Joanes 6 - Intas-Etipup Mat u Iesu Kristo 1863 (Aneityum Gospels)

¹ IS wat ti pan itac nitai iji eigki, is algauwaig an jop Calili, tak idan Taibiryas.

² Eris wat almoi niji auritai ehka o un iji eigki is ago aien irai ilpu atimi emehe natimi is ahinag acen, eris apitac yin ara.

³ Is aridjai a Iesu an nedoon, um ateuc, im lep ilpu atimi atahaijeg yin.

⁴ Is um ubutpotet u napaska, nasjapicnaig o nupu Jutaia yehki.

⁵ Is eas pan a Iesu, um alum atimi is ahinag nahtag pan vaig ehelen, is ika ehele Filipus aien, Inti auarimta areto eda akaija par alayi ra sji eigki?

⁶ Is asan tas ineigki aien par ato inliinmopon; is idim ato aien nitai ineig etpu ago aien.

⁷ Is um ika a Filipus, El eh auarimta areto irai mune tu huntret um alaa ra, inyi ti apaahni ira ra asega nuarin tintin ache.

⁸ Is ika ehelen a natimi atahaijeg yin is ethi, Antrius, etoai Saimona Pitrus,

⁹ Et amen nareto barle et faiv, im lep inhaklin numu et ero, ehele intakuras et ethi igcaki: ja et idim eti elpat iji eigki nalaa atimi et ahinag vaig.

¹⁰ Is um ika a Iesu, Akumu abra atimi aijaua mika eri ateucse ara. Is ahinag nefelelicai an nuarin iyehki. Eris ateucse a ilpu atamaig, eris idivaig faiv dausant ara.

¹¹ Is leh nareto a Iesu, um naaurineig iran, ja par alupai ilpu atimi atahaijeg yin, eris alaa atimi ateucse ilpu atimi atahaijeg yin; is lep ucce a numu; eris hegaig ara, um eti ahtahni.

¹² Eris wat gaije ara, is ika ehele ilpu atimi atahaijeg yin aien, Asjapicnaig nuari itai hegaig aijaua, va yi jim has tah.

¹³ Eris wat hag ehni natimi, eris asjapicnaig ara nuari areto is aled ira areto barle is faiv iji ehki, um atohoaig irai cat is twelv, is um ohua.

¹⁴ Eris wat almoi nauritai ehka ineig is ago a Iesu natimi iji ehki, eris ika ara, Et inivaijec ineig, nikavaig, et aprofeta iyehki aien eris ika vai yin etpu ham aien an nobohtan.

¹⁵ Is wat ato a Iesu, nikavaig, eris ika ara eri apan um asjirai yin um ati yin natimarid ura, is atga o un aien, um echim apan an nedoon.

¹⁶ Is wat jupura, eris ehcohos pok a ilpu atimi atahaijeg yin,

¹⁷ um aridjai an nelcau, nalaig apan Kaperneum. Is wat epeig, is um eti apan ehele ra a Iesu.

¹⁸ Is um iji nimtinjop alupas um elgei namilvai.

¹⁹ Eris wat aheled pan ara is dri ka for mail, ja par ecet Iesu natgavaig an jop, um ubutpotet pan u nelcau: eris um imtitaig ara.

²⁰ Is um ika ehele ra aien, Ainyak aigki; jim imtitaig aijaua.

²¹ Eris atijai yin an nelcau ara um imyiacitak: is um auroauro nelcau um apahai an pece iyehki eris apan iran ara.

²² Is wat lahlah an tak apnyin, eris aiji an nahaijin jop natimi is ahinag, jam eti ecetai tah nalvelcau eahki, nalvelcau ineig ache eris aheled iran a ilpu atimi atahaijeg yin, eris lep ato ara, nikavaig, is eti ahced ilpu atimi atahaijeg yin a Iesu an nalvelcau ura, eris echim apan a ilpu atimi atahaijeg yin ache;

²³ (ja eris ahes Taibiryas niji alvelcau is eche ubutpotet u nuarin iyehki is naaurineig iran Natimarid, ja eris par hag ara:)

²⁴ eris wat eti ecet Iesu eahki ara, im lep ilpu atimi atahaijeg yin, eris lep ahlaujai irai elcau ara, um apahai Kaperneum, um ahilek Iesu.

²⁵ Eris wat ecet yin ara an nahaijin jop, eris um ika ehelen ara, Ak Natimi esege, nai ham aiek igcaki an nahopan?

²⁶ Is tas a Iesu, um ika ehele ra, Et idim inivaijec ineig ek asaig ehelemia ainyak mika, Eka eti ahilek nyak aijaua va niji auritai ehka iji eigki akis ecetai aijaua, jai va areto iji eigki akis hegaig aijaua, um gaije iran:

²⁷ akumu jim auritai aijaua va nitai caig ineig et eti laulau um has, ja va nitai caig ineig inyi amen an nitai umoh iran inyi ti lep ti, etpu alaamia a Inhal o natimi: is idim ati nitai asjaaicnaig vai yin a Atua Etman.

²⁸ Eris um ika ehelen ara, Ecri ago inhe aijama, va ecrupu ago nauritai o Atua vaig?

²⁹ Is tas a Iesu, um ika ehele ra, Nauritai o Atua ineigki, mika aki asgeig iran aijaua is abrai yin aien.

³⁰ Eris lep ika ehelen ara, Nev auritai ehka ineig na ago aiek, mika ecri almoi aijama, um imyiisjis ninivaijec euc? na ago inhe aiek?

³¹ eris hegaig manna an namasacen a ilpu retpoija; et idivaig eris aged, um ika, Is alaa ra nitai caig ineig aien is ahes an nohatag incara.

³² Is um ika ehele ra a Iesu, Et idim inivaijec ineig ek asaig ehelemia ainyak mika, Is eti alaamia nitai caig ineig is ahes an nohatag a Moses; ja et alaamia nitai caig inivaijec ineig et ahes an nohatag a Etmak.

³³ Nitai caig ineig et ahes ehele Atua, aien aigki is ahes an nohatag aien um asuol, um alupa atimi an nobohtan nitai umoh iran.

³⁴ Eris um ika ehelen ara, Ak Natimarid, alaama nitai caig ineigki aiek irai iji adiat.

³⁵ Is um ika ehele ra a Iesu, Ek itai caig umoh ainyak: aien et ham ehelek aien, inyi ti lep ehtele yin aien; aien et asgeig irak aien, inyi ti lep ahvig tah nitai aien:

³⁶ ja ek mun asaig ehelemia ainyak mika, Akis ecet nyak aijaua, jam eti asgeig irak:

³⁷ erupu ahtag pam ehelek ara asega is alupai nyak ra a Etmak; aien et ham ehelek aien, inki idim eti acaiji yin ainyak:

³⁸ kis eti ahes an nohatag ainyak um asuol, mika ki imyiaiji intas unyak, jam imyiaiji intas o un is abrai nyak aien:

³⁹ intas alep o Etmak ineigki is abrai nyak aien, mika ki ti eipujaig tah ra ainyak is alupai nyak ra aien, jam imyiatidai ra an nadiat apitac:

⁴⁰ intas alep o un ineigki is abrai nyak aien, mika eri leh nitai umoh iran ineig inyi ti lep ti ara asega, era alum Inhal o Atua ara, um asgeig iran: ekpu imyiatidai ra ainyak an nadiat apitac.

⁴¹ Eris tas upoupo vai yin a nupu Jutaia va nitai ineigki, is ika aien, Ek itai caig ineig ainyak is ahes an nohatag um asuol.

⁴² Eris um ika ara, Iesu ineigki, inhal o Josef, ka o’o? ecra ato etman im risin aijama: et echamecha par ika aien, Kis ahes an nohatag ainyak um asuol?

⁴³ Is lep tas a Iesu, um ika ehele ra, Akumu jim tas upoupo jipe aijaua.

⁴⁴ Et ehka vaig tah natimi intup hamvaig ehelek, el et eti ahiaig pam yin a Etmak is abrai nyak aien: ja ekpu imyiatidai yin ainyak an nadiat apitac.

⁴⁵ Eris aged a ilpu profeta, um ika, “Etpu esege imi ra asega a Atua.” Erupu ahtag pam ehelek ara asega, era atahaijeg ara, um leh nesege o Etmak.

⁴⁶ Ja is idim eti ecet Etmak tah natimi, aien ache is ahes ehele Atua aien, is ecet Etmak aien.

⁴⁷ Et idim inivaijec ineig ek asaig ehelemia ainyak mika, Aien et asgeig irak aien, etpu leh nitai umoh iran ineig aien inyi ti lep ti.

⁴⁸ Ek itai caig umoh ineigki ainyak.

⁴⁹ Eris hegaig manna an namasacen a ilpu retpomia, ja eris emesmas ara.

⁵⁰ Nitai caig is ahes an nohatag um asuol ineigki, eri eti emesmas a ilpu atimi caig.

⁵¹ Ek itai caig umoh ainyak, is ahes an nohatag um asuol: aien et caig nitai caig ineigki aien, inyi umoh aien irai iji mesese: nitai caig ineigki ekpu alaa atimi ainyak nohuk, ekpu ahtai nohuk ainyak mika eri umumoh natimi an nobohtan.

⁵² Eris imyiisjis jipe ira ra a nupu Jutaia, um ika, Etpu alaaija nohun a natimi ineigki um uauo, mika tupu caig akaija?

⁵³ Is um ika ehele ra a Iesu, Et idim inivaijec ineig ek asaig ehelemia ainyak mika, El eka eti caig nohui Inhal o natimi aijaua, um umnyi inja iran, aki eti umumoh aijaua.

⁵⁴ Aien et caig nohuk aien, um umnyi inja irak, et o un nitai umoh iran ineig inyi ti lep ti; ekpu imyiatidai yin ainyak an nadiat apitac.

⁵⁵ Et idim itai caig nohuk, um lep itai umnyi inja irak.

⁵⁶ Aien et caig nohuk aien, um umnyi inja irak, et amen ehelek aien, um lep amen ehelen ainyak.

⁵⁷ Et idivaig is abrai nyak a Etmak umoh, ek lep umoh ainyak vai Etmak: et um ucco aien et caig nohuk aien, etpu umoh aien vai nyak.

⁵⁸ Nitai caig is ahes an nohatag um asuol ineigki: jam eti idivaig manna iyehki eris caig a ilpu retpomia, ja eris emesmas ara: aien et caig nitai caig ineigki aien, etpu umoh aien irai iji mesese.

⁵⁹ Is asan tas iji eigki aien anliin neom alaigaheni, an nesege o un Kaperneum.

⁶⁰ Eris wat atahaijeg intas ineigki ara, eris ika a ilpu atimi atahaijeg yin is ahinag, Et ehka intas ineigki; inyi emda a di par leh?

⁶¹ Is wat ispun ato a Iesu, nikavaig, eris tas upoupo vai intas ineigki a ilpu atimi atahaijeg yin, is um ika ehele ra aien, Eka edemda aijaua vai intas ineigki, ka o’o?

⁶² Akupu ehvecet Inhal o natimi aijaua naridjaivaig an nuarin iyehki is upyi hup aien um amen iran?

⁶³ Et imyiatamumoh nohu atimi nesgan; et auatialidi nohu atimi: et esgan intas ineig ek asaig ehelemia ainyak, um itai imyiatamumoh caua.

⁶⁴ Ja et eteuc nahaijimia era eti imyiisjis ninivaijec ara. -- Is wat pam eti eteuc nobohtan ineigki, is ato ra a Iesu erupu imyiisjis nahcil ara, im lep yin etpu aniv yin aien.

⁶⁵ Is um ika aien, Ek mun idim asaig ehelemia ainyak mika, et ehka vaig tah natimi intup hamvaig ehelek, el et eti alupai yin nemda a Etmak.

⁶⁶ Eris adumoij a ilpu atimi atahaijeg yin is ahinag an naopan iyehki, um eti lep ahced yin.

⁶⁷ Is um ika a Iesu ehele natimi is twelv, Eka lep merit aijaua nadumoijvaig, ka o’o?

⁶⁸ Is um ika ehelen a Saimona Pitrus, Ak Natimarid, ecrupu apan ehele di aijama? et amen ehelum intas va nitai umoh iran ineig inyi ti lep ti:

⁶⁹ ecra imyiisjis ninivaijec aijama um ato, nikavaig, nai Kristo aiek, Inhal o Atua umoh.

⁷⁰ Is um ika ehele ra a Iesu, Kis ehtai caua ainyak, eka twelv aijaua; ja et idivai tiapolo tah et ethi iramia.

⁷¹ Is tas vai Jutas nupu Karyot aien, inhal o Saimona: aien aigki, is ika aien etpu aniv yin, is lep ethi aien ira atimi is twelv.