Yesaia 8 - KYERƐW KRONKRON

Wɔde Yesaia ba yɛ nsɛnkyerɛnne ma ɔman no

¹ Na AWURADE ka kyerɛɛ me sɛ: Fa kyerɛwpon kɛse, na fa ɔdesani krammɛn kyerɛw so sɛ: Ntɛm-so-asade, ɔhare-so-afow.

² Na mɛma adansefo anokwafo, ɔsɔfo Uria ne Yeberekia ba Sakaria adi me adanse.

³ Na mekɔɔ odiyifobea no ho, na onyinsɛnee, na ɔwoo ɔbabanin. Na AWURADE ka kyerɛɛ me sɛ: Frɛ ne din sɛ: Ntɛm-so-asade, ɔhare-so-afow.

⁴ Na abarimaa no nnya nhuu agya anaa ɛna frɛ no, wɔbɛsoa Damasko ahoɔden ne Samaria asade adi Asaria hene anim.

⁵ Na AWURADE toaa so ka kyerɛɛ me bio sɛ:

⁶ Esiane sɛ ɔman yi bu Siloa nsu a ɛsen brɛoo animtiaa na wɔn ho san wɔn Resin ne Remalia ba no ho nti,

⁷ hwɛ, Awurade de asubɔnten no mu nsu a ano yɛ den na ɛdɔɔso no reba wɔn so, Asaria hene ne n’anuonyam nyinaa; na ɛbɛba abɛforo ne suka nyinaa, na ayiri asram ne kɔn so nyinaa;

⁸ na ɛbɛsen afa Yuda mu ayiri akodu kɔn mu, na ne ntaban mu han adu w’asase trɛw so, O Imanuel.

⁹ Aman, monyɛ hoo, na monnwerɛw ara, asase a ɛwɔ akyirikyiri sofo nyinaa, monyɛ aso, mummia na monnwerɛw, mummia na monnwerɛw.

¹⁰ Muntu agyina na ɛbɛyɛ ɔkwa, monka asɛm na ɛrennyina, na Onyankopɔn ne yɛn wɔ hɔ.

Onyankopɔn mu gyidi ho kɔkɔbɔ

¹¹ Na sɛɛ na AWURADE de nsa dennen ka kyerɛɛ me, na ɔde teɛɛ me sɛ mennantew ɔman yi kwan so sɛ:

¹² Mommfrɛ ade a ɔman no frɛ no atirisopam no nyinaa sɛ atirisopam, na wɔnsuro nso munnsuro, na mo bo nntu.

¹³ Asafo AWURADE no, ɔno na monyɛ no kronkron, na ɔno na ɔnyɛ mo suro ne mo abotu.

¹⁴ Na ɔbɛyɛ kronkronbea, nso ɔbɛyɛ hintibo ne watiriw botan ama Israel afi abien no nyinaa, na wayɛ hentia ne afiri ama wɔn a wɔte Yerusalem no.

¹⁵ Na wɔn mu bebree bɛwatiriw, na wɔahwehwe ase na wɔabubu, na wɔatotɔ afiri mu na wɔayiyi wɔn.

¹⁶ Kyekyere adanse no, sɔw kyerɛ no ano, m’asuafo mu.

¹⁷ Na metwɛn AWURADE a oyi n’ani hintaw Yakob fi no, na m’ani da no so.

¹⁸ Hwɛ, me ne me mma a AWURADE ama me no fi asafo AWURADE a ɔte Sion bepɔw so no yɛ nsɛnkyerɛnne ne anwonwade, Israel mu.

¹⁹ Na sɛ wɔka kyerɛ mo sɛ: Mummisa asamanfrɛfo ne asumanfo a wɔde nnomaa su ne asutu kasa no a, so ɛnyɛ ɔman no Nyankopɔn na ɛsɛ sɛ wobisa ne hɔ ade? So awufo hɔ na wommisa ade mma ateasefo?

²⁰ Wonni mmara ne adanse no akyi! Sɛ wɔanka no sɛnea asɛm yi te a, ɛnne ade renkye wɔn.

Ahometew bere

²¹ Na wɔbɛfa asase no mu akɔ, na aden wɔn na ɔkɔm ade wɔn; na ɛbere a ɔkɔm rede wɔn no, wɔn ho bɛyeraw wɔn, na wɔadome wɔn hene ne wɔn Nyankopɔn, na wɔadannan wɔn ani akyerɛ soro,

²² na wɔahwɛ fam nso; nanso hwɛ, ahohia ne sum ni, ahoguan kusuuyɛ, na wɔasum wɔn agu sum kabii mu.