Yosua 14 - KYERƐW KRONKRON

Yordan atɔe asase no kyekyɛ

¹ Na eyi ne Israel agyapade a wonyae Kanaan asase so a ɔsɔfo Eleasar ne Nun ba Yosua ne Israelfo mmusuakuw mu agyanom so atitiriw no kyekyɛ maa wɔn,

² wɔn agyapade a ɛnam ntontobɔ so, sɛnea AWURADE nam Mose so hyɛe sɛ wɔmma mmusuakuw akron ne fa no.

³ Na Mose ama mmusuakuw abien ne fa no agyapade wɔ Yordan agya, na Lewifo de, wamma wɔn agyapade bi wɔ wɔn mu.

⁴ Na Yosef mma yɛ mmusuakuw abien, Manase ne Efraim, na wɔamma Lewifo no kyɛfa bi asase no so, gye nkurow a wɔbɛtena mu ne ɛho mfikyisaase ma wɔn mmoa ne wɔn nneɛma.

⁵ Sɛnea AWURADE hyɛɛ Mose no, saa ara na Israelfo yɛe, na wɔkyɛɛ asase no mu.

Wɔde Hebron ma Kaleb

⁶ Na Yudafo no baa Yosua nkyɛn wɔ Gilgal; na Kenisini Yefune ba Kaleb ka kyerɛɛ no sɛ: Wo ara wunim me ne wo ho asɛm a AWURADE ka kyerɛɛ Onyankopɔn nipa Mose wɔ Kades-barnea no.

⁷ Midii mfirihyia aduanan na AWURADE akoa Mose somaa me fi Kades-barnea sɛ menkɔsra asase no, na mesan mede emu asɛm mebrɛɛ no, sɛnea ɛwɔ me koma mu.

⁸ Na me nuanom a wɔne me foro kɔɔ no maa ɔman no koma tui, na me de, me koma nyinaa midii AWURADE me Nyankopɔn akyi.

⁹ Na Mose kaa ntam da no ara sɛ: Asase a wo nan tiaa so no bɛyɛ wo ne wo mma agyapade daa, efisɛ wode wo koma nyinaa adi AWURADE wo Nyankopɔn akyi.

¹⁰ Na afei hwɛ, AWURADE ama matena ase sɛnea ɔkaa no, mfirihyia aduanan anum yi, efi bere a AWURADE kaa asɛm yi kyerɛɛ Mose, bere a Israel nam sare so no. Na afei, hwɛ, ɛnnɛ madi mfirihyia aduɔwɔtwe anum.

¹¹ Meda so mewɔ ahoɔden nnɛ ara, sɛnea mete da a Mose somaa me no; sɛnea m’ahoɔden te da no, saa ara na ɛte nnɛ ma ɔko ne adifi ne emuba.

¹² Na afei fa bepɔw yi a AWURADE kaa ho asɛm da no ma me, efisɛ da no ara, wotee sɛ Anakfo ne nkurow akɛse a wɔatoto ho afasu wɔ hɔ; ebia AWURADE bedi m’akyi na matu wɔn, sɛnea AWURADE kae no.

¹³ Na Yosua hyiraa no, na ɔde Hebron maa Yefune ba Kaleb sɛ n’agyapade.

¹⁴ Ɛno nti na Hebron yɛɛ Kenisini Yefune ba Kaleb agyapade de besi nnɛ, efisɛ ɔde ne koma nyinaa dii AWURADE, Israel Nyankopɔn no akyi.

¹⁵ Nso kan no na Hebron din ne Kiriat-arba; Arba yi ne Anakfo mu nipa kɛse koraa. Na asase no so dwoe fii akodi no mu.