Yosua 21 - KYERƐW KRONKRON

Lewifo nkurow

¹ Na Lewifo agyanom atitiriw baa ɔsɔfo Eleasar ne Nun ba Yosua ne Israelfo mmusuakuw agyanom atitiriw nkyɛn,

² na wɔka kyerɛɛ wɔn Silo, Kanaan asase so sɛ: AWURADE nam Mose so hyɛe sɛ wɔmma yɛn nkurow ntena mu, ne ɛho mfikyisaase mma yɛn mmoa.

³ Na Israelfo de wɔn agyapade mu nkurow yi ne ɛho mfikyisaase maa Lewifo, sɛnea AWURADE hyɛe no.

⁴ Na ntonto no bae maa Kehatfo mmusua, na ɔsɔfo Aaron mma a wofi Lewifo mu no nam ntonto so nyaa Yuda abusuakuw ne Simeon abusuakuw ne Benyamin abusuakuw mu nkurow dumiɛnsa.

⁵ Na Kohatfo a wɔkae no nam ntonto so nyaa Efraim abusuakuw mmusua ne Dan abusuakuw ne Manase abusuakuw fa no mu nkurow du.

⁶ Na Gerson mma nam ntonto so nyaa Isakar abusuakuw mmusua ne Aser abusuakuw ne Naftali abusuakuw ne Manase abusuakuw fa a ɛwɔ Basan no mu nkurow dumiɛnsa.

⁷ Merari mma, sɛ wɔn mmusua te no, wonyaa Ruben abusuakuw ne Gad abusuakuw ne Sebulon abusuakuw mu nkurow dumien.

⁸ Na Israelfo nam ntonto so de nkurow yi ne ɛho mfikyisase maa Lewifo, sɛnea AWURADE nam Mose so hyɛe no.

⁹ Na wɔde Yudafo abusuakuw ne Simeonfo abusuakuw mu nkurow a wɔbɛbobɔ din yi mae.

¹⁰ Na ɛba maa Aaron mma a wofi Kehatfo mmusua mu, Lewifo mu no, efisɛ wɔn de ne ntonto a edi kan no.

¹¹ Na wɔde Kiriat-arba, Anak agya no kurow a ɛne Hebron a ɛwɔ Yuda bepɔw so ne ɛho mfikyisase a etwa ho hyia no maa wɔn.

¹² Na kurow no ho mfuwa ne nkuraa no de, wɔde maa Yefune ba Kaleb sɛ agyapade.

¹³ Na ɔsɔfo Aaron mma no, wɔde nnipakumfo guankɔbea kurow Hebron ne ɛho mfikyisase maa wɔn, ne Libna ne ɛho mfikyisase,

¹⁴ ne Yatir ne ɛho mfikyisase, ne Estemoa ne ɛho asase,

¹⁵ ne Holon ne ɛho asase, ne Debir ne ɛho asase,

¹⁶ ne Ain ne ɛho asase, ne Yuta ne ɛho asase, ne Bet-semes ne ɛho asase: Mmusuakuw abien yi mu nkurow akron.

¹⁷ Na Benyamin abusuakuw mu de, wɔde Gibeon ne ɛho mfikyisase ne Geba ne ɛho asase,

¹⁸ ne Anatot ne ɛho asase ne Almon ne ɛho asase mae: Nkurow anan.

¹⁹ Aaron mma asɔfo no nkurow nyinaa si nkurow dumiɛnsa ne ɛho mfikyisase.

²⁰ Na Kohat mma Lewifo no, Kohat mma nkae no mmusua no, wɔn ntonto nkurow fii Efraim abusuakuw mu.

²¹ Wɔde nnipakumfo guankɔbea kurow Sekem ne ɛho mfikyiase maa wɔn, Efraim bepɔw so, ne Geser ne ɛho mfikyisase,

²² ne Kibsaim ne ɛho asase, ne Bet-horon ne ɛho asase: Nkurow anan;

²³ ne Dan abusuakuw mu: Elteke ne ɛho mfikyisase, Gibeton ne ɛho asase,

²⁴ Ayalon ne ɛho asase ne Gat-rimon ne ɛho asase: Nkurow anan;

²⁵ ne Manase abusuakuw fa no mu: Taanak ne ɛho mfikyisase ne Gat-rimon ne ɛho asase: Nkurow abien.

²⁶ Nkurow a ɛyɛɛ Kehat mma nkae no mmusua no de nyinaa si nkurow du ne ɛho mfikyisase.

²⁷ Na Gerson mma a wofi Lewifo mmusua no mu no, wɔmaa wɔn Manase abusuakuw fa no mu nnipakumfo guankɔbea kurow Golan wɔ Basan, ne ɛho mfikyisase, ne Beestra ne ɛho asase: Nkurow abien;

²⁸ ne Isakar abusuakuw mu: Kision ne ɛho mfikyisase, Daberat ne ɛho asase,

²⁹ Yarmut ne ɛho asase, En-ganim ne ɛho asase: Nkurow anan;

³⁰ ne Aser abusuakuw mu: Misal ne ɛho mfikyisase, Abdon ne ɛho asase,

³¹ Helkat ne ɛho asase, ne Rehob ne ɛho asase: Nkurow anan;

³² ne Naftali abusuakuw mu: Nnipakumfo guankɔbea kurow Kedes a ɛwɔ Galilea ne ɛho mfikyisase, ne Hamot-dor ne ɛho asase, ne Kartan ne ɛho asase: Nkurow abiɛsa.

³³ Gersonfo nkurow nyinaa, sɛ wɔn mmusua te no, esi nkurow dumiɛnsa ne ɛho mfikyisase.

³⁴ Na Merari mma, Lewifo nkae no mmusua no, wɔmaa wɔn Sebulon abusuakuw mu: Yokneam ne ɛho mfikyisase, Karta ne ɛho asase,

³⁵ Dimna ne ɛho asase, ne Nahalal ne ɛho asase: Nkurow anan;

³⁶ ne Ruben abusuakuw mu: Beser ne ɛho mfikyisase, Yahas ne ɛho asase,

³⁷ Kedemot ne ɛho asase, Mefaat ne ɛho asase: Nkurow anan;

³⁸ ne Gad abusuakuw mu: Nnipakumfo guankɔbea kurow Ramot a ɛwɔ Gilead ne ɛho mfikyisase, Mahanaim ne ɛho asase,

³⁹ Hesbon ne ɛho asase, Yaser ne ɛho asase: Nkurow anan.

⁴⁰ Merari mma mmusua horow a wɔaka Lewifo mmusua mu no nkurow nyinaa, wɔn ntonto de ne nkurow dumien.

⁴¹ Lewifo nkurow a wonyae Israelfo agyapade mu no nyinaa si nkurow aduanan awotwe ne ɛho mfikyisase.

⁴² Nkurow yi mu biara wɔ mfikyisase a atwa ho ahyia, saa na ɛte nkurow yi nyinaa ho.

Onyankopɔn di ne bɔhyɛ so

⁴³ Na AWURADE de asase a ɔkaa ho ntam sɛ ɔde bɛma wɔn agyanom no nyinaa maa Israel, na wodii so tenaa so.

⁴⁴ Na AWURADE maa wɔn asomdwoe hyiae, sɛnea ɔkaa wɔn agyanom ntam no ara, na wɔn atamfo nyinaa mu biara annyina wɔn anim; AWURADE de wɔn atamfo no nyinaa hyɛɛ wɔn nsa.

⁴⁵ Asɛm pa a AWURADE kaa Israel fi no nyinaa mu asɛm biara antɔ fam, ne nyinaa baa mu.