Joanes 1 - Intas-Etipup Mat u Iesu Kristo 1863 (Aneityum Gospels)

¹ Is eteuc a Intas an naopan iyehki is pam eti eteuc nobohtan, is amen a Intas ehele Atua, is lep Atua a Intas.

² Aien aigki is amen aien ehele Atua an naopan iyehki is pam eti eteuc nobohtan.

³ Eris ago niji itai asega vai yin; et eti eteuc tah nitai ineig is eti ago aien.

⁴ Is amen ehelen nitai umoh iran; is lep itai lah imi atimi nitai umoh iran.

⁵ Et eteuc nitai lah an naupat; ja et ahtapanes inlah naupat.

⁶ Is abraig pan natimi is ethi a Atua, nidan Joanes.

⁷ Is ham aien par asuptecnaig Nitai lah, mika eri imyiisjis ninivaijec natimi asega vai yin.

⁸ Is eti itai lah iyehki aien, ja eris abrai yin mika yi asuptecnaig Nitai lah iyehki aien.

⁹ Is itai lah inivaijec iyehki, is ham aien an nobohtan mika eri lah natimi asega vai yin.

¹⁰ Is amen aien an nobohtan, eris lep ago nobohtan vai yin, ja eris eti ato yin an nobohtan.

¹¹ Is apan aien an pece o un, ja eris eti leh yin a nup uran pece o un.

¹² Ara asega eris leh yin ara, um asgeig an nidan, is alupai ra nemda aien mika eri ilpu hal o Atua ara:

¹³ ara, is apos ra a Atua, jam eti apos ra vai ilpu retpora, ka inmerit o inliinmopura, ka inmerit o atimi.

¹⁴ Is leh nohun a Intas, um amen eheleija, (ektijis almoi natimi alupas o un aijumtaij, natimi alupas o Inhal o Etman et ethi ache,) is esjilid acen naiheuc o un, is lep idim inivaijec aien.

¹⁵ Is asuptecnai yin a Joanes, um ahlaig, um ika, Aien aigki kis tas vai yin ainyak, um ika, Aien etpu apitac nyak aien, inyi esjilid irak aien; is idim uhup irak aien.

¹⁶ Intis leucse itai akaija asega irai iji itai is ahinag o un, im lep naiheuc et idivaig naiheuc o un.

¹⁷ Is alupai caija intas alep a Moses, ja is ahes ehele Iesu Kristo intas aiheuc va atimi um inivaijec.

¹⁸ Is idim eti ecet Atua tah natimi; ja is asuptecnai yin a Inhal o un et ethi ache, et amen aien an riti Etman.

¹⁹ INTAS o Joanes ineigki an naopan iyehki eris abrai ilpu atimi ahlap im ilpu mapoi Livai a nupu Jutaia mika eri ahes Jerusalem ara, um apan, um ahodai yin, um ika, Aiek di aigki?

²⁰ Is asuptecnaig aien, um eti ateri; is idim asuptecnaig aien, um ika, Ek eti Kristo ainyak.

²¹ Eris lep ahodai yin ara, um ika, Aiek di aigki? Na Elaija aiek, ka o’o? Is um ika aien, O’o. Eris um ika ara, Na aprofeta iyehki aiek, ka o’o? Is um ika aien, O’o.

²² Eris lep ika ehelen ara, Aiek di aigki? aniv euc aiek ehelema, mika ecri apan aijama um asuptecnaig ehele ra eris abrai cama ara. Nai ikha aiek vai euc?

²³ Is ika aien, Ek “ohran tah ainyak et ahlaig aien an namasacen, um ika, Akumu ago atoh nefalaig vai Ihova aijaua,” et idivaig is asaig a Aiseya naprofeta.

²⁴ Eris ilpu Farisi ara eris abrai ra.

²⁵ Eris ahodai yin ara, um ika ehelen, El et eti Kristo aiek, ka Elaija, ka naprofeta iyehki, na auri aiek par baptiso ira atimi?

²⁶ Is tas ehele ra a Joanes, um ika, Ek baptiso ira atimi ainyak an wai: ja et amen ehelemia tah et ethi, eka eti ato yin aijaua;

²⁷ aien aigki et apitac nyak aien, et idim esjilid irak aien, ek eti upene ainyak par ahiyi nehtit an cedpun neduon.

²⁸ Eris ago nitai iji eigki Bedabara an nahaijin Jortan itac, an nuarin ineig is baptiso iran a Joanes.

²⁹ Is wat lahlah an tak apnyin, is ecet Iesu a Joanes napanvaig ehelen, um ika, Almoi Lam o Atua aijaua, aien aigki et iknipagki nedo has aien an nobohtan:

³⁰ aien aigki kis tas vai yin ainyak, um ika, Etpu ham natimi inyi ethi um apitac nyak, inyi esjilid irak aien; is idim uhup irak aien.

³¹ Kis eti ato yin ainyak: ja kis ham ainyak um baptiso ira atimi an wai, mika eri ato yin a nupu Isreel.

³² Is asuptecnaig a Joanes, um ika, Kis ecet Nesgan Upene ainyak is ahes an nohatag um asuol is idivaig nalaupa, um amen iran:

³³ kis eti ato yin ainyak: ja aien is abrai nyak aien mika ki baptiso ira atimi ainyak an wai, is ika ehelek aien, Aien aigki napu ecet shlegan Upene aiek nasuolvaig Neeen um amen iran, etpu baptiso ira atimi aien an Nesgan Upene.

³⁴ Kis ecetai ainyak um asuptecnaig, um ika, Inhal o Atua ineigki.

³⁵ Is wat lahlah an tak apnyin, is aiji a Joanes im lep natimi atahaijeg yin is ero;

³⁶ is alum Iesu aien natgavaig, um ika, Almoi Lam o Atua aijaurau!

³⁷ Erus atahaijeg intas o un natimi atahaijeg yin erahki, um apitac Iesu.

³⁸ Is ahidai yin a Iesu um ecet rau napitac yin vaig, um ika ehele rau, Erau merit vanhe aijaurau? Erus ika ehelen arau, Ak Rabai, (nesgan tas ineigki, Ak Natimi esege,) na amen aiek eda?

³⁹ Is ika ehele rau aien, Apam aijaurau um almoi. Erus apan arau um almoi nuarin ineig is amen iran aien, um amen ehelen an nadiat iyehki: is um jupura.

⁴⁰ ANTRIUS, etoai Saimona Pitrus, is atimi is ethi ira rau aien, erus atahaijeg intas o Joanes arau, um apitac Iesu.

⁴¹ Is upyi uhup aien um ecet Saimona etoan, um ika ehelen, Ecra mun ecet Mesia aijama, (nesgan tas ineigki, Kristo, Natimi ineig is ati yin a Atua.)

⁴² Is imyiapan yin ehele Iesu aien. Is wat ecet yin a Iesu, is ika aien, Na Saimona aiek inhal o Jona: uhpu anvi nidam par ika Sifas, (nesgan tas ineigki, Pitrus, Inhat.)

⁴³ Is wat lahlah an tak apnyin, is ika a Iesu yi apan Calili, is ecet Filipus aien, um ika ehelen, Apitac nyak aiek.

⁴⁴ Is upu Bedseta a Filipus, nuarin-pece o Antrius im Pitrus.

⁴⁵ Is ecet Nadanyel a Filipus, um ika ehelen, Ecra mun ecet Iesu nup an Nasared aijama inhal o Josef, aien aigki is aged intas vai yin a Moses an tas alep, im lep ilpu profeta.

⁴⁶ Is ika ehelen a Nadanyel, Et idim ahes an Nasared tah nitai upene, ka o’o? Is um ika ehelen a Filipus, Apam aiek um almoi.

⁴⁷ Is ecet Nadanyel a Iesu napanvaig ehelen, um ika vai yin, Almoi nupu Isreel ineig aijaua, et eti efaifa aien!

⁴⁸ Is um ika ehelen a Nadanyel, Na ato nyak aiek vai di? Is tas a Iesu, um ika ehelen, Kis idim ecet euc ainyak an naopan iyehki as amen aiek ithan nateg, ja is par ahlaig vai euc a Filipus.

⁴⁹ Is tas ehelen a Nadanyel, um ika, Ak Natimi esege, nai Hal o Atua aiek; na Atimarid u nupu Isreel aiek.

⁵⁰ Is tas a Iesu, um ika ehelen, Nai imyiisjis ninivaijec aiek vai intas ineig ek mun asaig ehelum ainyak mika, Kis ecet euc ainyak ithan nateg? napu ecetai aiek niji itai inyi esjilid irai itai iji eigki.

⁵¹ Is um ika ehelen aien, Et idim inivaijec ineig ek asaig ehelemia ainyak mika, Akupu ecetai nohatag aijaua an tak aopan etpu asalgei, im lep naridjai o ilpu agelo o Atua, im nasuol ura, irai Inhal o natimi.