ainyak, um asjapicnaig itai an nuarin ineig kis eti terimterim irai itai iran ainyak, um leucse itai an nuarin ineig kis eti ahoaig itai iran ainyak:

²³ as auri aiek par eti alupai ilpu atimi ahtai mune nuari-mune unyak, mika ki leh mune unyak ainyak an napam unyak, im lep ineig yi eled?

²⁴ Is ika aien ehele atimi eris aiji ubutpotet ara, Atipagki nuari-mune et ethi o un aijaua, um alupai natimi ineig et ten nuari-mune o un.

²⁵ (Ja eris ika ehelen ara, Ak natimi alupas, et mun ten nuari-mune o un aien.)

²⁶ Ek asaig ehelemia ainyak mika, Ara asega et ura niji itai, uhpu alupai ra; ja aien et eti o un niji itai, uhpu atipagki niji itai iran.

²⁷ Im lep ineig, akumu imyiapam igcaki ilpu atimi tak atimi irak iji eigki aijaua, eris esjum ara, um ika, ki jim atimarid an pece ura ainyak, um atgei ra an nuhup unyak.

²⁸ Is wat asan tas iji eigki aien, is atga o un aien, um apan alaig Jerusalem.

²⁹ Is wat apan aien ubutpotet Bedfaje im Bedane, u nedoon nidan Olivet, is abrai ohwat atimi atahaijeg yin is ero aien,

³⁰ um ika, Apan aijaurau an nuarin-pece ineig et eteuc an nuhup unyimirau; arau wit yetpan aijaurau, arupu ecetai inhakli nifo aijaurau er athai, is eti fi ateuc iran tah: ahiyi aijaurau um imyiapam igcaki:

³¹ el et ika ehelemirau tah natimi, Erau auri aijaurau par ahiyi inhakli nifo? arumu ika ehelen aijaurau, Et merit vaig a Natimarid.

³² Erus apan ahwat rahki is abrai rau aien, um ecetai et idivaig nasuptecnaig o un ehele rau.

³³ Erus wat ahiyi inhakli nifo arau, eris ika ehele rau atimi ohuun, Erau auri aijaurau par ahiyi inhakli nifo?

³⁴ Erus ika arau, Et merit vaig a Natimarid.

³⁵ Erus imyiapan ehele Iesu arau: eris algeijai napelumai ura ara an hakli nifo, um atijai Iesu iran.

³⁶ Is wat apan aien, eris ahled napelumai ura ara an nefalaig.

³⁷ Is wat apan aien ubutpotet an nefalaig asuol an nedoon Olivet, eris imyiacitak a ilpu atimi atahaijeg yin asega, eris ahinag ara, um ahlaig ijinies, um imyiahpas Atua, va nauritai emda asega eris ecetai ara;

³⁸ um ika, Naaurineig vai Natimarid ineig et ham aien an nidai Ihova: et eteuc neigpa an nohatag, im nimyiahpas an nuarin ijinies acen.

³⁹ Eris ika ehelen nahaiji ilpu Farisi ira atimi is ahinag, Ak natimi esege, acaiji ilpu atimi atahaijeg euc aiek.

⁴⁰ Is tas aien, um ika ehele ra, Ek asaig ehelemia ainyak mika, el era eti tas ara sji eigki, etpu auroauro um ahlaig ijinies niji hat.

⁴¹ Is wat apan ubutpotet aien, is almoi nuarin-pece itaup aien, um imyitaig,

⁴² um ika, El is efi ato aiek, itu acen ka an naopan ineig, niji itai imyiatamaig euc! ja eh mun idim adenaig vai euc.

⁴³ Etpu yetpam iram nadiat iji ehki, eru wit ucji nehpanitai ehtag a ilpu atimi tak atimi iram, um arahed iram, um atapanes iram marahed mihtag,

⁴⁴ erupu alcapdicraig euc ara, im lep natimi iram; inyi eti amen inhat inyi ethi irai taka hat; va nitai ineig, nikavaig, as eti ato naopan ateghe euc unyak aiek.

⁴⁵ Is apan aien anliin neom ahlap, um ahlo pok ijo ra eris ahtai itai ara eahki, um auarimtai itai;

⁴⁶ um ika ehele ra, Eris aged, um ika, “Et eom alaigaheni neom unyak;” ja akis ika aijaua yi “uarin imi ilpu atimi ehneg itai” neom unyak.

⁴⁷ Is esege imi ra aien irai iji adiat an neom ahlap. Eris ahilek yin a ilpu atimi ahlap esjilid, im ilpu atimi esege, im ilpu atimi alupas an pece, mika eri atgei yin;

⁴⁸ ja is ehka vai ra nagovaig tah nitai vai yin: eris idim merit alupas atimi asega natahaijeg yin vaig.