Yesaia 43 - KYERƐW KRONKRON

Onyankopɔn hyɛ bɔ sɛ obegye ne man

¹ Na afei, sɛ AWURADE a ɔbɔɔ wo, Yakob, na ɔnwenee wo, Israel, no ka ni: Nsuro, na magye wo, mabɔ wo din mafrɛ wo, me na wowɔ me.

² Sɛ woretwa nsu a, me ne wo na ɛwɔ hɔ; na sɛ worefa nsubɔnten mu a, ɛremfa wo nkɔ. Sɛ wonam ogya mu a, ɛrenhyew wo, na ogyaframa renhyew wo.

³ Na me, AWURADE, mene wo Nyankopɔn, Israel kronkronni, wo gyefo no. Mede Misraim ayɛ agyede ama wo, mede Etiopia ne Saba masi w’ananmu.

⁴ Sɛ wosom bo m’anim, w’anim aba nyam na me na madɔ wo nti, mede nnipa mɛma masi w’ananmu, na mede aman bi masi wo kra ananmu.

⁵ Nsuro, na me na me ne wo te. Mede w’asefo mefi apuei aba, na mafi atɔe maboa wo ano;

⁶ mɛka makyerɛ atifi fam sɛ: Fa ma! Na maka makyerɛ anafo fam sɛ: Nkora so! Fa me mmabanin fi akyirikyiri bra, ne me mmabea fi asase ano:

⁷ Obiara a wɔbɔ me din frɛ no, na mebɔɔ no memaa m’anuonyam, menwenee no na meyɛɛ no no.

AWURADE ne nokware Nyankopɔn

⁸ Fa ɔman a wɔyɛ anifuraefo nanso wɔwɔ aniwa no fi bra, ɛne asotifo a wɔwɔ aso no.

⁹ Amanaman nyinaa, munhyia faako, na aman horow mmoa ano. Mo mu hena na ɔbɛka eyi? Na kan nneɛma no, wɔmma yentie! Wɔmma wɔn adansefo mmra, na wonni bem; anaa wɔnte, na wɔnka sɛ: Nokware!

¹⁰ Mone m’adansefo, AWURADE na ose, ne m’akoa a mayi no no, sɛ munhu na munnye me nni, na munhu mu sɛ me ara mene no. Wɔnnwenee onyame bi m’anim ɛ, na m’akyi nso obiara remma.

¹¹ Me, mene AWURADE, na ogyefo bi nni hɔ sɛ me!

¹² Me na maka, na magye nkwa, na mama wɔate, na ɔfoforo bi nni mo mu; na mone m’adansefo, AWURADE na ose.

¹³ Mene Nyankopɔn, na efi nnɛ nso, mene no, na obi nni hɔ a oyi fi me nsam; mɛyɛ ade, na hena na ɔbɛdan ani?

Onyankopɔn yɛ odimafo

¹⁴ Sɛ AWURADE, mo dimafo, Israel kronkronni no se ni: Mo nti mɛsoma akɔ Babel, na mabubu adaban nyinaa, na mama Kaldeafo ahurusidi adan adwotwa.

¹⁵ Me, AWURADE, mene mo kronkronni, Israel bɔfo, mo hene no.

¹⁶ Saa na AWURADE se, nea ɔma ɛpo mu da ɔkwan na ɔsa da asu a ɛyɛ den mu no,

¹⁷ nea ɔmaa nteaseɛnam ne apɔnkɔ, ɛdɔm ne nnɔmmarima fii adi no, wɔn nyinaa dedae, na wɔansɔre bio, wɔsae, wodunnumii sɛ asaawa,

¹⁸ Monnkae kan nsɛm, na munnnwen atetede.

¹⁹ Hwɛ, mereyɛ ade foforo bi, afei na ɛrefifi, so munhu? Mɛbɔ sare so kwan, mɛma nsubɔnten aba anwea pradada so.

²⁰ Wuram mmoadoma bɛhyɛ me anuonyam, sakraman ne nsohori, sɛ mama nsu aba sare so na nsubɔnten aba anwea pradada so, na mede mama me man a mapaw wɔn no anom,

²¹ ɔman a manwene wɔn mafa no, na wɔaka m’ayeyi akyerɛ.

Onyankopɔn dom

²² Nanso ɛnyɛ me na wofrɛɛ me, O Yakob, na me ho ayɛ wo mfonee, o Israel!

²³ Woammrɛ me wo hyew afɔre nguan, na woamfa w’afɔre anhyɛ me anuonyam; mamma woamfa aduan afɔre ansom me, na mamma woammrɛ aduhuam ho;

²⁴ woamfa dwetɛ antɔ ahwerew amma me, na woamma w’afɔre srade ammee me, na mmom, wode wo bɔne yɛɛ m’adesoa, na wode w’amumɔyɛ ma mebrɛe.

²⁵ Me, me ara, mene nea ɔpopa wo mmarato, me ara nti, na wo bɔne nso, merenkae.

²⁶ Bɔ me sobo ɛ, na yemmeyiyi ntɛn; wo de, ka w'asɛm, na woadi bem.

²⁷ W’agya a odi kan no ayɛ bɔne, na wo kasamafo afomfom me,

²⁸ enti na mahura kronkronbea hɔ mmapɔmma no ho, na mayi Yakob mama mmusu, na mede Israel mama adapaabɔfo.