Lukas 11 - Intas-Etipup Mat u Iesu Kristo 1863 (Aneityum Gospels)

¹ IS alaigaheni aien an nuarin is ethi, wat atiid, is ika ehelen natimi atahaijeg yin is ethi, Ak Natimarid, esege nalaigaheni imi cama aiek, et idivaig is esege imi ilpu atimi atahaijeg yin a Joanes.

² Is ika ehele ra aien, Aku wit alaigaheni aijaua, um ika, Ak Etmama an nohatag, Etmu itaup nidam. Etmu yetpam nelcau unyum. Uhmu imyiaiji intas unyum an nobohtan, et idivaig an nohatag.

³ Alaama aiek nitai caig incama irai iji adiat.

⁴ Um jim aru tah nedo has unyima aiek; ecra idim eti aru tah nedo has o atimi vai cama aijama. Um jim atau irama an nedo oop aiek; jam imyiatamaig cama va niji itai has.

⁵ Is ika aien ehele ra, Di neigki iramia et eteuc napah o un, el et apan ehelen aien an nijihgan nepeig, um ika ehelen, Ak etoak, alupai nyak nareto yi eseij aiek, ekpu aru ainyak;

⁶ et mun ham nalaig unyak et ethi, ja et ti nitai caig unyak ineig ekpu alaan ainyak:

⁷ etpu tas aien anliin neom o un, um ika, Jim imyidohalav nyak aiek: eh mun atapanes an neucse neom, era asjeuc ehelek a ilpu hal unyak; et ehka vai nyak natidaivaig, um alupai euc?

⁸ ek asaig ehelemia ainyak mika, Inyi eti atidai aien um alupai yin va nitai ineig, nikavaig, et apah o un aien, ja etpu atidai aien um alupai yin nareto iji eig is ugni yin vaig aien, va nimyiisjis emda o un.

⁹ Ek asaig ehelemia ainyak mika, Akumu ugni itai aijaua, uhpu alupai caua; akumu ahilek itai aijaua, akupu ecetai aijaua; akumu etcetcei intapanes aijaua, uhpu asalgei vai caua:

¹⁰ aien et ugni itai aien, etpu leh aien; aien et ahilek itai aien, etpu ecetai aien; aien et etcetcei intapanes aien, uhpu asalgei vai yin.

¹¹ El et ugni etman va nareto a inhal o un tah iramia, inyi ti alaan inhat aien; el et ugni numu aien, inyi ti alaan nimyiv aien mika numu;

¹² el et ugni inhaklin jaa aien, inyi ti alaan nispeuv aien.

¹³ El eka ato aijaua, ak ilpu atimi auatatimi, par alupai ilpu hal unyimia niji itai tup ahtai upene, et esjilid a Etmamia an nohatag par alupai ilpu atimi ugni yin Nesgan Upene.

¹⁴ IS ahlo nagelo has aien ehele natimi is ethi is pop aien. Is wat atceijaig yin a nagelo has, is tas natimi pop; eris um imyiali natimi asega.

¹⁵ Eris ika nahaiji ra, Et ahlo ilpu agelo has aien vai Belsebub natimarid o ilpu agelo has.

¹⁶ Eris lep oop yin nahaiji ra, um ugni yin va nitai asjaaicnaig an nohatag.

¹⁷ Ja is ato naktaktai ura aien, um ika ehele ra, El et ika nero inliinmopoi nup uran tah nelcau, inyi ti amen; ka nero inliinmopoi atimi an tah nimnim, erupu atih ara:

¹⁸ el et ero inliinmopoi Satana, inyi ti amen nelcau o un: va nika unyimia, ek ahlo ilpu agelo has ainyak vai Belsebub.

¹⁹ El ek ahlo ilpu agelo has ainyak vai Belsebub, era ahlo ra vai di a ilpu hal unyimia? va nitai ineigki erupu ated caua ara.

²⁰ El ek ahlo ilpu agelo has ainyak vai nupsikmai Atua, et mun yetpam ehelemia nelcau o Atua.

²¹ El et ikni nij va atimi tah natimi emda um aminjinaig neom o un, et amen upene naga o un:

²² ja et wat apan ehelen natimi ineig et esjilid nemda o un iran, etpu leucse naga asega o un aien, is asgeig iran aien, um ahaig jipe niji itai o un.

²³ Aien et eti leh imi nyak aien, et tak atimi irak aien; aien et eti atau imi nyak aien par asjapicnaig itai, et eduoraprap aien.

²⁴ Et wat atceijaig tah natimi a nagelo has, et um atga ahnag jipe aien irai uari amasacen, um ahilek igca yi atumop iran; ja et wat eti ecetai aien, et ika aien, Ki adumoij pan ainyak an neom unyak ineig kis upyi amen iran ainyak.

²⁵ Et wat yetpan aien, um ecetai neom eh mun ahre um yecrei:

²⁶ et apan aien, um leucse ilpu agelo has et eche et seven, et esjilid nauatatimi ura an nauatatimi o un; era apan anliin neom ara, um amen iran: is upyi hup natimi iyehki um has, ja par apitac um has esjilid.

²⁷ Is wat asan tas iji ehki aien, is ahlaig ijinies a intakata is ethi ira atimi, um ika ehelen, Et mun ahesmoij a risum is apos euc aien, um alidam.

²⁸ Is ika aien, Maiya, ja era mun idim ahesmoij ara era atahaijeg intas o Atua ara, um imyiaiji.

²⁹ Eris asjapicnaig pan ehelen atimi is ahinag, is atupun aien, um ika, Era atimi auatatimi natimi an naopan ineig: era merit ara nalmoivaig nitai asjaaicnaig; ja uhpu eti ago tah nitai asjaaicnaig vai ra, nitai asjaaicnaig ache o Jona naprofeta:

³⁰ is itai asjaaicnaig a Jona imi nup an Ninivi, et um ucco etpu itai asjaaicnaig a Inhal o natimi imi atimi an naopan ineig.

³¹ Etpu atidai a intakata iyehki is atimarid aien an nuarin ineig et ahes nauritoga atahaig iran an nadiat almaijidjid an nuhup u atimi an naopan ineig, um ated ra: is ahes aien an nehni va nobohtan um apam, mika yi atahaijeg narapakau o Solomon; ja et idim amen igcaki tah et esjilid aien irai Solomon.

³² Erupu atidai a nup an Ninivi an nadiat almaijidjid an nuhup u atimi an naopan ineig, um ated ra: eris adumoij anliinmopura ara vai intas asuptecnaig o Jona; ja et idim amen igcaki tah et esjilid aien irai Jona.

³³ Et wat atni incop alahala tah natimi, et eti adenaig aien, um eti adahpoi an nipjinitai, ja et atijai aien an nitai ati incop alahala iran, mika eri almoi inlah ara era apan anliin neom ara.

³⁴ Et itai lah u nohuja nesganimtaija: et wat weilah nesganimtam aiek, et lah upene nohum asega; ja et wat aplan nesganimtam aiek, et aupat nohum:

³⁵ namu aminjinaig aiek va yi jim cas oposopos incop alahala unyum.

³⁶ Va nedo ineigki el et lah upene nohum asega, um eti aupat tah inuarin, etpu lep lah upene nohum asega, inyi idivaig incop alahala lah upene vai euc.

³⁷ Is wat tas aien, is imyiacaij yin a Farisi is ethi, mika yi apan um hag ehelen; is apan aien anliin neom o un, um ateucse, um hag.

³⁸ Is wat almoi nedo o un a Farisi iyehki, is imyiali aien mika is eti ahisjim aien ja par hag.

³⁹ Is ika ehelen a Natimarid, Ak ilpu Farisi, eka ago adicinadicin inyipin nipjinitai itac aijaua im lep naplet; ja et ohua inliinmopomia aijaua va niji itai eris atoraliak, im nedo has.

⁴⁰ Ak ilpu atimi ahnag, aien is ago inyipin nipjinitai itac aien, is lep ago inliin aien.

⁴¹ Akumu aiheuc vai ilpu ihki atimi aijaua, um alupai ra itai unyimia; va etpu adicinadicin niji itai asega imi caua.

⁴² A’a auwe vai caua, ak ilpu Farisi! eka ahtai nefelelicai auanipin upene aijaua, im nefelelicai acas, im nahtaicai asega, jam ude nedo atoh, um eti aiyu inliinmopomia vai Atua: et upene vai caua nagovaig nitai iji eigki, jam eti ude nedo iyehki.

⁴³ A’a, auwe vai caua, ak ilpu Farisi! eka merit aijaua vai itai ateuc esjilid irai eom alaigaheni, im naiheuc vai caua vaig atimi irai tiptag.

⁴⁴ A’a, auwe vai caua, ak ilpu atimi esege im ilpu Farisi! eka ilpu atimi efaifa aijaua, eka idivaig nehpai itai atelmoi atimi emesmas iran aijaua er eti ecetai, era wat atga iran atimi, jam eti ato.

⁴⁵ Is tas a natimi asuptecnaig intas alep is ethi, um ika ehelen, Ak natimi esege, na lep ated cama aiek irai tas iji eigki.

⁴⁶ Is um ika aien, Lep a’a, auwe vai caua, ak ilpu atimi asuptecnaig intas alep! eka iknijai ira atimi itai ahelwei et ehka naposvaig aijaua, jam eti atcei pan itai ahelwei iji eigki an tah nupsikmamia.

⁴⁷ A’a, auwe vai caua! eris atgei ilpu profeta a ilpu retpomia, ja eka ehteduo hat irai ehpai itai ira ra aijaua.

⁴⁸ Eka idim asuptecnaig aijaua mika et upene iramia nedo iyehki u ilpu retpomia: eris idim atgei ra ara, eka ehteduo hat irai ehpai itai ira ra aijaua.

⁴⁹ Is lep ika a Atua arapakau, Ekpu abraig pan ilpu profeta ehele ra ainyak im ilpu apostolo, erupu atgei ilpu ahaiji ra ara, um atmas vai ilpu ahaiji ra:

⁵⁰ va uhpu aru ira atimi an naopan ineig inja irai ilpu profeta asega eris atladwi an naopan iyehki eris wat ago nobohtan, um imyihum pam naopan ineig;

⁵¹ ahes an ja irai Ebel um yetpam an ja irai Sakaraia, eris atgei yin an niblan nefata im neom ahlap: et inivaijec ineig ek asaig ehelemia ainyak mika, Uhpu aru ira atimi an naopan ineig.

⁵² A’a, auwe vai caua, ak ilpu atimi asuptecnaig intas alep! akis atipagki kii an tapanes an namarero aijaua: eka eti apan iran aijaua, eka lep acaiji ra aijaua era apan iran ara.

⁵³ Is wat asan tas iji ehki ehele ra aien, eris imyiisjis emda a ilpu atimi esege im ilpu Farisi, um oop yin, mika yi tas aien va niji itai is ahinag:

⁵⁴ eris lep imyiiris yin ara, um atahaijeg yin par asjiraig tah intas o un, mika eri atijai itai iran vaig.