Joanes 11 - Intas-Etipup Mat u Iesu Kristo 1863 (Aneityum Gospels)

¹ Is emehe natimi is ethi, nidan Lasarus, Bedane, inuarin-pece o Mere im Marda etoan.

² (Is atamaig irai Mere iyehki a Lasarus natimi emehe, is aspi neduei Natimarid aien an nitai aspi, um yiri mese irai umri idjinin.)

³ Erus abraig pan tah ehelen ahwat atahaig iran, um ika, Ak Natimarid, et emehe aien et aiyu inliinmopom aiek vai yin.

⁴ Is wat atahaijeg intas ineig a Iesu, is ika aien, Inyi ti mas aien va nemehe ineig, ja et eteuc mika uhpu ecetai natimi alupas o Atua, im lep natimi alupas o Inhal o Atua vaig.

⁵ Is aiheuc vai Marda a Iesu, im etoan, im Lasarus.

⁶ Is wat atahaijeg aien, nikavaig, is emehe aien, is amen aien an nadiat is ero an nuarin iyehki is amen iran aien.

⁷ Ja par apitac um ika ehele ilpu atimi atahaijeg yin, Intumu lep apan Jutaia akaija.

⁸ Eris um ika ehelen a ilpu atimi atahaijeg yin, Ak Natimi esege, eris tup pam ahilek euc a nupu Jutaia mika eri asji euc irai hat; na auri aiek par apan eahki?

⁹ Is um ika a Iesu, Et eteuc aur et twelv an nadiat et ethi: el et atga tah natimi an nadiat, et eti epihtau aien, et alum itai aien vai inlah an nobohtan:

¹⁰ ja el et atga tah natimi an nepeig, et epihtau aien, va neti lahvaig ehelen.

¹¹ Is asan tas iji eigki aien: ja par ika ehele ra, Et umjeg a Lasarus etoaija; ja ekpu apan ainyak, um ahugni yin va numjeg o un.

¹² Eris ika a ilpu atimi atahaijeg yin, Ak Natimarid, el et umjeg aien, etpu umoh aien.

¹³ Ja is tas a Iesu vai inmas o un: ja eris aktaktai ara mika, is tas aien va natumop o un um umjeg.

¹⁴ Ja is asuptecnaig upene ehele ra a Iesu, um ika, Et idim mas a Lasarus:

¹⁵ ek imyiacitak ainyak vai caua, va nitai ineigki, nikavaig, kis eti amen ainyak eahki, mika aki imyiisjis ninivaijec aijaua; ja intumu apan ehelen akaija.

¹⁶ Is um ika a Tomas, tak idan Titimus, ehele ilpu atimi atahaijeg Iesu, ilpu etoan, Intumu apan akaija, mika ti emesmas ehelen.

¹⁷ Is wat han a Iesu is ato aien, nikavaig, is amen aien an nehpanitai an nadiat is for.

¹⁸ Is ubutpotet pan Jerusalem nuarin-pece Bedane et idivaig et ero mail:

¹⁹ eris apan ehele Marda im Mere a nupu Jutaia is ahinag, par ataraces rau vai natamaig ira rau.

²⁰ Is wat ato napam o Iesu a Marda, is apan aien um aubillid yin: ja is tup amen a Mere anliin neom.

²¹ Is um ika a Marda ehele Iesu, Ak Natimarid, el is wat amen aiek igcaki, el is eti mas a natamaig irak:

²² ja ek ato ainyak, nikavaig, etpu idim alupai euc nitai ineig a Atua an naopan ineig, napu lep ugni Atua vaig aiek.

²³ Is um ika ehelen a Iesu, Etpu lep nusjai a natamaig iram.

²⁴ Is ika ehelen a Marda, Ek ato ainyak, nikavaig, etpu lep nusjai aien an nusjai o atimi an nadiat apitac.

²⁵ Is um ika ehelen a Iesu, Ek itai anusjai vaig ainyak, um itai umoh iran: aien et asgeig irak aien, el is mas aien, etpu umoh aien:

²⁶ aien et umoh aien um asgeig irak, inyi idim eti mas aien irai iji mesese. Na imyiisjis ninivaijec nitai ineigki aiek, ka o’o?

²⁷ Is um ika ehelen aien, Maiya, ak Natimarid: ek imyiisjis ninivaijec ineig ainyak, nikavaig, nai Kristo aiek, Inhal o Atua, eris ika, Etpu ham aien an nobohtan.

²⁸ Is asan tas ineigki aien, ja par atga o un, um apan, um echim ahlaig ache vai Mere etoan, um ika, Et mun ham a Natimi esege, um ahlaig vai euc.

²⁹ Is wat atahaijeg aien, is auroauro aien, um atidai, um apan ehelen.

³⁰ Is eti fi yetpan an nuarin-pece a Iesu, ja is amen aien an nuarin iyehki is uhum pan yin a Marda.

³¹ Eris amen ehele Mere anliin neom a nupu Jutaia, um ataraces yin; eris wat alum yin ara natidaivaig, um auroauro um alau ijo, eris apitac yin ara, um ika, Et apan aien u nehpanitai, mika yi taig eahki.

³² Is apan a Mere an nuarin iyehki is amen iran a Iesu, um ecet yin, um atpuse u neduon, um ika ehelen, Ak Natimarid, el is wat amen aiek igcaki, el is eti mas a natamaig irak.

³³ Is wat almoi intaig o un a Iesu, im lep nehtigtaig o nupu Jutaia iji ehki eris ahced yin ara, is ohocred inliinmopon aien, um ahoacni yin;

³⁴ is um ika aien, Akis ati yin eda aijaua? Eris ika ara, Ak Natimarid, apam aiek um almoi.

³⁵ Is taig a Iesu.

³⁶ Eris um ika a nupu Jutaia, Almoi, is idim aiyu inliinmopon aien vai yin!

³⁷ Eris um ika nahaiji ra, Natimi ineigki is asalgei nesganimtai ilpu atimi aupat nesganimtara, is auri aien par eti emda um ahtapanes inmas vai natimi ineigki?

³⁸ Is wat yetpan u nehpanitai a Iesu, is lep ohocred inliinmopon aien. Immun nij iyehki, is amen inhat atapanes iran.

³⁹ Is um ika a Iesu, Atipagki inhat aijaua. Is ika ehelen a Marda, natahaig irai natimi mas, Ak Natimarid, et idivaig et mun epiv aien: is mas aien is for nadiat iran.

⁴⁰ Is um ika ehelen a Iesu, Ek mun idim asaig ehelum ainyak mika, el et imyiisjis ninivaijec aiek, napu almoi nemda o Atua aiek.

⁴¹ Eris atipagki inhat ara an nuarin iyehki eris ati natimi mas iran. Is easji pan a Iesu, um ika, Ak Etmak, naaurineig, na mun atahaijeg nyak aiek:

⁴² kis ato ainyak, nikavaig, na atahaijeg nyak aiek irai iji adiat: ja ek mun asaig ainyak va atimi iji eigki era aiji arahed irak, mika eri imyiisjis ninivaijec ara, nikavaig, as abrai nyak aiek.

⁴³ Is wat ucce intas o un, is ahlaig ijinies aien, um ika, Ak Lasarus, alau ijo aiek.

⁴⁴ Is um alau ijo a natimi iyehki is mas aien, ja is amen irai ikman im neduon napelumai eris aso yin iran: is lep amen napelumai an nesganimtan. Is um ika ehele ra a Iesu, Ehtihiyi itai iran aijaua, yi pu atga aien.

⁴⁵ Eris wat almoi nitai iji eigki is ago a Iesu, eris asgeig iran a nupu Jutaia iji ehki is ahinag eris apan ehele Mere ara.

⁴⁶ Ja eris atga ura nahaiji ra um apan ehele ilpu Farisi, um asuptecnaig ehele ra nitai iji eigki is ago a Iesu.

⁴⁷ Eris asjapicnaig a ilpu atimi ahlap esjilid im ilpu Farisi, um tas jipe, um ika, Inta ago inhe akaija? et idim ago niji auritai ehka et ahinag a natimi ineigki:

⁴⁸ el ta tup ude yin akaija, erupu asgeig iran natimi asega: erupu ham a nupu Roma, um auahas inpece uja um atimi asega iran.

⁴⁹ Is tas a natimi is ethi ira ra, nidan Keafas, is atimi esjilid an nahlap aien an mesese iyehki, um ika ehele ra, Eka eti ato itai aijaua,

⁵⁰ um eti aktaktai mika et upene vai caija mika yi mas natimi et ethi vai nup uran pece, va eri jim emesmas nup uran pece asega.

⁵¹ Is eti tup ispun asan tas ineigki aien: ja is atimi esjilid an nahlap aien an mesese iyehki, va nitai ineigki, is upyi asaig aien, um ika, etpu mas a Iesu va atimi an pece iyehki;

⁵² jam eti mas va atimi an pece iyehki ache, jam asjapicnaig ilpu hal o Atua eris terimterim ara eri tup ethi ache.

⁵³ Eris atupun ara an naopan iyehki, um tas jipe mika eri atgei yin.

⁵⁴ Va nedo ineigki, is eti lep atga a Iesu an nuhup u nupu Jutaia; ja is ahes eahki aien um apan an pece iyehki ubutpotet u namasacen, an nuarin-pece is ethi nidan Ifreim, is amen aien eahki im ilpu atimi atahaijeg yin.

⁵⁵ Is um ubutpotet u napaska u nupu Jutaia: eris ahes an pece iyehki natimi is ahinag, um apan Jerusalem, mika eri ago adicinadicin ra ara, ja pah caig napaska.

⁵⁶ Eris ahilek Iesu ara, um tas jipe anliin neom ahlap, um ika, Eka ikha aijaua? etpu ham aien u nasjapicnaig, ka o’o?

⁵⁷ Eris tas alep a ilpu atimi ahlap esjilid im ilpu Farisi, um ika, El et ato tah natimi nuarin ineig et amen iran aien, etmu asuptecnaig aien, -- mika eri arop iran ara.