Joanes 20 - Intas-Etipup Mat u Iesu Kristo 1863 (Aneityum Gospels)

¹ AN nadiat uhup irai wiik is apan a Mere nupu Maktala u unmun nij an nuhihialeg, an naupataupat, um ecetai natipagkivaig inhat an mun nij.

² Is athut aien, um apan ehele Saimona Pitrus, im lep ehele natimi atahaijeg Iesu is ethi, aien is aiyu inliinmopon aien vai yin, um ika ehele rau, Eris atipagki Natimarid anliin mun nij ara, ja ecra eti ato aijama inuarin ineig eris ati yin iran.

³ Is apan u unmun nij a Pitrus im lep natimi atahaijeg Iesu iyehki.

⁴ Erus ehras athut arau: is um ahtaregdei Pitrus a natimi atahaijeg Iesu iyehki, is upyi uhup aien um yetpan u unmun nij.

⁵ Is atpuse aien, um ecetai napelumai yilyil namenvaig; ja is eti apan iran aien.

⁶ Is apitac yin a Saimona Pitrus, um apan anliin mun nij, um almoi napelumai yilyil namenvaig,

⁷ im lep napelumai aso nidjinin iran, ja is eti amen u napelumai yilyil iji ehki, eris asvi um ati an taka uarin.

⁸ Is lep apan iran a natimi atahaijeg Iesu iyehki, is upyi hup aien um yetpan u unmun nij, is wat ecetai aien, um imyiisjis ninivaijec.

⁹ Eris eti ato ara an naopan iyehki intas eris upyi aged, um ika, Eris idim ika etpu lep nusjai aien vai inmas o un.

¹⁰ Erus lep apan irai imnim urau ahwat atimi atahaijeg yin erahki.

¹¹ Ja is aiji a Mere u unmun nij, um taig: is wat taig aien, ja par atpuse, um easse anliin mun nij,

¹² um ecet nagelo is ero nateucvaig, is ahi napelumai ira rau, is ateucse is ethi u nidjinin, um lep is ethi u neduon, an nuarin iyehki eris ati nohui Iesu iran.

¹³ Erus um ika ehelen arau, Ak intakata ineigki, na imyitaig inhe aiek? Is ika ehele rau aien, Eris atipagki Natimarid unyak, ja ek eti ato ainyak inuarin ineig eris ati yin iran.

¹⁴ Is wat asan tas ineigki aien, is ahidai yin aien, um ecet Iesu naijivaig, ja is eti ato aien, nikavaig, Iesu iyehki.

¹⁵ Is um ika ehelen a Iesu, Ak intakata ineigki, na imyitaig inhe aiek? na ahilek di aiek? Is aktaktai aien mika is atimi aminjinaig nekaro aien, um ika ehelen, Ak natimi alupas, el et imyiapan yin aiek, asuptecnaig ehelek inuarin ineig na ati yin iran aiek, ekpu atipagki yin ainyak.

¹⁶ Is um ika ehelen a Iesu, Ak Mere. Is ahidai yin aien, um ika ehelen, Ak Rabonai; nesgan tas ineigki, Ak Natimi esege.

¹⁷ Is um ika ehelen a Iesu, Jim atcei pam nyak aiek; ek pam eti fi aridjai ainyak ehele Etmak: jam apan aiek ehele ilpu etoak, um asaig ehele ra mika, ek aridjai ehele Etmak ainyak, im lep Etmamia; ehele Atua unyak, im lep Atua unyimia.

¹⁸ Is apan a Mere nupu Maktala, um asuptecnaig ehele ilpu atimi atahaijeg yin, mika is ecet Natimarid aien, is lep asuptecnaig nitai iji eigki aien ehelen.

¹⁹ An nadiat iyehki is wat jupura, nadiat uhup irai wiik, is ipjin intapanes an nuarin-neom iyehki eris asjapicnaig iran a ilpu atimi atahaijeg yin va nimtitai nupu Jutaia ura, is ehcohos pan a Iesu, um aiji an nuhup ura, um ika ehele ra, Etmu eteuc neigpa ehelemia.

²⁰ Is wat ucce intas o un, is ehvaig ehele ra aien nikman im lep nahaijin. Eris wat ecet Natimarid a ilpu atimi atahaijeg yin, eris imyiacitak ara.

²¹ Is lep ika ehele ra a Iesu, Etmu eteuc neigpa ehelemia: is idim abraig pam nyak a Etmak, et um ucco ek abraig pan caua ainyak.

²² Is asan tas ineigki aien, ja par ehledowa ra, um ika ehele ra, Akumu leh Nesgan Upene aijaua:

²³ uhpu iknipagki nedo has ura, eka iknipagki aijaua; ja eri eti iknipagki nedo has ura, eka eti iknipagki aijaua.

²⁴ Ja is wat ehcohos pan ehele ra a Iesu, is eti amen ehele ra a Tomas, tak idan Titimus, natimi is ethi ira atimi is twelv.

²⁵ Eris ika ehelen a ilpu atimi atahaijeg Iesu, Ecra mun ecet Natimarid aijama. Ja is ika ehele ra aien, El ek eti almoi nugnyan nel an nikman ainyak, um ati nupsikmak an nugnyan nel, um lep ati nikmak an nahaijin, inki ti imyiisjis ninivaijec ainyak.

²⁶ Is wat ti pan itac nadiat is eet, eris amen anliin neom a ilpu atimi atahaijeg yin, im lep Tomas: is ehcohos pan a Iesu, um aiji an nuhup ura, ja is ipjin intapanes, um ika, Etmu eteuc neigpa ehelemia.

²⁷ Is um ika ehele Tomas aien, Imyihio nupsikmam aiek, um almoi nikmak; um lep imyihio nikmam aiek, um ati an nahaijik: um jim imyiisjis nahcil aiek, jam imyiisjis ninivaijec.

²⁸ Is tas a Tomas, um ika ehelen, Ak Natimarid unyak, im lep Atua unyak.

²⁹ Is um ika ehelen a Iesu, Ak Tomas, na mun alum nyak aiek, um imyiisjis ninivaijec: era mun ahesmoij ara, era eti alum nyak ara, jam imyiisjis ninivaijec.

³⁰ Is idim ago niji auritai ehka is ahinag is eche a Iesu an nuhup o ilpu atimi atahaijeg yin, ja eris eti aged an nitasvitai ineigki:

³¹ ja eris aged nitai iji eigki, mika aki imyiisjis ninivaijec aijaua, um ika et Kristo a Iesu, et lep Hal o Atua aien; um lep mika aki leh nitai umoh iran an nidan, an nimyiisjis ninivaijec vaig unyimia.