Joanes 5 - Intas-Etipup Mat u Iesu Kristo 1863 (Aneityum Gospels)

¹ Is wat ti pan itac nitai iji eigki, eris asjapicnaig a nupu Jutaia; is apan Jerusalem a Iesu.

² Is eteuc netpen Jerusalem ubutpotet u neucse nirahed u siip, nidan Hibru Bedesta, is faiv naiyu o un.

³ Eris asjeuc ithan naiyu a ilpu atimi emehe is ahinag, ilpu atimi aupat nesganimtara, im ilpu atimi atga adjo, im ilpu atimi urauo, eris aitgaig nahcatina u inwai ara an tah naopan.

⁴ Is asuol an netpen a nagelo an tah naopan um elucai an wai: aien is upyi hup aien um asuol, is wat ahcatina inwai, is edoaijaig iran nemehe o un.

⁵ Is amen eahki natimi is ethi, is emehe aien irai mesese is dirte eet.

⁶ Is wat alum yin a Iesu nasjeucvaig, um ato, nikavaig, is emehe aien itu acen, is um ika ehelen aien, Nai merit aiek incehcehevaig, ka o’o?

⁷ Is um ika ehelen a natimi emehe, Ak natimi alupas, et eti amen ehelek tah natimi par atise nyak an netpen, an nahcatina u inwai: ek wat apan ainyak, et uhup irak tah um asuol.

⁸ Is um ika ehelen a Iesu, Atidai aiek, um leh nitai ahled unyum, um atga unyum.

⁹ Is um auroauro um cehcehe natimi iyehki, um leh nitai ahled o un, um atga o un: is idim adiat atumop iyehki.

¹⁰ Eris um ika a nupu Jutaia ehele natimi iyehki eris ago cehcehe yin, Nadiat atumop ineigki: et itaup naposvaig nitai ahled unyum.

¹¹ Is um ika ehele ra aien, Aien is ago cehcehe nyak aien, is ika ehelek aien, Leh nitai ahled unyum aiek, um atga unyum.

¹² Eris ahodai yin ara, um ika, Natimi iyehki di, is ika ehelum aien, Leh nitai ahled unyum aiek, um atga unyum?

¹³ Ja is eti ato yin a natimi iyehki is ago cehcehe yin: is um eklim tup tiblaitibla atimi eahki a Iesu um atga o un.

¹⁴ Is wat ti pan itac nitai iji eigki, is ecet yin a Iesu anliin neom ahlap, um ika, Na mun idim cehcehe aiek: jam jim lep ago nedo has aiek, va yi jim lep yetpam iram tah nitai has inyi esjilid iran yehki.

¹⁵ Is atga o un a natimi iyehki, um asuptecnaig ehele nupu Jutaia, um ika, Iesu iyehki is ago cehcehe nyak aien.

¹⁶ Eris atmas vai Iesu a nupu Jutaia, um tas jipe mika eri atgei yin, va nedo o un, nikavaig, is ago nitai iji eigki aien an nadiat atumop.

¹⁷ Is um ika ehele ra a Iesu, Is auritai a Etmak um imyihum pam naopan ineig, ek lep auritai ainyak.

¹⁸ Eris tas emda jipe a nupu Jutaia mika eri atgei yin, va nedo o un, nikavaig, is auahas nadiat atumop aien, is lep ika aien, Et Etmak a Atua, um ika is apa vai Atua aien.

¹⁹ Is tas a Iesu, um ika ehele ra, Et idim inivaijec ineig ek asaig ehelemia ainyak mika, Et ehka vai Inhal o Atua intup ispun ago tah nitai vaig, nitai iji eigki ache, et alum Etman aien nagovaig: nitai iji eigki asega et ago aien, et lep ago a Inhal o un.

²⁰ Et aiyu inliinmopoi Etmak vai Inhal o un, et ehvaig ehelen aien niji itai asega et ago aien: etpu lep ehvaig ehelen aien niji auritai inyi esjilid iran ji eigki, mika aki imyiali aijaua.

²¹ Et idim imyiatidai ilpu atimi emesmas a Etmak, um imyiatamumoh ra; et um ucco et imyiatamumoh ra sji eigki a Inhal o un et merit vai ra aien.

²² Et eti asuptecnaig nimtan im intah natimi a Etmak, ja is ati Inhal o un aien mika yi asuptecnaig nimtan imi ra asega aien,

²³ mika eri eccen vai Inhal o un natimi asega, et idivaig era eccen vai Etmak ara. Aien et eti eccen vai Inhal o un aien, et eti eccen aien vai Etman is abrai yin aien.

²⁴ Et idim inivaijec ineig ek asaig ehelemia ainyak mika, Aien et atahaijeg intas unyak aien, um asgeig iran is abrai nyak aien, et leh nitai umoh iran ineig aien inyi ti lep ti, inyi ti lep leh neru va nedo has o un aien; is aha vai inmas aien um leh nitai umoh iran.

²⁵ Et idim inivaijec ineig ek asaig ehelemia ainyak mika, Etpu yetpam naopan iyehki, et mun idim ham, eru wit atahaijeg nohrai Inhal o Atua a ilpu atimi emesmas: erupu umumoh ara era atahaijeg ara.

²⁶ Et idim amen nitai umoh iran ehele Etmak; et um ucco et alupai Inhal o un nitai umoh iran aien, mika yi amen ehelen;

²⁷ is lep ati yin aien mika yi asuptecnaig nimtan imi atimi aien, va nitai ineigki, nikavaig, et Hal o natimi aien.

²⁸ Jim imyiali nitai ineigki aijaua: va nitai ineigki, nikavaig, etpu yetpam naopan iyehki, eru wit atahaijeg nohran ara asega era amen irai ehpaiitai ara,

²⁹ um atidai; erupu anusjai a ilpu atimi upene, um leh nitai umoh iran; ja erupu anusjai a ilpu atimi auatatimi, um leh nimtan nedo has ura.

³⁰ Et ehka vai nyak intup ispuk agovaig tah nitai: ek idim atahaijeg ainyak, et um ucco ek lep asuptecnaig nimtan ainyak: et atoh intas asuptecnaig unyak; ek eti imyiaiji intas unyak ainyak, jai intas o Etmak is abrai nyak aien.

³¹ El ek echim asuptecnaig nyak ainyak, el et eti inivaijec nasuptecnaig unyak.

³² Et asuptecnaig nyak intak atimi; ek ato ainyak mika et inivaijec intas o un vai nyak.

³³ Akis abraig pan atimi ehele Joanes aijaua, is asuptecnaig intas inivaijec aien.

³⁴ Ja ek eti ika ainyak eri asuptecnaig nyak atimi: ja ek asaig nitai iji eigki ainyak, va uhpu imyiatamaig caua vaig.

³⁵ Is cop alahala aien, is lah um ememina: akis imyiacitak ipjidipjid aijaua vai inlah o un.

³⁶ Ja et eteuc nasuptecnaig nyak et esjilid irai Joanes: nauritai iji eigki is asaig ehelek a Etmak mika ki ago ehni ainyak, ek ago nauritai iji eigki ainyak par asuptecnaig nyak, mika is abrai nyak a Etmak.

³⁷ Is abrai nyak a Etmak, um lep asuptecnaig nyak. Akis eti atahaijeg nohran aijaua an tah naopan, um eti almoi nehcohos o un.

³⁸ Et eti amen anliinmopomia intas o un: eka eti eteuc an tas o un aijaua is abrai yin aien.

³⁹ Eka ahilek an tas eris aged aijaua; eka aktaktai aijaua mika aki leh iran nitai umoh iran ineig inyi ti lep ti: et idim asuptecnaig nyak intas ineigki.

⁴⁰ Ja eka esjum aijaua nahtag pam vaig ehelek, par leh nitai umoh iran.

⁴¹ Ek eti leh nimyiahpas nyak o atimi ainyak.

⁴² Ek idim ato caua ainyak, mika et eti aiyu inliinmopomia aijaua vai Atua.

⁴³ Ek ham ainyak an nidai Etmak, ja eka eti leh nyak aijaua: el et ham intak atimi an nidan ache, akupu leh yin aijaua.

⁴⁴ Et ehka vai caua nimyiisjis ninivaijec vaig, eka imyiahpas jipe caua aijaua, jam eti ahilek nimyiahpas ineig et ahes ehele Atua ineig et ethi ache aien.

⁴⁵ Jim ika aijaua ekpu ahiyi caua ehele Etmak ainyak: et idim ahiyi caua a Moses, aien aigki eka asgeig iran aijaua.

⁴⁶ Al ekis eteuc an tas o Moses aijaua, el eka lep eteuc an tas unyak aijaua: is aged intas vai nyak aien.

⁴⁷ El eka eti eteuc aijaua an tas ineig is aged aien, akupu eteuc an tas unyak aijaua um uauo?