Lukas 14 - Intas-Etipup Mat u Iesu Kristo 1863 (Aneityum Gospels)

¹ An nadiat atumop is ethi is apan aien anliin neom o natimi alupas is ethi is Farisi aien mika yi hag, eris imyiiris nedo o un ara.

² Is ateuc an nuhup o un a natimi is ethi is emehe alagaigwai aien.

³ Is tas a Iesu ehele ilpu atimi asuptecnaig intas alep im ilpu Farisi, um ika, Et itaup nago cehcehe atimi vaig an nadiat atumop, ka o’o?

⁴ Eris eti tas ara. Is leh yin aien, um ago cehcehe yin, um adceijai yin;

⁵ um tas ehele ra, um ika, Natimi ineig yek eda iramia, et wat etjose an nehpanitai nifo o un ka kurimatau o un, et eti aihiaigjai aien an nadiat atumop?

⁶ Is ehka vai ra nauudvaig intas iji eigki.

⁷ Is ecsipece aien ehele ilpu atimi eris imyiacaij ra, is wat almoi nedo ura aien nahilekvaig itai ateuc esjilid imi ra; um ika ehele ra,

⁸ Et wit imyiacaij pan euc tah u inhag an natmehgan, namu jim ateucse aiek an nuarin esjilid; kit etpu lep imyiacaij natimi esjilid iram aien;

⁹ etpu apan natimi ineig et imyiacaij caurau, um ika ehelum, Asuol aiek va natimi ineigki; napu ateucse aiek sepamki, um ehcamai.

¹⁰ Ja et wit imyiacaij euc tah natimi, apan aiek um ateucse sepamki; et wit apan aien et imyiacaij euc, um ika, Ak etoak, namu aridjai aiek: erupu eccen vai euc ara era ateuc ehelum ara um hag.

¹¹ Aien et ago nedo ijinies aien, etpu upoupo aien; aien et ago nedo upoupo aien, etpu esjilid aien.

¹² Is lep tas aien ehele natimi ineig is imyiacaij yin, um ika, Na wit auanetha alupas aiek ka inhag alupas, jim imyiacaij ilpu apa unyum aiek, ka ilpu etoam, im ilpu atimi ehpan iram, im ilpu atimi ikni itai eblaamnem unyum; kit erupu lep imyiacaij euc ara, um aru nedo unyum:

¹³ na wit auanetha alupas aiek, imyiacaij ilpu ihki atimi, im ilpu atimi amot neduora, im ilpu atimi asvahtec neduora, im ilpu atimi aupat nesgaimtara:

¹⁴ namu ahesmoij aiek; et ehka vai ra naruvaig nedo unyum: ja napu leh neruvaig imi euc aiek an naopan iyehki eru wit anusjai a ilpu atimi upene.

¹⁵ Is wat atahaijeg intas iji eigki natimi is ethi is ateuc aien um hag ehelen, is ika ehelen aien, Et mun ahesmoij aien etpu hag aien an nelcau o Atua.

¹⁶ Is ika ehelen aien, Is auanetha alupas natimi is ethi, um imyiacaij atimi is ahinag:

¹⁷ is wat jupura is abrai naheca o un aien mika yi asaig ehele ra eris imyiacaij ra, um ika, Apam aijaua; eh mun imyecrei niji itai asega.

¹⁸ Eris ehrimyiisjis athiathi ara asega. Is uhup natimi is ethi, um ika, Ek mun auanimtan nuarin nobohtan ainyak, ek mun et hidim ika ainyak ki apan um almoi: ek ugni euc ainyak mika an jim imyiisjis irak aiek.

¹⁹ Is lep ika is ethi, Ek mun auanimtai kurimatau et ten ainyak, ekpu apan ainyak um almoi nedo ura: ek ugni euc ainyak mika an jim imyiisjis irak aiek.

²⁰ Is lep ika is ethi, Ek mun leh ehgak ainyak; et ehka vai nyak napanvaig.

²¹ Is apan a naheca iyehki um asuptecnaig nitai iji eigki ehele natimi alupas o un. Is edemda a natimi alupas iyehki, um ika ehele naheca o un, Auroauro aiek um apan irai efalaig esjilid im lep imteri efalaig an nuarin-pece, um imyiapam igcaki ilpu ihki atimi, im ilpu atimi amot neduora, im ilpu atimi asvahtec neduora, im ilpu atimi aupat nesgaimtara.

²² Is ika a naheca iyehki, Ak natimi alupas, ek mun ago nitai iyehki ainyak as asaig aiek, ja et eti ohua neom.

²³ Is ika a natimi alupas ehele naheca o un, Apan aiek irai efalaig itac, im lep lelitai, um leucse atimi, um imyiapam ra, mika yi ohua neom unyak:

²⁴ ek asaig ehelemia ainyak mika, Inyi ti ecispan nitai caig unyak tah irai ra sji ehki eris imyiacaij ra.

²⁵ Eris ahced yin natimi is ahinag: is ahidai yin aien, um ika ehele ra,

²⁶ El et ham ehelek tah natimi, jam eti amcel vai etman, im risin, im ehgan, im ilpu hal o un, im ilpu etoan, im ilpu atahaig iran, im lep numoh o un, et ehka vai yin nikavaig yi atimi atahaijeg nyak.

²⁷ Aien et eti apos nauincai atgeig o un aien, um apitac nyak, et ehka vai yin nikavaig yi atimi atahaijeg nyak.

²⁸ Et wat ika tah iramia yi acta neom ijinies, et upyi hup aien um ateucse, um esvi nimtan neom, kit et ahinag niji itai o un, uhpu actaig ehni;

²⁹ va yi jim atupun neom aien, jam auatialidi par actaig ehni, eru wit ecetai atimi, erupu imyiafakahcil yin ara asega,

³⁰ um ika, Is atupun neom o un natimi ineigki, ja et ehka vai yin nactaig ehni vaig.

³¹ Et wat ika tah natimarid yi ati nedoa vai natimarid et eche, et upyi hup aien um ateucse, um aktaktai, kit et emda aien im natimi et ten dausant o un par aat irai natimarid ineig et imyiham nedoarin aien im natimi et twente dausant o un;

³² el et eti emda aien, et wat amen itac acen natimarid iyehki, et abrai ilpu aheca o un aien mika eri apan ara, um ugni yin mika etmu lep eigpa.

³³ Et idim ucco, aien iramia el et eti ude niji itai asega o un aien, et ehka vai yin nikavaig yi atimi atahaijeg nyak.

³⁴ Et upene inmohoanjop: ja el et aiyu inmohoanjop, uhpu lep leh nesgan um uauo?

³⁵ et eti upene vai nobohtan, um eti uri naheh; ja era erekhaig pan itac atimi. Aien et eteuc intikgan aien par ahgei itai, etmu atahaijeg aien.