Joanes 7 - Intas-Etipup Mat u Iesu Kristo 1863 (Aneityum Gospels)

¹ Is wat ti pan itac nitai iji eigki, is atga sjipe a Iesu an pece Calili: is eti merit aien natga jipe vaig an pece Jutaia, va nitai ineig, nikavaig, eris ika a nupu Jutaia eri atgei yin.

² Is mun ubutpotet a nasjapicnaig u nupu Jutaia irai im muricai an naopan iyehki.

³ Eris um ika ehelen a ilpu etoan, Atga unyum aiek, um apan Jutaia, mika eri lep almoi niji auritai iji eigki na ago aiek a ilpu atimi atahaijeg euc:

⁴ et wat merit tah natimi mika eri ato yin atimi asega, et eti ago tah nitai aien um adenaig: el et ago nitai iji eigki aiek, namu ehvai euc aiek ehele atimi.

⁵ Eris idim eti asgeig iran a ilpu etoan.

⁶ Is um ika ehele ra a Iesu, Et mun eti fi yetpam naopan unyak: ja et eteuc naopan unyimia irai iji adiat:

⁷ et ehka va atimi namcel vai caua vaig; ja era amcel vai nyak ara, va nedo unyak, nikavaig, ek acaiji nedo has ura ainyak:

⁸ apan aijaua u nasjapicnaig ineig: inki ti apan ainyak u nasjapicnaig ineigki an naopan ineig; et pam eti fi yetpam naopan unyak.

⁹ Is asan tas ineigki ehele ra aien, ja par amen Calili.

¹⁰ Eris wat apan a ilpu etoan alaig u nasjapicnaig, is lep apitac ra aien, jam ateri natga o un, um eti asaig.

¹¹ Eris ahilek yin u nasjapicnaig a nupu Jutaia, um ika, An yek eda aien?

¹² Eris imyiisjis jipe yin natimi: eris ika nahaiji ra, Et atimi upene aien: ja eris ika nahaiji ra, O’o; et ago nedo efaifa aien va atimi.

¹³ Ja is eti tas emda vai yin tah, eris imtitai upu Jutaia ara.

¹⁴ Is apan a Iesu anliin neom ahlap, an nadiat is ethi juju an nasjapicnaig o atimi, um esege.

¹⁵ Eris imyiali a nupu Jutaia, um ika, Et ato nitasvitai a natimi ineigki vai di, eris eti esege imi yin?

¹⁶ Is tas ehele ra a Iesu, um ika, Et eti ahes ehelek nesege unyak, ja et ahes ehelen is abrai nyak aien.

¹⁷ El et merit tah natimi nimyiaijivaig intas o un, inyi ato aien, kit is ahes ehele Atua nesege unyak, ka ek ispuk tas ainyak.

¹⁸ Aien et ispun tas vai yin aien, et ahilek nimyiahpas yin aien: ja aien et ahilek nimyiahpas yin is abrai yin aien, et inivaijec aien, um atoh nedo o un.

¹⁹ Is alupai caua intas alep a Moses, ja eka idim eti imyiaiji intas alep aijaua. Eka auri aijaua par ika aki atgei nyak?

²⁰ Eris tas natimi, um ika, Et amen ehelum a nagelo has: et ika a di yi atgei euc?

²¹ Is tas a Iesu, um ika ehele ra, Kis ago nauritai is ethi ainyak, ja eka idim imyiali aijaua asega.

²² Is asuptecnaig ehelemia naperitome a Moses; (ja is eti ahes ehele Moses, is ahes ehele ilpu retpoija;) eka aperitome ira atimi aijaua an nadiat atumop.

²³ Er aperitome ira atimi an nadiat atumop, va eri jim auahas intas alep o Moses; eka edemda vai nyak aijaua va nedo unyak, ka o’o, nikavaig, kis ago cehcehe asega natimi is ethi ainyak an nadiat atumop?

²⁴ Jim aktaktai va nesganimta atimi ache aijaua, etmu inivaijec naktaktai unyimia vai ra.

²⁵ Eris um ika nahaiji nupu Jerusalem, Aien aigki era ika ara eri atgei yin, ka o’o?

²⁶ et idim tas emda aien, ja era eti acaiji yin ara: era ato inivaijec a ilpu atimi alupas mika kit idim Kristo ineigki, ka o’o?

²⁷ inta ato akaija inuarin ineig is ahes iran a natimi ineigki: ja et wit ham a Kristo, inyi ti ato tah natimi inuarin ineig etpu ahes iran aien.

²⁸ Is efehtas a Iesu anliin neom ahlap an nesege o un, um ika, Eka ato nyak aijaua, im lep inuarin ineig kis ahes iran ainyak: kis eti tup ispuk ham ainyak, et inivaijec aien is abrai nyak aien, ja eka eti ato yin aijaua:

²⁹ ek idim ato yin ainyak; kis ahes ehelen ainyak, is abrai nyak aien.

³⁰ Eris merit ara narop iran vaig: ja is eti arahpan vai yin tah natimi, is eti fi yetpam naopan o un.

³¹ Eris lep asgeig iran natimi is ahinag, eris tas ara, um ika, Et wit ham a Kristo, inyi ti ago niji auritai ehka aien inyi esjilid irai itai iji eigki et ago a natimi ineigki.

³² Eris atahaijeg a ilpu Farisi, nikavaig, eris imyiisjis nitai iji eigki vai yin natimi; eris abrai ilpu aheca ura a ilpu Farisi im ilpu atimi ahlap esjilid mika eri arop iran ara.

³³ Is um ika ehele ra a Iesu, Etpu idim ipjidipjid namen unyak ehelemia, ekpu apan ehelen ainyak is abrai nyak aien:

³⁴ akupu ahilek nyak aijaua, jam eti ecet nyak: inyi ehka vai caua napanvaig an nuarin ineig ek amen iran ainyak.

³⁵ Eris tas jipe a nupu Jutaia, um ika, Etpu apan aien eda, mika inti eti lep ecet yin akaija? etpu apan aien ehele atimi era terimterim ara irai nupu Crisi, um esege imi nupu Crisi, ka o’o?

³⁶ neveh tas ineigki et mun asaig aien mika, Akupu ahilek nyak aijaua, jam eti ecet nyak? im lep ineig, Et ehka vai caua napanvaig an nuarin ineig ek amen iran ainyak?

³⁷ An nadiat apitac, nadiat esjilid an nasjapicnaig ura, is um atidai a Iesu um efehtas, um ika, El et ahvig wai tah natimi, etmu ham ehelek aien um umwig:

³⁸ aien et asgeig irak aien, etpu ahlau ohua alupas inwai umoh anliinmopon, et idivaig eris aged.

³⁹ (Is asan tas ineigki aien va Nesgan Upene, aien aigki erupu leh yin a ilpu atimi asgeig iran: eris pam eti alupa atimi Nesgan Upene an naopan iyehki; va nitai ineigki, nikavaig, eris eti fi ehvaig natimi alupas o Iesu.)

⁴⁰ Eris wat atahaijeg intas ineigki ara, eris ika natimi is ahinag, Et inivaijec ineig, nikavaig, et aprofeta iyehki aien.

⁴¹ Eris lep ika nahaiji ra, Et Kristo aien. Ja eris ika nahaiji ra, Et eti ahes Calili a Kristo:

⁴² eris aged, um ika, Etpu ahes ehele Tevit a Kristo, im lep an nuarin-pece Bedleem is amen iran a Tevit.

⁴³ Eris imyiisjis jipe yin natimi.

⁴⁴ Eris merit nahaiji ra narop iran vaig; ja is eti arahpan vai yin tah natimi.

⁴⁵ Eris lep apan ehele ilpu atimi ahlap esjilid im ilpu Farisi a ilpu aheca ura; eris um ika ehele ra ara, Eka auri aijaua par eti imyiapam yin?

⁴⁶ Eris um ika a ilpu aheca, Is idim eti tas tah natimi et idivaig natimi ineigki.

⁴⁷ Eris um ika ehele ra a ilpu Farisi, Eka mun idim lep ahnag aijaua:

⁴⁸ is idim eti asgeig iran tah ilpu atimi alupas, ka tah ilpu Farisi:

⁴⁹ ja era ilpu atimi er ika eri auahas ra natimi iji eigki, era eti ato intas alep ara.

⁵⁰ Is um ika ehele ra a Nikotimus, (aien aigki is han aien ehele Iesu an nepeig, is atimi is ethi ira ra aien,)

⁵¹ Nedo an tas alep uja ineigki, nikavaig, inta upyi hup akaija um atahaijeg intas o atimi um ato nedo ura, ja par asuptecnaig nimtan.

⁵² Eris tas ara, um ika ehelen, Nai lep upu Calili aiek, ka o’o? ahilek, um almoi: et eti ahes Calili tah naprofeta.

⁵³ Eris apan irai imnim ura natimi asega.