Lukas 1 - Intas-Etipup Mat u Iesu Kristo 1863 (Aneityum Gospels)

¹ Eris idim ika natimi is ahinag eri asuptecnaig upene nauritai iji eigki inta idim imyiisjis ninivaijec vaig akaija,

² et idivaig eris asaig ehelema a ilpu atimi iji ehki, eris upyi hup ara um ecetai, ja par asuptecnaig intas,

³ va nitai ineigki, kis lep ika ainyak, ak natimi alupas, Diofilus, ki lep asuptecnaig upene ehelum an nitasvitai, kis idim ato upene nitai iji eigki asega ainyak itu acen um imyihum pam an naopan ineig,

⁴ mika an ato aiek, nikavaig, et idim inivaijec nitai iji eigki, eris esege imi euc.

⁵ AN NAOPAN iyehki is wat atimarid an pece Jutaia a Herot, is eteuc natimi ahlap is ethi, nidan Sakaraias, is mapoi Abaija aien: is lep mapoi Eron a ehgan, nidan Elisabed.

⁶ Is atoh nedo urau arau an nuhup o Atua, erus apos upene intas alep asega o Ihova arau, im niji itai is ikni aien, eris eti lep ated rau.

⁷ Ja is ti inhal urau, is eti asvalav a Elisabed; erus mun efatimi arau.

⁸ Is amen aien, um ago nauritai o ilpu atimi ahlap aien an nuhup o Atua, is idivaig ilpu etoan,

⁹ is idivaig nedo o ilpu atimi ahlap, is leh nitai asjaaicnaig vaig o un aien par apan anliin neom ahlap o Ihova, um atnamud nitai auanipin upene.

¹⁰ Eris amen ijo natimi asega is ahinag, um alaigaheni an nuarin-nadiat iyehki eris atnamud nitai auanipin upene iran.

¹¹ Is ehcohos ehelen a nagelo is ethi o Ihova, um aiji an nahaijin nefata uari nitai auanipin upene an matan.

¹² Is wat ecet yin a Sakaraias, is ehioehio inliinmopon aien, um imtitaig.

¹³ Is um ika ehelen a nagelo, Jim imtitaig aiek, ak Sakaraias: eh mun atahaijeg nalaigaheni unyum; etpu apos inhalav atamaig a ehgam Elisabed, napu anvi nidan aiek par ika Joanes:

¹⁴ etpu imyiacitak inliinmopom aiek um cediaig; uhu wit apos yin, erupu imyiacitak yin natimi inyi ahinag:

¹⁵ etpu esjilid aien an nuhup o Ihova, inyi ti umnyi waina aien im kava; uhu wit apos yin, etpu idim amen alupas ehelen a Nesgan Upene:

¹⁶ etpu imyiadumoij pan aien nupu Isreel inyi ahinag ehele Ihova Atua ura:

¹⁷ etpu uhup iran aien, etpu emda inliinmopon aien inyi idivaig Elaija, etpu hedaig inliinmopoi ilpu atmil ura vai ilpu hal ura, im lep inliinmopoi ilpu atimi esjum va narapakau o ilpu atimi upene; etpu ago upene atimi aien par aitgai Natimarid.

¹⁸ Is ika ehele nagelo a Sakaraias, Ekpu ehvato nitai ineigki ainyak? ek mun efatimi ainyak, um lep ahinag inmesese irai ehgak.

¹⁹ Is tas a nagelo, um ika ehelen, Ek Cebriel ainyak, um aiji an nuhup o Atua; eris abrai nyak mika ki tas ehelum ainyak, um asuptecnaig ehelum intas upene iji eigki:

²⁰ napu idim pop aiek; etpu ehka intasvaig, um uhum pan an naopan iyehki etpu yetpam nitai iji eigki, va nimyiisjis nahcil unyum vai intas unyak, uhpu ehneijid an naopan o un.

²¹ Eris aitgai Sakaraias natimi, um imyiali va namen o un anliin neom ahlap is itu iran.

²² Is wat alau ijo aien, is um ehka intasvaig ehele ra: eris ato ara mika et mun ehcohos tah nitai ehelen anliin neom ahlap: is ahpoijaiji ra aien, is pop aien.

²³ Is wat atid nauritai o un aien, is atga o un aien, um apan an neom o un.

²⁴ Is wat ti pan itac nadiat iji ehki, is um opouc a ehgan Elisabed, is amen anliin neom o un aien an mohoc is ikman, um ika,

²⁵ Is ago nedo ineigki vai nyak a Ihova an naopan iyehki is wat alum nyak aien, um atipagki nitai ineig ek ehcamai vaig ainyak an nuhup o atimi.

²⁶ IS wat ti pan itac inmohoc is siks, is abrai Cebriel nagelo o un a Atua, mika yi apan aien an nuarinpece is ethi, nidan Nasared, an pece Calili,

²⁷ ehele natahaig is ethi, is aminjinanlai aien ehele natimi is ethi, nidan Josef, is mapoi Tevit aien; nidan natahaig iyehki Mere.

²⁸ Is han ehelen a nagelo, um ika, Kaiheuc vai euc, na mun ahesmoij aiek, etmu amen ehelum a Ihova: na esjilid aiek irai ilpu takata.

²⁹ Is wat ecet yin aien, is ehioehio inliinmopon aien vai intas o un; is aktaktai aien, um ika, Neveh tas ineigki?

³⁰ Is ika ehelen a nagelo, Jim imtitaig aiek, ak Mere: et mun aiheuc vai euc a Atua:

³¹ napu opouc aiek, um apos inhalav atamaig, um anvi nidan par ika IESU:

³² etpu esjilid aien, uhpu anvi nidan par ika Inhal o un Et esjilid aien: etpu ati imi yin a Ihova Atua dorona o etpon Tevit:

³³ etpu atimarid o ilpu mapoi Jekob aien irai iji mesese; inyi ti lep ti nelcau o un.

³⁴ Is ika ehele nagelo a Mere, Inyi echamecha nitai ineigki, kis eti ato natamaig ainyak?

³⁵ Is tas a nagelo, um ika ehelen, Etpu yetpan iram a Nesgan Upene, etpu ahelmon euc nemda o un Et esjilid aien: uhpu anvi nidan nitai upene iyehki napu apos aiek, par ika Inhal o Atua;

³⁶ et idim opouc a etoam Elisabed irai inhalav atamaig an nefatimi o un: is ti pan itac inmohoc is siks is opouc aien, eris ika is eti asvalav aien:

³⁷ et tup upene vai Atua niji itai asega.

³⁸ Is ika a Mere, Ek idim aheca atahaig o Ihova ainyak; etmu eteuc nitai ineigki ehelek, yi idivaig intas unyum. Is ude yin a nagelo, um atga o un.

³⁹ An naopan iyehki is atidai a Mere, um auroauro, um apan alaig an nuarin-pece is ethi irai lola edoon, an pece Jutaia:

⁴⁰ um apan anliin neom o Sakaraias, um aiheuc vai Elisabed.

⁴¹ Is wat atahaijeg intas aiheuc o Mere a Elisabed, is eliaujai a inhal o un an nipjinetgan; is amen alupas ehele Elisabed a Nesgan Upene:

⁴² is ahlaig ijinies aien, um ika, Na esjilid aiek irai ilpu takata, um lep esjilid inhal unyum:

⁴³ nev edo ineig vai nyak, et mun ham ehelek a risi Natimarid unyak?

⁴⁴ ek wat atahaijeg intas aiheuc unyum ainyak, et mun eliaujai inhal unyak an nipjinetgak va nimyiacitak o un.

⁴⁵ Et mun ahesmoij aien is imyiisjis ninivaijec aien: uhpu ehneijid nitai iji ehki is asaig ehelen a Ihova.

⁴⁶ Is um ika a Mere, EK imyiahpas Ihova an nesgak ainyak,

⁴⁷ et imyiacitak inliinmopok ainyak, vai Atua Natimi imyiatamaig nyak:

⁴⁸ kis wat tup atahaig ainyak, is aiheuc vai naheca o un aien: erupu asan tas upene vai nyak atimi asega, um yetpan irai iji mesese.

⁴⁹ Is ago nedo emda vai nyak Aien et esjilid aien; et idim upene nidan.

⁵⁰ Et aiheuc vai ra aien era imtitaig yin ara, um yetpan irai iji mesese.

⁵¹ Is ago nedo emda an nikman aien; um terimterim irai ilpu atimi iji eigki is ijinies inliinmopura ara irai aktaktai ura.

⁵² Is iknipagki ilpu atimi alupas aien irai dorona ura, jam atijai ra sji eigki eris opoupou ara.

⁵³ Is alayi ilpu atimi ehtele ra niji itai upene aien; jam abraig pan ra eris ikni itai ara, um eti alupai ra itai.

⁵⁴ Is atau imi Isreel naheca o un aien, um imyiehva naiheuc o un,

⁵⁵ vai Ebraham, im lep ilpu mapon asega irai iji mesese, is idivaig is upyi asaig aien ehele ilpu retpoija.

⁵⁶ IS amen a Mere ehelen an mohoc is eseij, ja par apan an neom o un.

⁵⁷ IS yetpam naopan ineig inyi apos inhal o un a Elisabed; is apos inhalav atamaig o un aien.

⁵⁸ Eris ato a ilpu atimi eblaamnem o un im ilpu atimi ehpan iran, nikavaig, is esjilid naiheuc o Ihova vai yin; eris ehrimyiacitak ehelen ara.

⁵⁹ Is wat ti pan itac nadiat is eet, eris asjapicnaig atimi mika eri aperitome irai inhalav; eris anvi nidan ara par ika Sakaraias, nilpun nidai etman.

⁶⁰ Is tas a risin, um ika, O’o; uhpu anvi nidan par ika Joanes.

⁶¹ Eris ika ehelen ara, Er eti anvi nidan ineigki iran tah natimi ehpan iram.

⁶² Eris ahpoijaiji etman ara, mika yi anvi nidan.

⁶³ Is ugni nitai aged iran aien, um aged, um ika, Et idan Joanes. Eris imyiali ara asega.

⁶⁴ Is um auroauro um asalgei nipjineucsen, is um eti pop aien, um tas, um imyiahpas Atua.

⁶⁵ Eris imtitaig atimi asega eris amen ubutpotet ehele ra ara: is apaahni intas va nitai iji eigki irai lola edoon asega an pece Jutaia.

⁶⁶ Eris ikni irai liimopura natimi asega eris atahaijeg ara, um ika, Inyi echamecha inhalav ineigki! Is amen ehelen nikmai Ihova.

⁶⁷ Is amen alupas a Nesgan Upene ehele etman Sakaraias; is upyi tas vaig aien, um ika,

⁶⁸ NAAURINEIG vai Ihova Atua o nupu Isreel; et mun ateghe ilpu atimi o un aien, um imyiatamai ra,

⁶⁹ et mun atijai nepat imyiatamaig caija aien, et mapoi Tevit aien naheca o un;

⁷⁰ et idivaig is upyi asaig aien irai ilpu profeta upene o un, itu acen:

⁷¹ mika yi imyiatamaig caija vai ilpu atimi tak atimi iraija, im lep vai ra asega era amcel vai caija ara;

⁷² um ago nedo aiheuc ineig is upyi asaig aien ehele ilpu retpoija, um lep imyiehya intas-etipup upene o un aien;

⁷³ intas upyi asaig iyehki is asig yi aktit aien ehele etpoija Ebraham,

⁷⁴ mika yi aiheuc vai caija aien, um imyiatamaig caija va atimi tak atimi iraija, mika ti aheca o un akaija, um jim imtitai ra,

⁷⁵ um ago nedo upene, im nedo atoh an nuhup o un, irai iji adiat an numumoh uja.

⁷⁶ Ak inhal unyak, uhpu anvi nidam par ika na profeta o un aiek Et esjilid aien: napu uhup aiek irai Natimarid, par ahped nefalaig vai yin;

⁷⁷ um asuptecnaig intas imyiatamaig caija ehele ilpu atimi o un, va uhpu iknipagki nedo has ura,

⁷⁸ va nedo aiheuc esjilid o Atua uja; va vitai ineigki et mun ateghe caija inlah an nohatag,

⁷⁹ par lah ehele ra era amen an naupat ara, et ahelmon ra inmas, um lep atau iraija an nefalaig eigpa.

⁸⁰ IS alupas inhalav iyehki, um emda inliinmopon; is amen aien irai uari amasacen, um uhum pan naopan iyehki is ehcohos aien ehele nupu Isreel.