Lukas 18 - Intas-Etipup Mat u Iesu Kristo 1863 (Aneityum Gospels)

¹ Is ecsipece ehele ra aien, va nitai ineigki, nikavaig, eris idim ika eri alaigaheni atimi irai iji adiat, um jim auatialidi;

² is ika aien, Is eteuc natimi alupas is ethi an nuarin-pece is ethi, is eti imtitai Atua aien, um eti eccen va atimi:

³ is lep eteuc intakata is ethi an nuarin-pece iyehki is mas natamnyu un; is apan ehele natimi iyehki aien, um ika, Namu aru nedo has ineigki aiek et ago vai nyak natimi tak atimi irak.

⁴ Is eti fi auroauro aien um aru: ja par apitac, um ika inliinmopon, Ek idim eti imtitai Atua ainyak, um eti eccen va atimi;

⁵ ja et imyidohalav nyak a intakata ineigki, va nedo ineigki ekpu aru nedo has vai yin ainyak, vai ki jim auatialidi ainyak va nedimdumoij o un irai iji adiat.

⁶ Is ika a Natimarid, Akumu atahaijeg aijaua intas o natimi alupas auatatimi iyehki.

⁷ Etpu aru a Atua, ka o’o, va atimi is ehtai ra aien, era idim ugni yin ara irai iji adiat im niji epeig, et wat eti tas ehele ra aien?

⁸ Ek asaig ehelemia ainyak mika, etpu auroauro aien um aru vai ra. Ja et wit ehcohos a Inhal o natimi, inyi idim eti ecetai nimyiisjis ninivaijec an nobohtan aien.

⁹ Is ecsipece aien ehele atimi iji eigki eris ispara imyianiv ra nedo atoh ura ara, um amcel vai tak atimi:

¹⁰ Erus apan anliin neom ahlap natimi is ero um alaigaheni; is Farisi is ethi, im lep natimi akwanaham is ethi.

¹¹ Is aiji a Farisi, um echim alaigaheni, um ika, Ak Atua, ek naaurineig vai euc ainyak, ek eti idivaig tak atimi ainyak, ilpu atimi atoraliak itai, im ilpu atimi auatatimi, im ilpu atimi ago ingaijid, im lep natimi akwanaham ineigki:

¹² ek ehcero atwakam ainyak irai iji wiik, um ahtai nuarin itai et ethi ira ahaiji iji itai asega et ten unyak.

¹³ Is aiji itac acen a natimi akwanaham, is pam eti easji pan an nohatag aien; is ahpoi inritin aien, um ika, Ak Atua, aiheuc vai nyak aiek, ek atimi auatatimi ainyak.

¹⁴ Ek asaig ehelemia ainyak mika, is apan an neom o un natimi ineigki, eris ika uhmu eti aru nedo has o un, ja eris ika uhpu aru nedo has o natimi iyehki: aien et ika aien et esjilid, etpu upoupo aien; ja aien et ika aien et upoupo, etpu esjilid aien.

¹⁵ ERIS imyiapan ehelen ilpu halav ara, mika yi atcei pan ra aien: ja eris wat almoi nedo ineigki a ilpu atimi atahaijeg yin, eris acaiji ra ara.

¹⁶ Ja is ahlaig vai ra a Iesu, um ika, Akumu ika aijaua eri ham ehelek a ilpu halav haklin, um jim acaiji ra: era idivai ra ara era amen an nelcau o Atua ara:

¹⁷ et inivaijec ineig ek asaig ehelemia ainyak mika, Aien et eti leh nelcau o Atua aien et idivaig inhalav, inyi ti apan iran aien.

¹⁸ Is ahodai yin natimi alupas is ethi, um ika, Ak Natimi esege upene, inki ago inhe ainyak va ekpu leh nitai umoh iran ineig inyi ti lep ti?

¹⁹ Is um ika ehelen a Iesu, Na auri aiek par aniv upene nyak? et eti upene tah, Atua ache:

²⁰ na ato niji tas alep aiek, eris ika, “Jim ago ingaijid, Jim atgei natmas, Jim ehneg itai, Jim asan tas ahcil, Namu eccen vai etmam im risum aiek.”

²¹ Is ika aien, Kis apos ji eigki asega ainyak an halav unyak um uhum pam naopan ineig.

²² Is wat atahaijeg nitai iji eigki a Iesu, is ika ehelen aien, Nai eti ago nitai et ethi aiek: namu ahtai niji itai asega unyum aiek, um alupai ilpu ihki atimi, napu idim leh niji itai upene an nohatag aiek: um lep apam aiek, um apitac nyak.

²³ Is wat atahaijeg nitai iji eigki aien, is taigtaig alupas aien: is idim atimi ikni itai aien.

²⁴ Is wat almoi a Iesu, nikavaig, is taigtaig alupas aien, is ika aien, Et ehka va atimi iji eig era ikni itai ara napanvaig an nelcau o Atua!

²⁵ et tup upene vai kamela namiliakvaig an hed an nitel, jam ehka va natimi ikni itai napanvaig an nelcau o Atua.

²⁶ Ara eris atahaijeg ara, eris ika ara, Uhpu imyiatamaig di?

²⁷ Is ika aien, Et ehka nitai iji eigki va atimi, ja et tup upene vai Atua.

²⁸ Is ika a Pitrus, Ecris idim ude niji itai asega aijama, um ahced euc.

²⁹ Is um ika ehele ra aien, Et inivaijec ineig ek asaig ehelemia ainyak mika, Ara asega eris ude eom ura, im ilpu atmil ura, im ilpu etoara, im ilpu ehgara, im ilpu hal ura, va nelcau o Atua,

³⁰ erupu leh neruvaig esjilid ara an naopan ineig, im lep nitai umoh iran ineig inyi ti lep ti, an naopan iyek.

³¹ IS leucse atimi is twelv aien, um ika ehele ra, Intupu idim apan Jerusalem akaija, uhpu ehneijid niji itai asega eris aged a ilpu profeta vai Inhal o natimi.

³² Uhpu ati yin ehele nup urai taka pece, erupu imyiafakahcil yin ara, um abli yin, um agdei yin,

³³ um aredei yin, um atgei yin; ja et wit ti pan itac nadiat inyi eseij, etpu lep nusjai aien.

³⁴ Eris eti ato nitai iji eigki ara: eris adenaig intas ineigki vai ra, eris eti ato nitai iji eigki ara eris asuptecnaig.

³⁵ Is wat ubutpotet pan Jeriko aien, is ateuc an nahaijin nefalaig natimi is ethi is aupat nesganimtan, um ugni itai:

³⁶ is atahaijeg aien atimi is ahinag natgavaig an nefalaig, is ahodaig aien, um ika, Di sji eigki?

³⁷ Eris ika ehelen ara, Iesu ineigki nup an Nasared, et apam an nefalaig.

³⁸ Is ahlaig aien, um ika, Ak Iesu, Mapoi Tevit, aiheuc vai nyak.

³⁹ Ara eris uhup ara eris acaiji yin ara mika yi jim tas aien: ja is esjilid nahlaig o un, um ika, Ak Mapoi Tevit, aiheuc vai nyak.

⁴⁰ Is aiji a Iesu, um ika eri imyiapan yin ehelen: is wat apan ubutpotet ehelen aien, is ahodai yin aien,

⁴¹ um ika, Nai merit aiek vanhe mika ki ago imi euc ainyak? Is ika aien, Ak Natimarid, ek merit ainyak mika yi lah nesganimtak.

⁴² Is ika ehelen a Iesu, Etpu lah nesganimtam aiek: na mun cehcehe aiek va nimyiisjis ninivaijec unyum.

⁴³ Is um auroauro um lah nesganimtan aien, is ahced yin aien, um imyiahpas Ataa: eris wat ecetai atimi asega, eris imyiahpas Atua ara.