Yosua 2 - KYERƐW KRONKRON

Rahab gye akwansrafo no

¹ Na Nun ba Yosua somaa mmarima asraafo baanu fi Sitim ahintawee mu sɛ: Monkɔ nkɔhwɛ asase no ne Yeriko. Na wosiim kɔe, na woduu ɔbea aguaman bi a wɔfrɛ no Rahab fi, na wɔdaa hɔ.

² Na obi kɔka kyerɛɛ Yeriko hene no sɛ: Hwɛ, mmarima bi a wofi Israelfo no mu aba ha anadwo yi rebɛsra asase yi.

³ Na Yeriko hene no soma kɔɔ Rahab nkyɛn sɛ: Yi mmarima a wɔaba wo nkyɛn na wɔahyɛn wo fi no fi adi, na wɔbaa asase yi nyinaa sra.

⁴ Na ɔbea no faa mmarima baanu no de wɔn hintawee; na ɔkae sɛ: Ɛwom, mmarima no baa me nkyɛn de, nanso minnim nea wofi;

⁵ na esum durui a wɔrebɛto kurow pon no mu no, na mmarima no fii adi; minnim nea wɔkɔ: Muntiw wɔn ntɛm, na mobɛto wɔn.

⁶ Na ɔno de, na ɔde wɔn akɔ ɔdan atifi na ɔde wɔn akohintaw siwabiri a ɔde aboa ɔdan no atifi no ase.

⁷ Na mmarima no tiw wɔn faa Yordan kwan so de kɔɔ atwae; na wɔn a wotiw wɔn no fii adi ara pɛ, na wɔtoo kurow pon no mu.

⁸ Na wɔn de, wonnya nkɔdae no, ɔbea no foro kɔɔ wɔn nkyɛn ɔdan no atifi

⁹ kɔka kyerɛɛ mmarima no sɛ: Minim sɛ AWURADE de asase yi ama mo, na mo ho hu atɔ yɛn so, na asase yi sotefo nyinaa koma tutu mo anim.

¹⁰ Na yɛate sɛnea mo Misraim fi mu no AWURADE maa Mmɛw-Po mu nsu yowee mo anim, ne nea moyɛɛ Amorifo ahene baanu a wɔwɔ Yordan agya no, Sihon ne Og a mosɛee wɔn pasaa no.

¹¹ Na yɛate, na yɛn koma atu, na ɔhome bi rensɔre bio obiara mu wɔ mo anim, efisɛ AWURADE mo Nyankopɔn no, ɔno ne Nyankopɔn wɔ nyameso ɔsoro ne asase so ɛfam.

¹² Na afei monka me AWURADE ntam sɛ, sɛ mayɛ mo yiye yi, mo nso mobɛyɛ m’agya ofi yiye, na momma me nokware sɛnkyerɛnne,

¹³ na momma m’agya ne me na ne me nuammarimanom ne me nuammeanom ne nea wɔwɔ nyinaa nnya nkwa, na munyi yɛn mfi wu mu.

¹⁴ Na mmarima no ka kyerɛɛ no sɛ: Yɛn kra nsi mo ananmu nwu! Sɛ woanka yɛn asɛm yi ankyerɛ, na ɛba sɛ AWURADE de asase yi ma yɛn a, yɛne wo bedi no adɔe ne nokware so.

¹⁵ Ɛnna ɔbea no de ntampehama twetwee wɔn faa mfɛnsere mu sisii fam, na ne dan si kurow no ho fasu so, na ɔfasu no so na ɔte.

¹⁶ Na ɔka kyerɛɛ wɔn sɛ: Bepɔw so na monkɔ, na atiwfo no anto mo, na munhintaw hɔ nnansa nkosi sɛ atiwfo no bɛsan, na ɛno akyi no moakɔ mo kwan.

¹⁷ Na mmarima no ka kyerɛɛ no sɛ: Yebedi bem afi ntam a woma yɛkae yi mu,

¹⁸ hwɛ, sɛ yɛreba ase yi so a, fa asaawa kɔkɔɔ hama yi kyekyere mfɛnsere a wode yɛn faa mu sisii fam no mu, na boa w’agya ne wo na ne wo nuanom ne w’agya fi nyinaa ano wo nkyɛn wɔ ofie ha,

¹⁹ na obiara a obefi adi afi wo fi pon ano akɔ abɔnten so no, ne mogya begu n’atifi, na yɛn de, yɛadi bem; na obiara a ɔwɔ wo nkyɛn ofie no, sɛ obi de ne nsa ka no a, ne mogya ngu yɛn atifi.

²⁰ Na sɛ woka yɛn asɛm yi kyerɛ a, ɛno nso yebedi bem afi wo ntam a woma yɛkae no ho.

²¹ Na ɔkae sɛ: Ɛnyɛ sɛnea mo nsɛm yi te. Na ogyaa wɔn kwan ma wɔkɔe; na ɔde hama kɔkɔɔ no kyekyeree mfɛnsere no mu.

²² Ɛnna wosiim koduu bepɔw no so, na wodii hɔ nnansa kosii sɛ atiwfo no sanee. Na atiwfo no hwehwɛɛ wɔn ɔkwan no so nyinaa, nanso wɔanhu wɔn.

²³ Na mmarima baanu no sian fii bepɔw no so, na wotwa baa Nun ba Yosua nkyɛn, na wɔkaa nea ɛyɛɛ wɔn nyinaa kyerɛɛ no,

²⁴ na wɔka kyerɛɛ Yosua sɛ, ampa ara, AWURADE de asase no nyinaa ahyɛ yɛn nsa, na afei nso asase no sofo nyinaa koma atu wɔ yɛn anim.