Yohane 9 - KYERƐW KRONKRON

Onifuraefo bi adehu

¹ Na ɔretwam no, ohuu onipa bi a n’ani afura fi n’awo mu.

² Na n’asuafo no bisaa no sɛ: Rabi, hena na ɔyɛɛ bɔne, oyi anaa n’agya ne ne na, sɛ wɔwoo no onifuraefo yi?

³ Yesu buae sɛ: Ɛnyɛ oyi anaa n’agya ne ne na na wɔyɛɛ bɔne, na mmom sɛ Onyankopɔn nnwuma bɛda adi wɔ no mu.

⁴ Ɛsɛ yɛn sɛ adekyee wɔ hɔ yi, yɛyɛ nea ɔsomaa me no nnwuma; anadwo reba a obiara ntumi nyɛ adwuma.

⁵ Mewɔ wiase yi, mene wiase hann.

⁶ Ɔkaa saa no, ɔtow ntasu guu fam, na ɔde ntasu no fraa dɔte, na ɔde dɔte no sraa onifuraefo no ani so,

⁷ na ɔka kyerɛɛ no sɛ: Kɔ, kɔhohoro so ɔtare Siloa (a ne nkyerɛase ne: Nea wɔasoma no) mu. Ɛnna osiim kɔe kɔhohoroo so, na ɔbae na ohu ade.

N’afipamfo asɛmmisa

⁸ Ɛnna afipamfo ne wɔn a kan wohuu no sɛ ɔyɛ ɔsrɛsrɛfo no kae sɛ: Ɛnyɛ oyi na ɔte hɔ srɛsrɛ ade no?

⁹ Ebinom se: Ɔno ni! Na afoforo se: Ɔte sɛ ɔno. Na n’ankasa se: Mene no.

¹⁰ Ɛnna wɔbisaa no sɛ: Ɛyɛɛ dɛn na w’ani buei?

¹¹ Obua kae sɛ: Onipa bi a wɔfrɛ no Yesu na ɔfɔtɔw dɔte de sraa m’ani so, na ɔka kyerɛɛ me sɛ: Kɔ ɔtare Siloa mu kɔhohoro so. Na mekɔ mekɔhohoroo so no, na mihuu ade.

¹² Ɛnna wɔka kyerɛɛ no sɛ: Ɔwɔ he? Ose: Minnim.

Farisifo asɛmmisa

¹³ Wɔde nea anka ɔyɛ onifuraefo no kɔɔ Farisifo nkyɛn.

¹⁴ Nso da a Yesu fɔtɔw dɔte na obuee n’ani no yɛ homeda.

¹⁵ Ɛnna Farisifo no nso bisaa no bio sɛnea ɛyɛe na ohuu ade. Na osee wɔn sɛ: Dɔte na ɔde sraa m’ani so, na mekɔhohoroo so, na mihu ade yi.

¹⁶ Ɛnna Farisifo no mu bi kae sɛ: Onipa yi mfi Nyankopɔn nkyɛn, efisɛ onni homeda. Ebinom se: Ɛbɛyɛ dɛn na onipa ɔdebɔneyɛfo betumi ayɛ nsɛnkyerɛnne a ɛte sɛɛ yi? Na mpaepaemu baa wɔn mu.

¹⁷ Ɛnna wosee onifuraefo no bio sɛ: Wo nso, wabue w’ani yi, dɛn na woka wɔ ne ho? Na ose: Ɔyɛ odiyifo.

N’awofo hɔ asɛmmisa

¹⁸ Nso Yudafo no nnye ne ho nsɛm no nni, sɛ anka ɔyɛ onifuraefo na ohuu ade, de kosii sɛ wɔfrɛɛ nea ohuu ade no awofo,

¹⁹ na wobisaa wɔn sɛ: Mo ba a moka sɛ wɔwoo no onifuraefo no ni anaa? Afei ɛyɛɛ dɛn na ohu ade yi?

²⁰ N’awofo buaa wɔn kae sɛ: Yenim sɛ yɛn ba ni, na wɔwoo no onifuraefo;

²¹ na sɛ ɛyɛe na afei ohu ade yi de, yennim. Na bio nso onipa ko a obuee n’ani no, yɛn de, yennim; mummisa no, wanyin, na ɔno ara bɛkasa ama ne ho.

²² N’awofo kaa eyi, efisɛ wosuro Yudafo no; na Yudafo no apam dedaw sɛ, sɛ obi pae mu ka sɛ ɔne Kristo no a, wobetu no afi hyiadan mu.

²³ Eyi nti na n’awofo kae sɛ: Wanyin, mummisa no.

Farisifo pam no

²⁴ Ɛnna wɔfrɛɛ onipa a anka ɔyɛ onifuraefo no, mprenu so, na wosee no sɛ: Fa anuonyam ma Onyankopɔn! Yɛn de, yenim sɛ onipa yi yɛ ɔdebɔneyɛfo.

²⁵ Ɛnna obua kae sɛ: Sɛ ɔyɛ ɔdebɔneyɛfo a, minnim; ade biako na minim, sɛ anka meyɛ onifuraefo, na afei de, mihu ade.

²⁶ Na wosee no sɛ: Dɛn na ɔyɛɛ wo? Obuee w’ani no dɛn?

²⁷ Obuaa wɔn sɛ: Maka makyerɛ mo dedaw, na moante? Dɛn na mopɛ sɛ mote bio? Mo nso mopɛ sɛ modan n’asuafo?

²⁸ Wɔyaw no, na wɔkae sɛ: Wo na woyɛ ne suani; yɛn de, Mose asuafo ne yɛn.

²⁹ Yenim sɛ Onyankopɔn kasa kyerɛɛ Mose; na oyi de, yennim faako a ofi.

³⁰ Onipa no bua see wɔn sɛ: Eyi na ɛyɛ nwonwa sɛ munnim nea ofi, nanso obuee m’ani.

³¹ Na yenim sɛ Onyankopɔn ntie nnebɔneyɛfo; na sɛ obi fɛre Onyankopɔn na ɔyɛ nea ɔpɛ a, ɔno na otie no.

³² Efi wiase mfiase wɔntee sɛ obi abue nea wɔwoo no onifuraefo ani pɛn.

³³ Sɛ oyi mfi Nyankopɔn nkyɛn a, anka ɔrentumi nyɛ hwee.

³⁴ Wobua see no sɛ: Wo de, bɔne mu koraa na wɔwoo wo, na wo na wokyerɛkyerɛ yɛn? Na wɔpam no fii adi.

Onifuraefo no gye Yesu di

³⁵ Yesu tee sɛ wɔapam no afi adi; na ohuu no no, ɔkae sɛ: Wugye Onipa Ba no di anaa?

³⁶ Obuae sɛ: Hena ne no, Owura, na minnye no minni?

³⁷ Na Yesu see no sɛ: Woahu no, na nea ɔne wo rekasa yi, ɔne no.

³⁸ Na ose: Migye midi, Awurade! Na ɔkotow sɔree no.

Farisifo anifurae

³⁹ Na Yesu kae sɛ: Atemmu nti na mebaa wiase, na wɔn a wonhu ade no ahu, na wɔn a wohu ade no adan anifuraefo.

⁴⁰ Na Farisifo no mu bi a wɔne no wɔ hɔ no tee nsɛm yi, na wosee no sɛ: Na yɛn nso yɛyɛ anifuraefo?

⁴¹ Yesu bua see wɔn sɛ: Sɛ moyɛ anifuraefo a, anka munni bɔne; na afei muse: Yehu, enti na mo bɔne aka.