Joanes 10 - Intas-Etipup Mat u Iesu Kristo 1863 (Aneityum Gospels)

¹ ET idim inivaijec ineig ek asaig ehelemia ainyak mika, Aien et eti atga an neucse nirahed o siip aien, jam algauwaig an taka uarin, et atimi ehneg itai aien, um atimi ahrincai:

² ja aien et atga an neucse nirahed aien, et atimi asgi siip aien:

³ et asalgei vai yin a natimi aminjinaig intapanes; era atahaijeg nohran siip: et ahlaig vai nidai siip o un aien, um uhup pan itac ira ra:

⁴ et wat imyiapan itac siip o un aien, et uhup ira ra aien; era apitac yin ara: era idim ato nohran ara:

⁵ era eti apitac natimi et eche ara, jam aha vai yin: era eti ato nohrai tak atimi ara.

⁶ Is asan tas ecsipece ineigki ehele ra a Iesu: ja eris eti ato nitai iji eigki ara is asaig ehele ra aien.

⁷ Ja is lep ika ehele ra a Iesu, Et idim inivaijec ineig ek asaig ehelemia ainyak mika, Ek eucse irahed irai siip ainyak:

⁸ ara asega eris uhup irak ara, eris atimi ehneg itai ara, um atimi ahrincai: ja eris eti atahaijeg ra siip.

⁹ Ek eucse irahed ainyak: el et atga anliin nirahed tah natimi irak, uhpu imyiatamaig yin; etpu atga iran aien, um lep apan itac, um leh nitai caig incan.

¹⁰ Et idim apan natimi ehneg itai mika yi ehneg itai, um atgei atmas, um auahas itai: kis ham ainyak mika eri umumoh ara, yi lep esjilid acen numumoh ura.

¹¹ Ek atimi asgi upene siip ainyak: et ahtai nitai umoh iran o un a natimi asgi upene siip vai siip o un.

¹² Ja aien et asgi siip va nimtan ache aien, jam eti ohuun, et eti atimi asgi siip aien, et wat almoi kuri aleg aien napamvaig, et ude siip aien um aha: et aces siip kuri aleg, era terimterim ara:

¹³ et aha natimi asgi siip va nimtan ache, va nitai ineig, nikavaig, et atimi asgi siip aien va nimtan ache, et eti aktaktai vai siip aien.

¹⁴ Ek atimi asgi upene siip ainyak; ek ato siip unyak ainyak, era lep ato nyak siip unyak,

¹⁵ et idivaig nato nyak o Etmak, im lep nato Etmak unyak: ek ahtai nitai umoh iran unyak ainyak vai siip unyak.

¹⁶ Et unyak siip et eche, era eti amen ara anliin nirahed ineigki: eris idim ika ekpu uhup ira ra ainyak, erupu atahaijeg nohrak ara; etpu ethi ache nasjapicnaig siip, um ethi ache natimi asgi siip.

¹⁷ Et aiyu inliinmopoi Etmak vai nyak va nedo unyak, nikavaig, ekpu ahtai nitai umoh iran unyak ainyak, ja par lep nusjai.

¹⁸ Inyi eti atipagki nitai umoh iran unyak tah natimi, ek tup ispuk ahtai ainyak: ek emda ainyak intup ispuk ahtaivaig, um lep emda ainyak par lep nusjai. Kis leh intas alep ineigki ehele Etmak ainyak.

¹⁹ Eris imyiisjis jipe intas iji eigki a nupu Jutaia.

²⁰ Eris ika nahaiji ra is ahinag, Et amen iran a nagelo has, et um ahnag aien; eka auri aijaua par atahaijeg yin?

²¹ Eris lep ika nahaiji ra, Et ti intas o natimi et amen iran nagelo has iji eigki: et ehka vai nagelo has nago lah vaig nesganimtai ilpu atimi aupat nesganimtara.

²² ERIS asjapicnaig Jerusalem an naopan iyehki va nativaig neom ahlap, is mesese.

²³ Is atga a Iesu an naiyu u Solomon an neom ahlap.

²⁴ Eris asjapicnaig pan ehelen a nupu Jutaia, um ika ehelen, Na ika aiek ecri amen aijama um aktaktai um yetpan eig id? el et Kristo aiek, asuptecnaig upene ehelema.

²⁵ Is um ika ehele ra a Iesu, Ek mun asuptecnaig ehelemia ainyak, ja eka imyiisjis nahcil aijaua: et asuptecnai nyak niji auritai iji eigki ek ago ainyak an nidai Etmak.

²⁶ Ja eka eti imyiisjis ninivaijec aijaua, va nitai ineigki, nikavaig, eka eti siip unyak aijaua: et idivaig kis asaig ehelemia ainyak,

²⁷ era atahaijeg nohrak siip unyak, ek ato ra ainyak, era apitac nyak ara:

²⁸ ek alupai ra nitai umoh iran ineig ainyak inyi ti lep ti; uhpu eti auahas ra, inyi ti atoraliak ra tah natimi an nikmak.

²⁹ Et esjilid a Etmak is alupai nyak ra aien irai iji itai asega; et eti emda tah natoraliak ra vaig an nikmai Etmak.

³⁰ Ek tup ethi ache ainyak im Etmak.

³¹ Eris lep arapse vai hat a nupu Jutaia mika eri asji yin.

³² Is um ika ehele ra a Iesu, Kis ehvaig ehelemia ainyak niji auritai upene is ahinag is ahes ehele Etmak; nehva auritai ineigki eka ika aijaua aki asji nyak vaig?

³³ Eris tas ehelen a nupu Jutaia, um ika, Ecra eti asji euc aijama vaig tah nauritai upene; ja vai intas has esjilid; na atimi aiek, jai na ika aiek, na idim Atua.

³⁴ Is um ika ehele ra a Iesu, Eris aged an tas alep unyimia mika, “Kis ika ainyak, Eka ilpu atua aijaua.”

³⁵ El is anvi nidai ra sji eigki aien is yetpan intas o Atua ehele ra, par ika ilpu atua, (et ehka nauahasvaig intas eris aged;)

³⁶ el eka auri aijaua par ika vai yin is ati yin a Etman, um abrai yin mika yi ham aien an nobohtan, Na mun asan tas has esjilid aiek; vai intas unyak, nikavaig, ek ika ainyak, Ek hal o Atua ainyak?

³⁷ El ek eti ago niji auritai o Etmak ainyak, el eka jim eteuc an tas unyak aijaua:

³⁸ ja el ek ago ainyak, el eka eti eteuc an tas unyak aijaua, akumu imyiisjis ninivaijec niji auritai unyak aijaua: mika aki ato aijaua, um imyiisjis ninivaijec, nikavaig, et amen ehelek a Etmak, um lep amen ehelen ainyak.

³⁹ Eris lep merit ara narop iran vaig: ja is tiblaitiblai ra aien um atga o un,

⁴⁰ um lep apan an nahaijin Jortan itac, an nuarin iyehki is upyi hup a Joanes um baptiso ira atimi iran; um amen eahki.

⁴¹ Eris asjapicnaig pan ehelen natimi is ahinag, um ika, Is eti ago tah nauritai ehka a Joanes: ja et inivaijec intas asega is asaig a Joanes vai natimi ineigki.

⁴² Eris imyiisjis ninivaijec vai yin natimi is ahinag eahki.