Joanes 4 - Intas-Etipup Mat u Iesu Kristo 1863 (Aneityum Gospels)

¹ Is wat ato a Natimarid, nikavaig, eris atahaijeg a ilpu Farisi mika is leucse ilpu atimi atahaijeg yin is ahinag a Iesu um baptiso ira ra, jam leucse eti elpat a Joanes,

² (ja is eti baptiso ira atimi a Iesu, ilpu atimi atahaijeg yin ache,)

³ is ahes Jutaia aien, um atga o un, um lep apan Calili.

⁴ Is ika aien yi ahced an pece Samerya.

⁵ Is apan aien an nuarin-pece is ethi Samerya nidan Saikar, ubutpotet u nuarin nobohtan iyehki is alupai Josef inhal o un a Jekob.

⁶ Is eteuc eahki nehpan wai u Jekob. Is esvi Iesu natgavaig, is um ateuc aien u inwai iyehki: is adiatdiat.

⁷ Is apan a intakata Samerya is ethi alaig athun wai: is um ika ehelen a Iesu, Alumak tah inwai aiek.

⁸ (Eris mun apan a ilpu atimi atahaijeg yin an nuarin-pece mika eri auanimtan nitai caig.)

⁹ Is um ika ehelen a intakata Samerya, Na auri aiek par ugni nyak vai inwai, na upu Jutaia aiek, ja ek takata Samerya ainyak? -- era eti ahum jipe a nupu Jutaia im nupu Samerya.

¹⁰ Is tas a Iesu, um ika ehelen, El et ato nitai tup ahtai o Atua aiek, im lep yin et ika ehelum aien, Alumak tah inwai aiek; el et ugni yin aiek, el et par alumam inwai umoh aien.

¹¹ Is um ika ehelen a intakata iyehki, Ak natimi alupas, eh ti nitai athun wai unyum, et lep ubou nehpan wai: napu leh inwai umoh ineigki aiek eda?

¹² na esjilid aiek irai Jekob etmaija, ka o’o? is alupai cama nehpan wai ineigki aien, is umwig iran aien, im ilpu hal o un, im kurimatau o un.

¹³ Is tas ehelen a Iesu, um ika, Aien inyi umnyi inwai ineigki aien, etpu lep ahvig wai aien:

¹⁴ ja aien inyi umnyi inwai ineig aien ekpu aluman ainyak, inyi ti lep ahvig wai aien irai iji mesese; inwai ineigki ekpu aluman ainyak inyi imtanwai anliinmopon, um ahlau ohua sjai nitai umoh iran inyi ti lep ti.

¹⁵ Is um ika ehelen a intakata iyehki, Ak natimi alupas, alumak inwai ineigki aiek, mika ki ti lep ahvig wai ainyak, um eti lep ham igcaki par athun wai.

¹⁶ Is um ika ehelen a Iesu, Apan aiek, um ahlaig vai natamnyu unyum, um lep apam igcaki.

¹⁷ Is tas a intakata iyehki, um ika, Et ti natamnyu unyak. Is ika ehelen a Iesu, Et inivaijec intas unyum, nikavaig, Et ti natamnyu unyak:

¹⁸ is ikman ilpu atamnyu unyum aiek; aien et amen ehelum aien an naopan ineig, et eti atamnyu unyum aien: na mun asan tas inivaijec aiek.

¹⁹ Is um ika ehelen a intakata iyehki, Ak natimi alupas, ek ato ainyak, nikavaig, na aprofeta aiek:

²⁰ eris alaigaheni an nedoon ineigki a ilpu retpoma; ja eka ika aijaua, eri han alaigaheni Jerusalem ache atimi.

²¹ Is um ika ehelen a Iesu, Ak intakata ineigki, namu eteuc an tas unyak aiek, nikavaig, etpu yetpam naopan iyehki, aku wit eti alaigaheni vai Etmak aijaua an nedoon ineigki, um ucce Jerusalem.

²² Eka eti ato nitai ineig aijaua eka alaigaheni vaig aijaua: ecra ato nitai ineig aijama ecra alaigaheni vaig aijama; et ahes ehele nupu Jutaia nitai imyiatamaig atimi.

²³ Ja etpu yetpam naopan iyehki, et mun idim ham, eru wit alaigaheni anliinmopura um inivaijec vai Etmak a ilpu atimi alaigaheni inivaijec; et merit a Etmak mika yi ucce nedo o ilpu atimi alaigaheni vai yin.

²⁴ Et Esgan a Atua: eris idim ika eri alaigaheni vai yin an nesgara um inivaijec a ilpu atimi alaigaheni vai yin.

²⁵ Is um ika ehelen a intakata iyehki, Ek ato ainyak, nikavaig, etpu yetpam a Mesia, er anvi nidan par ika Kristo: et wit ham aien, etpu asuptecnaig ehelema aien niji itai asega.

²⁶ Is um ika ehelen a Iesu, Ainyak um aigki ek tas ehelum ainyak.

²⁷ Is wat tas aien, eris um han ehelen a ilpu atimi atahaijeg yin, um imyiali nedo o un, nikavaig, is tas ehele intakata aien: ja is eti ika tah natimi, Nai merit vanhe aiek? ka, Na auri aiek pah tas ehelen?

²⁸ Is ude nipjinitai o un a intakata iyehki um atga o un, um apan an nuarin-pece o un, um ika ehele atimi,

²⁹ Apan aijaua, um alum natimi et ethi, et mun asuptecnaig ehelek aien niji itai asega kis mun ago ainyak: kit Kristo neigki?

³⁰ Eris ahes an nuarin-pece ura ara, um apan ehelen.

³¹ Eris ugni yin a ilpu atimi atahaijeg yin, um ika, Ak Natimi esege, namu hag aiek.

³² Ja is um ika ehele ra aien, Et eteuc nitai caig unyak ainyak, ja eka eti ato aijaua.

³³ Eris um tas jipe a ilpu atimi atahaijeg yin, um ika, Et mun alaan nitai caig tah natimi, ka o’o?

³⁴ Is um ika ehele ra a Iesu, Et itai caig unyak ineigki, nimyiaijivaig intas o un is abrai nyak aien, um lep ago ehni nauritai o un.

³⁵ Eka idim ika aijaua, Et wit ti pan itac inmohoc inyi for, etpu yetpam naopan asjapicnaig nohoai itai; ja ek asaig ehelemia ainyak mika, Akumu eas pan irai esgaiimtamia aijaua, um alum eseian; et metto nohoai itai iran an naopan ineig.

³⁶ Aien et asjapicnaig nohoai itai aien, et leh nimtan aien, um asjapicnaig nohoai itai va nitai umoh iran ineig inyi ti lep ti: mika eri ehrimyiacitak a ilpu atimi ahapol im ilpu atimi asjapicnaig nohoai itai.

³⁷ Et idim inivaijec intas ineigki, nikavaig, Et ahapol natimi et ethi, ja etpu asjapicnaig intak atimi.

³⁸ Kis abrai caua ainyak mika aki asjapicnaig nohoai itai aijaua an nuarin ineig akis eti auritai iran aijaua: eris auritai iran intak atimi, ja eka mun yetpan irai auritai ura aijaua.

³⁹ Eris asgeig iran a nupu Samerya is ahinag an nuarin-pece iyehki vai intas o intakata iyehki, is ika aien, Et mun asuptecnaig ehelek aien niji itai asega kis ago ainyak.

⁴⁰ Eris yetpan ehelen a nupu Samerya, um ugni yin mika yi amen ehele ra aien: is amen aien eahki an nadiat is ero.

⁴¹ Eris lep imyiisjis ninivaijec natimi is ahinag vai intas o un ehele ra;

⁴² um ika ehele intakata iyehki, Ecra idim imyiisjis ninivaijec aijama, ja eti vai intas unyum: ecra mun idim atahaijeg intas o un aijama, um ato, nikavaig, et idim Kristo aien, Natimi imyiatamaig nup urai iji pece asega.

⁴³ Is wat ti pan itac nadiat is ero, is ahes eahki aien um atga o un, um apan Calili.

⁴⁴ Is idim ika a Iesu, Era eti imyiahpas tah naprofeta a nup uran pece o un.

⁴⁵ Is wat yetpan Calili aien, eris leh yin a nupu Calili, eris ecetai niji itai asega is ago aien Jerusalem u nasjapicnaig: eris lep apan u nasjapicnaig ara.

⁴⁶ Is lep apan Kena a Iesu an pece Calili, eahki is ago waina an wai aien. Is eteuc natimi alupas is ethi, is emehe inhalav atamaig o un Kaperneum.

⁴⁷ Is wat atahaijeg aien, nikavaig, is ahes Jutaia a Iesu um apan Calili, is apan ehelen aien, um ugni yin mika yi apan aien, um ago cehcehe inhal o un: is ubutpotet o unmas o un aien.

⁴⁸ Is um ika ehelen a Iesu, El eka eti almoi niji auritai ehka aijaua im niji itai imyiali, aki eti imyiisjis ninivaijec aijaua.

⁴⁹ Is um ika ehelen a natimi alupas iyehki, Ak Natimarid, efi apam aiek va yi jim upyi mas a inhal unyak.

⁵⁰ Is um ika ehelen a Iesu, Atga unyum aiek; et mun umoh a inhal unyum. Is um imyiisjis ninivaijec intas o Iesu aien, um atga o un.

⁵¹ Is wat apan aien, eris aubillid yin a ilpu aheca o un, um asuptecnaig ehelen, um ika, Et mun umoh a inhal unyum.

⁵² Is ahodai ra aien va nuarin-nadiat ineig is umoh iran aien. Eris um ika ehelen ara, Ianiv an nadiatadiat et mun edoaijaig iran nemehe ihlup.

⁵³ Is ato a etman mika idim nuarin-nadiat yehkiyehki is asaig ehelen a Iesu, um ika, Et mun umoh a inhal unyum: is imyiisjis ninivaijec aien im lep ra asega an nimnim o un.

⁵⁴ Nehcero ago nauritai ehka o Iesu neigki an nahes o un Jutaia um apan Calili.