Joanes 8 - Intas-Etipup Mat u Iesu Kristo 1863 (Aneityum Gospels)

¹ Is apan a Iesu an nedoon Olivet.

² Is wat lahlah an nuhialeg, is lep apan aien anliin neom ahlap, eris ahtag pan ehelen natimi asega; is ateucse aien, um esege imi ra.

³ Eris imyiapan ehelen intakata is ethi a ilpu atimi esege im ilpu Farisi, eris ecet yin nagovaig ingaijid, um ati yin an nibla atimi,

⁴ um ika ehelen, Ak Natimi esege, et mun ago ingaijid intakata ineigki, eris mun idim ecet yin.

⁵ Is ika a Moses an tas alep o un, uhpu asji ra sji eigki irai hat era ago nedo ineigki ara: na ikha aiek?

⁶ Eris asan tas ineigki ara par oop yin, mika eri asan tas has vai yin. Ja is atpuse a Iesu um ahgesahges an nobohtan an nupsikman.

⁷ Eris wat imyiisjis ara um ahodai yin, is atidaijai aien, um ika ehele ra, Aien et ti ago nedo has aien iramia, etmu upyi hup aien um asji yin an hat.

⁸ Is lep atpuse aien um ahgesahges an nobohtan.

⁹ Eris wat atahaijeg intas ineigki ara, is ehcamai inliinmopura ara, eris alau ijo athiathi ara asega, um atupun irai ilpu atimi tas alep um yetpan irai tup atimi: is amen ache a Iesu, im intakata iyehki an lah.

¹⁰ Is lep atidaijai a Iesu, jam eti ecet tah, intakata iyehki ache, is ika ehelen aien, Ak intakata ineigki, era mun han eda a ilpu atimi atijai itai iram? et mun asuptecnaig nimtan nedo has unyum tah, ka o’o?

¹¹ Is um ika aien, O’o, ak Natimarid. Is um ika ehelen a Iesu, Inki ti asuptecnaig nimtan nedo has unyum ainyak: atga unyum aiek, um jim lep ago nedo has.

¹² Is lep tas ehele ra a Iesu, um ika, Ek itai lah an nobohtan ainyak: aien etpu apitac nyak aien, inyi ti atga an naupat aien, etpu leh nitai lah aien, um umoh.

¹³ Eris um ika ehelen a ilpu Farisi, Na mun asuptecnaig euc aiek; et eti inivaijec intas asuptecnaig euc unyum.

¹⁴ Is tas a Iesu, um ika ehele ra, Ek asuptecnaig nyak ainyak, et inivaijec intas asuptecnaig nyak unyak: ek ato ainyak inuarin ineig kis ahes iran ainyak, im lep napan unyak iran; ja eka eti ato aijaua inuarin ineig kis ahes iran ainyak, im lep napan unyak iran:

¹⁵ eka aktaktai va atimi aijaua et idivaig nedo an nobohtan; ja ek eti auanaktaktai naico vaig tah ainyak:

¹⁶ ja el ek aktaktai va atimi ainyak, et inivaijec naktaktai unyak: ek eti tup echim amen ainyak, ja ainyak im Etmak is abrai nyak aien:

¹⁷ eris lep aged an tas alep unyimia mika, et inivaijec intas asuptecnaig o natimi et ero:

¹⁸ ek asuptecnaig nyak ainyak, et lep asuptecnaig nyak a Etmak is abrai nyak aien.

¹⁹ Eris um ika ehelen ara, Etmam yek eda? Is um ika a Iesu, Eka eti ato nyak aijaua, im lep Etmak: el eka ato nyak aijaua, el eka lep ato Etmak aijaua.

²⁰ Is asan tas iji eigki a Iesu an nesege o un, an nuarin ikni mune iran anliin neom ahlap: ja is eti arop iran tah natimi; is eti fi yetpam naopan o un.

²¹ Is ika ehele ra a Iesu, Ekpu atga unyak ainyak, ja akupu ahilek nyak aijaua, akupu emesmas an nedo has unyimia aijaua: inyi ehka vai caua napanvaig an nuarin ineig ekpu apan iran ainyak.

²² Eris ika a nupu Jutaia, Etpu ispun atgei yin aien, ka o’o? is ika aien, Inyi ehka vai caua napanvaig an nuarin ineig ekpu apan iran ainyak.

²³ Is um ika ehele ra aien, Eka ahes sepamki aijaua; kis ahes jipagko ainyak: eka atimi an nobohtan aijaua; ek eti atimi an nobohtan ainyak:

²⁴ ek mun idim asaig ehelemia ainyak mika, akupu emesmas an nedo has unyimia aijaua: el eka eti imyiisjis ninivaijec aijaua, nikavaig, ek atimi iyehki ainyak, akupu emesmas an nedo has unyimia aijaua.

²⁵ Eris um ika ehelen ara, Aiek di aigki? Is um ika ehele ra a Iesu, Ek tup ethi ache ainyak kis upyi aniv nyak ehelemia ainyak:

²⁶ ek ato niji itai et ahinag ainyak par asaig um ated caua iran: ja aien is abrai nyak aien, et inivaijec aien; ek asuptecnaig ehele atimi an nobohtan ainyak nitai iji eigki kis atahaijeg ehelen ainyak.

²⁷ Eris eti ato ara, nikavaig, is tas ehele ra aien vai Etman.

²⁸ Is um ika ehele ra a Iesu, Aku wit atijai Inhal o natimi aijaua, akupu ato aijaua, nikavaig, et atimi iyehki ainyak, im lep ineig, nikavaig, ek eti ispuk ago tah nitai ainyak; ja ek asaig nitai iji eigki ainyak is esege imtak a Etmak:

²⁹ aien is abrai nyak aien et amen ehelek aien: et eti ude nyak a Etmak; ek ago nitai iji eigki ainyak irai iji adiat et merit vaig aien.

³⁰ Is wat asan tas iji eigki aien, eris asgeig iran natimi is ahinag.

³¹ Is um ika a Iesu ehele nupu Jutaia iji eigki eris eteuc an tas o un ara, El eka apol ipjin an tas unyak aijaua, el eka idim ilpu atimi atahaijeg nyak aijaua;

³² im lep ineig, akupu ato intas inivaijec aijaua, etpu ahiyi caua intas inivaijec.

³³ Eris um ika ehelen ara, Ecra ilpu mapoi Ebraham aijama, ecris idim eti aheca o un tah natimi aijama: na auri aiek par ika, Uhpu ahiyi caua?

³⁴ Is um ika ehele ra a Iesu, Et idim inivaijec ineig ek asaig ehelemia ainyak mika, Aien et ago nedo has aien, et aheca u nedo has aien.

³⁵ Et eti amense an nimnim naheca o un tah irai iji adiat: ja et amense a inhal o un irai iji adiat.

³⁶ El et ahiyi caua a Inhal o Atua, nhpu idim eti lep arore caua.

³⁷ Ek ato ainyak, nikavaig, eka ilpu mapoi Ebraham aijaua; ja eka merit aijaua mika aki atgei nyak, va nitai ineigki, nikavaig, et eti amen anliinmopomia intas unyak.

³⁸ Ek asuptecnaig nitai iji eigki ainyak, kis ecetai ehele Etmak ainyak: ja eka ago nedo ineigki aijaua, akis ecetai ehele etmamia aijaua.

³⁹ Eris tas ara, um ika ehelen, Et idim etmama a Ebraham. Is um ika ehele ra a Iesu, El eka ilpu hal o Ebraham aijaua, el eka ago nedo o Ebraham aijaua:

⁴⁰ ja eka idim ika aijaua aki atgei nyak, natimi asan tas inivaijec ineig ehelemia, kis atahaijeg ehele Atua ainyak: is eti ago nedo ineigki a Ebraham:

⁴¹ eka ago nauritai o etmamia aijaua. Eris um ika ehelen ara, Ecra eti ilpu halav an nefalaig aijama; et idim Etmama a Atua.

⁴² Is um ika ehele ra a Iesu, El et Etmamia a Atua, el et aiyu inliinmopomia aijaua vai nyak: kis ahes ehele Atua ainyak par ham; kis eti tup ispuk ham ainyak, ja is abrai nyak aien.

⁴³ Eka auri aijaua par eti ato intas unyak? va nitai ineigki, nikavaig, et ehka vai caua nahaijegvaig intas unyak.

⁴⁴ Akis ahes ehele etmamia Tiapolo aijaua, eka merit aijaua nagovaig inmerit o etmamia: is atimi atgei atmas aien itu acen um imyihum pam an naopan ineig, et eti apol an nitai inivaijec aien, et idim efaifa aien. Nedo o un ineig par asan tas ahcil: et idim atimi ahcil aien, um lep etma atimi ahcil.

⁴⁵ Ek tas inivaijec ehelemia ainyak, ja eka eti eteuc an tas unyak aijaua.

⁴⁶ Et ehka vaig tah caua par ika ek ago nedo has ainyak. Ek wat asan tas inivaijec ehelemia ainyak, eka auri aijaua par eti eteuc an tas unyak?

⁴⁷ Aien et atimi o Atua aien, et ahaijeg intas o Atua aien: eka eti ahaijeg aijaua, va nitai ineigki, nikavaig, eka eti ilpu atimi o Atua aijaua.

⁴⁸ Eris tas a nupu Jutaia, um ika ehelen, Et inivaijec intas unyima, nikavaig, na upu Samerya aiek, et lep amen ehelum a nagelo has.

⁴⁹ Is um ika a Iesu, Et eti amen ehelek a nagelo has; ek idim eccen vai Etmak ainyak, ja eka amcel vai nyak aijaua.

⁵⁰ Ek eti ahilek nimyiahpas nyak ainyak: ja et ahilek tah et ethi, um aktaktai nyak.

⁵¹ Et idim inivaijec ineig ek asaig ehelemia ainyak mika, El et apol an tas unyak tah natimi, inyi idim eti mas aien.

⁵² Eris um ika ehelen a nupu Jutaia, Ecra idim ato aijama mika, et amen ehelum a nagelo has: is mas a Ebraham, im lep ilpu profeta; ja na ika aiek, El et apol an tas unyak tah natimi, inyi idim eti mas aien: --

⁵³ na esjilid aiek irai etpoija Ebraham is mas aien, ka o’o? eris lep emesmas a ilpu profeta: na ika aiek, aiek di aigki?

⁵⁴ Is um ika a Iesu, El ek imyiahpas nyak ainyak, el et takitai nimyiahpas nyak unyak: aien et imyiahpas nyak aien et Etmak aien; aien aigki eka ika aijaua vai yin, et Atua unyimia aien:

⁵⁵ eka mun eti ato yin aijaua; ja ek ato yin ainyak: el ek ika ainyak, Ek eti ato yin ainyak, el ek atimi ahcil ainyak um idivai caua: ja ek ato yin ainyak, um apol an tas o un:

⁵⁶ is imyiacitak a etpomia Ebraham nalmoivaig nadiat unyak: is almoi aien, um cediaig.

⁵⁷ Eris um ika ehelen a nupu Jutaia, Et eti fifte inmesese iram, is ehka vai euc nalmoi Ebraham vaig.

⁵⁸ Is um ika ehele ra a Iesu, Et idim inivaijec ineig ek asaig ehelemia ainyak mika, an naopan iyehki is pam eti eteuc a Ebraham, EK TUP ETEUC AINYAK.

⁵⁹ Eris arapse vai hat ara mika eri asji yin: ja is atpuh a Iesu, um ahes anliin neom ahlap, um tiblaitibla atimi, um alau ijo, um atga o un.