Joanes 12 - Intas-Etipup Mat u Iesu Kristo 1863 (Aneityum Gospels)

¹ Is apan Bedane a Iesu an naopan iyehki um ti pan itac nadiat is siks, ja pah caig napaska, is amen eahki a Lasarus, aien ahki is mas aien, ja is imyinusjai yin aien vai inmas o un.

² Eris ago nitai caig incan ara eahki an jupura; is aheca ura a Marda: is atimi is ethi a Lasarus ira ra eris ateuc ehelen ara um hag.

³ Is leh nitai aspi nidincai upene nipin a Mere, is idim esjilid, is apapa pan a paunt is ethi, um aspi neduei Iesu iran, um yiri mese neduon irai umri idjinin: is apaahni nipin nitai aspi iyehki anliin neom asega.

⁴ Is ika a natimi atahaijeg yin is ethi, Jutas nupu Karyot, inhal o Saimona, aien aigki is ika aien etpu aniv yin,

⁵ Er auri par eti ahtai nitai aspi ineigki, um leh tollar et forte im faiv, um alupai ilpu ihki atimi?

⁶ Is eti asan tas ineigki aien va naiheuc vai ilpu ihki atimi o un; ja is atimi ehneg itai aien, is amen ehelen incedpai mune, is apos mune ineig aien eris atohwaig iran.

⁷ Is ika a Iesu, Ude yin aiek: is aminjinaig nitai ineigki aien va natelmoi nyak:

⁸ era amen ehelemia a ilpu ihki atimi irai iji adiat; ja inki ti amen ehelemia ainyak irai iji adiat.

⁹ Eris ato a nupu Jutaia is ahinag, nikavaig, is amen aien eahki: ja eris eti apan ara vai Iesu ache, ja eris apan ara par alum Lasarus, natimi iyehki is imyinusjai yin aien vai inmas o un.

¹⁰ Eris upyi tas jipe a ilpu atimi ahlap esjilid, um ika eri lep atgei Lasarus;

¹¹ va nitai ineigki, nikavaig, eris apan a nupu Jutaia is ahinag, um asgeig irai Iesu vai yin.

¹² Is wat lahlah an tak apnyin, eris wat atahaijeg natimi is ahinag, eris apan u nasjapicnaig, mika is apan Jerusalem a Iesu,

¹³ eris leucse neri eaig ara, um apan, um aubillid yin, um ahlaig ijinies, um ika, Hosana! Naaurineig vai Natimarid u nupu Isreel, et ham aien an nidai Ihova!

¹⁴ Is ecetai inhakli nifo a Iesu, um ateuc iran; et idivaig eris aged, um ika,

¹⁵ “Jim imtitaig, ak inhalav atahaig o Saion: et mun ham a Natimarid unyum, um ateuc an hakli nifo.”

¹⁶ Eris eti fi ato nitai iji eigki a ilpu atimi atahaijeg yin an naopan iyehki; ja eris wat ehvaig natimi alupas a Iesu, eris imyiehva ara mika eris upyi aged nitai iji eigki vai yin, um lep ago nitai iji eigki iran.

¹⁷ Eris asuptecnaig a ilpu atimi ahced yin mika is ahlaig vai Lasarus aien an nehpanitai, um imyinusjai yin vai inmas o un:

¹⁸ va nitai ineigki eris lep aubillid yin atimi, eris idim atahaijeg ara mika is ago nauritai ehka ineigki aien.

¹⁹ Eris tas jipe a ilpu Farisi, um ika, Eka aktaktai aijaua, ka o’o? et takitai nauritai unyimia; almoi, era apitac yin natimi asega.

²⁰ Eris eteuc nahaiji nupu Crisi iji ehki eris apan ara u nasjapicnaig par alaigaheni:

²¹ eris apan ehele Filipus ara, is upu Bedseta aien, an pece Calili, um ugni yin, um ika, Ak natimi alupas, ecra merit aijama nalum Iesu vaig.

²² Is apan a Filipus um asuptecnaig ehele Antrius: erus han asuptecnaig ehele Iesu a Antrius im Filipus.

²³ Is tas ehele rau a Iesu, um ika, Et mun ubutpotet u naopan ineig uhpu ehvaig natimi alupas o Inhal o natimi.

²⁴ Et idim inivaijec ineig ek asaig ehelemia ainyak mika, El et eti etjose nohoai hwiit an nobohtan, um muttit, inyi tup asjeuc: ja el et muttit, etpu ohou um ahinag nohoan.

²⁵ Aien et imyicoho nohun aien, etpu mas aien; ja aien et eti imyicoho nohun aien an nobohtan ineigki, etpu leh nitai umoh iran ineig aien inyi ti lep ti.

²⁶ El et aheca unyak tah natimi, etmu ahced nyak aien; etpu lep amen a naheca unyak an nuarin ineig ek amen iran ainyak: el et aheca unyak tah natimi, etpu imyiahpas yin a Etmak.

²⁷ Et ohocred inliinmopok ainyak an naopan ineig; inki asanhe ainyak? ekpu ika ainyak, Ak Etmak, apu imyiatamaig nyak aiek va naopan ineig, ka o’o? ja ek mun yetpam ainyak an naopan ineig va nitai ineigki.

²⁸ Ak Etmak, namu ika aiek eri imyiahpas nidam. Is ahes an nohatag nohran tah, um ika, Ek mun imyiahpas ainyak, ekpu lep imyiahpas ainyak.

²⁹ Eris wat atahaijeg a ilpu atimi aiji ubutpotet, eris ika ara, Inmunuka ineigki: eris ika nahaiji ra, Is tas ehelen a nagelo.

³⁰ Is tas a Iesu, um ika, Et eti ehcohos nohran ineigki vai nyak, ja vai caua:

³¹ uhpu aru nedo has an nobohtan an naopan ineig: uhpu lep atipagki natimarid an nobohtan ineigki:

³² eh wit atijai nyak ijinies an nobohtan, ekpu aihiaig pam atimi asega ehelek ainyak.

³³ Is asan tas ineigki aien par asuptecnaig nedo vai inmas o un.

³⁴ Eris um ika ehelen atimi, Ecra ato aijama an tas alep er ika, etpu amen a Kristo irai iji mesese: na auri aiek par ika, Eris idim ika uhpu atijai Inhal o natimi? Inhal o natimi neigki di?

³⁵ Is um ika ehele ra a Iesu, Etpu eti elvamen ehelemia inlah: akumu atga aijaua an lah, va yi jim yetpam naupat iramia: aien et atga aien an naupat, et eti ato aien nuarin ineig et apan iran aien:

³⁶ et wat amen inlah ehelemia, akumu asgeig irai inlah aijaua, mika aki ilpu halav an lah aijaua. Is asaig nitai iji eigki a Iesu, um atga o un, um atpuh vai ra.

³⁷ Is ago nauritai ehka is ahinag aien an nuhup ura, ja eris eti asgeig iran ara:

³⁸ mika yi ehneijid intas ineig is asaig a Aiseya naprofeta, um ika, “Ak Natimarid, era eteuc an tas unyima a di? eh mun ehvaig nikmai Ihova ehele di?”

³⁹ Is ehka vai ra nimyiisjis ninivaijec vaig, va nitai ineig, is lep asaig a Aiseya, um ika,

⁴⁰ “Is ago aupat nesganimtara aien, um ago ipjin inliinmopura; mika eri jim alum itai ara an nesganimtara, um ato itai anliinmopura, um adumoij,” mika ki ago cehcehe ra ainyak.

⁴¹ Is asan tas iji eigki a Aiseya, is wat almoi natimi alupas o un aien, um tas vai yin.

⁴² Ja eris imyiisjis ninivaijec vai yin a ilpu atimi alupas an pece is ahinag; ja eris eti asuptecnai yin ara vai ilpu Farisi, va eri jim ahlo ra ara irai eom alaigaheni ura:

⁴³ eris merit alupas ara va nimyiahpas o atimi, jam merit tintin va nimyiahpas o Atua.

⁴⁴ Is efehtas a Iesu, um ika, Aien et asgeig irak aien, et eti asgeig irak ache aien, ja et lep asgeig iran aien is abrai nyak aien.

⁴⁵ Aien et alum nyak aien, et alum yin aien is abrai nyak aien.

⁴⁶ Kis ham ainyak par itai lah an nobohtan, mika eri jim amen an naupat a ilpu atimi asgeig irak asega.

⁴⁷ El et atahaijeg niji tas unyak tah natimi, jam eti eteuc iran, inki ti aru nedo o un ainyak: kis eti ham ainyak mika ki aru nedo o atimi, jam imyiatamaig ra ache:

⁴⁸ et eteuc tah par aru nedo o un et esjum vai nyak aien, um eti leh niji tas unyak: uhpu asuptecnaig nimtan imi yin an nadiat apitac an tas ineigki ek mun asuptecnaig ainyak.

⁴⁹ Kis eti tup ispuk tas ainyak; ja is alupai nyak intas alep a Etmak is abrai nyak aien, nikavaig, intas ineig ekpu asuptecnaig ainyak, im lep intas ineig ekpu esege ainyak.

⁵⁰ Ek idim ato ainyak, mika et itai umoh iran ineig inyi ti lep ti intas alep o un: nitai iji eigki ache ek esege ainyak is asuptecnaig ehelek a Etmak.