Joanes 17 - Intas-Etipup Mat u Iesu Kristo 1863 (Aneityum Gospels)

¹ IS wat tas ehni a Iesu, ja par easji pan an nohatag, um ika, Ak Etmak, et mun yetpam naopan unyak; namu ehvaig natimi alupas o Inhal unyum aiek, va etpu lep ehvaig natimi alupas unyum a Inhal unyum:

² as ati yin aiek mika yi esjilid aien ira atimi asega, mika yi alupai ra sji eigki asega as alupai yin ra aiek nitai umoh iran ineig inyi ti lep ti.

³ Nitai umoh iran ineig inyi ti lep ti ineigki, mika eri ato euc ara, nikavaig, na Atua inivaijec ache aiek, im Iesu Kristo, as abraig yin aiek.

⁴ Kis ehvaig natimi alupas unyum ainyak an nobohtan: ek mun ago ehni nauritai ineig ainyak as alupai nyak aiek mika ki ago ainyak.

⁵ Ak Etmak, alupai nyak natimi alupas unyum aiek, natimi alupas iyehki ehelum, is unyak an naopan iyehki is pam eti eteuc nobohtan ineigki.

⁶ Kis asuptecnaig nidam ainyak ehele atimi iji eigki an nobohtan, as alupai nyak ra aiek: eris idim unyum ara, as alupai nyak ra aiek; eris apos intas unyum ara.

⁷ Era ato ara, nikavaig, is ahes ehelum niji itai asega as alupai nyak aiek.

⁸ Kis alupai ra ainyak intas iji eigki as alupai nyak aiek; eris leh ara, um ato upene mika kis idim ahes ehelum ainyak; era lep imyiisjis ninivaijec ara mika as abrai nyak aiek.

⁹ Ek ugni euc ainyak vai ra: ek eti ugni euc ainyak va atimi an nobohtan, ja vai ra ache as alupai nyak ra aiek; era idim unyum ara.

¹⁰ Et unyum niji itai asega unyak, um lep unyak niji itai asega unyum; et ehvaig natimi alupas unyak vaig.

¹¹ Inki ti lep amen an nobohtan ainyak, ja era amen an nobohtan ara sji eigki, ekpu apam ehelum ainyak. Ak Etmak upene, aminjina atimi iji eigki aiek an nidam as alupai nyak ra aiek, mika eri tup ethi ache ara, um idivai caijau.

¹² Kis wat amen ehele ra an nobohtan ainyak, kis aminjinai ra ainyak an nidam: kis aminjina atimi iji eigki ainyak as alupai nyak ra aiek; et eti melga tah ra, nihki natimi ache; va uhpu ehneijid intas ineig eris upyi aged.

¹³ Ekpu apam ehelum ainyak an naopan ineig; ek asuptecnaig nitai iji eigki an nobohtan ainyak, mika yi imyiacitak alupas inliinmopura ara vai nyak.

¹⁴ Kis alupai ra intas unyum ainyak; era amcel vai ra natimi an nobohtan, va nitai ineig, nikavaig, era eti atimi an nobohtan ara, et idivai nyak, ek eti atimi an nobohtan ainyak.

¹⁵ Ek eti ugni euc ainyak mika an atipagki ra aiek an nobohtan, jam aminjinai ra va niji itai has.

¹⁶ Era eti atimi an nobohtan ara, et idivai nyak, ek eti atimi an nobohtan ainyak.

¹⁷ Namu ikni ra aiek an ninivaijec unyum: et inivaijec intas unyum.

¹⁸ As idim abrai nyak aiek mika ki ham an nobohtan ainyak, et um ucco kis abrai ra ainyak, mika eri terimterim ara an nobohtan.

¹⁹ Ek ati nyak ainyak vai ra mika uhpu lep ikni ra an tas inivaijec.

²⁰ Ek eti ugni euc ainyak vai ra sji eigki ache, jai lep vai ra erupu asgeig irak ara vai intas ura;

²¹ mika eri tup ethi ache ara, um idivai caijau, na amen ehelek aiek, ak Etmak, ek lep amen ehelum ainyak, mika eri lep amen eheleijau ara um tup ethi ache: va erupu imyiisjis ninivaijec natimi an nobohtan mika as abrai nyak aiek.

²² Ek mun alupai ra natimi alupas iyehki ainyak as alupai nyak aiek; mika eri tup ethi ache ara, um idivai caijau:

²³ ekmu amen ehele ra ainyak, um lep amen ehelek aiek, mika eri tup ethi ache ara um esjilid; va erupu ato natimi an nobohtan mika as abrai nyak aiek, um lep aiyu inliinmopom aiek vai ra, et idivaig naiyu u inliinmopom vai nyak.

²⁴ Ak Etmak, ek merit ainyak mika eri amen ehelek ara sji eigki, as alupai nyak ra aiek, an nuarin ineig ek amen iran ainyak, um almoi natimi alupas unyak, as alupai nyak aiek: is idim aiyu inliinmopom aiek vai nyak an naopan iyehki is pam eti eteuc nobohtan.

²⁵ Ak Etmak upene, era eti ato euc natimi an nobohtan: ja ek ato euc ainyak, era lep ato ara sji eigki mika as abrai nyak aiek.

²⁶ Ek mun asuptecnaig nidam ehele ra ainyak, ekpu lep asuptecnaig ainyak; mika yi aiyu inliinmopom aiek vai ra, et idivai naiyu u inliinmopom vai nyak, ekpu lep amen ehele ra ainyak.