Yesaia 3 - KYERƐW KRONKRON

Basabasayɛ wɔ Yerusalem

¹ Na hwɛ, AWURADE, asafo AWURADE, beyi Yerusalem ne Yuda akyidua nyinaa, akyidua sɛ nnwumayɛfo nyinaa, akyidua sɛ aduan nyinaa ne akyidua sɛ nsu nyinaa,

² dɔmmarima ne ɔkofoni, ɔtemmufo ne odiyifo, nkɔmhyɛfo ne ɔpanyin,

³ aduonum so asafohene ne onuonyamfo, ne ofotufo ne dwumfo mu nyansafo, ne nea onim ntafowayi.

⁴ Na mede mmerantewa mayɛ wɔn asafohene, na mmotafowa adi wɔn so.

⁵ Na nkurɔfo no bɛkɔ ɔhaw mu, oyi ne oyi, onipa ne ne yɔnko; aberantewa bɛkyerɛ ne ho ɔteteni so, na apapahwekwa nso, onuonyamfo so.

⁶ Obi mpo bɛkyere obusuani ne nua a ɔwɔ n’agya fi mu sɛ: Wowɔ atade, bɛyɛ yɛn panyin, na ɔhaw pii yi mmra wo nsa ase a,

⁷ Nanso ɔbɛma ne nne so da no sɛ: Merenyɛ mo yaresafo, na me fi nso, aduan nni hɔ na atade nni hɔ, munnsi me ɔman panyin.

⁸ Na Yerusalem adwiriw, na Yuda ahwe ase, efisɛ wɔn tɛkrɛma ne wɔn nneyɛe ne AWURADE di asi, sɛ wɔbɛtew n’anuonyam anim atua.

⁹ Wɔn anim su di wɔn adanse, na wɔka wɔn bɔne sɛ Sodomfo, wonsiw so. Wonnue! Na wɔde bɔne yɛ wɔn ho.

¹⁰ Monka ɔtreneeni ho sɛ obedi yiye, na wobedi wɔn nneyɛe so aba.

¹¹ Ao, ɔbɔnefo nnue: Na obedi mmusu, na ne nneyɛe so ade na wɔde bɛma no.

¹² Me man de, mmofra na ɛhyɛ no so, na mmea di no so. Ao me man, w’akwankyerɛfo yɛ nnaadaafo, na w’atempɔn no, wɔamene.

¹³ AWURADE asɔre redi asɛm, na wabegyina hɔ rebu aman atɛn;

¹⁴ AWURADE reba abebu ne man mpanyimfo ne n’asafohene atɛn, efisɛ mo na moadi bobeturo no, ɔbrɛfo asade wɔ mo afi;

¹⁵ mokyerɛ dɛn sɛ mopɛtɛw me man, na modwɛre abrɛfo anim? AWURADE, asafo AWURADE, asɛm ni.

Wɔbɔ Yerusalem mmea kɔkɔ

¹⁶ Na AWURADE aka sɛ: Esiane sɛ Sion mmabea yɛ ahantan na wɔtoto wɔn kɔn deda wɔn ani akyi nantew, na wɔde anammɔn ntiantia nenam ma wɔn nan ase nkaa gyigye nti,

¹⁷ Awurade bɛma atikuru agu Sion mmabea mpampam, na AWURADE beyi wɔn adagyaw so.

¹⁸ Ɛda no Awurade beyi mfɛfɛwade no, nan ase nkaa ne ntamma ne asramfa,

¹⁹ asom nnwinne ne nkapo ne animkata ntontan,

²⁰ abotiri ne anan ntam ntweaban ne abɔso ne ohuam ntoaa ne mmansere,

²¹ mpɛtea ne hwenem nnwinne,

²² ntade nsakraho ne ntade yuu ne nguguso ne sika nkotoku,

²³ nhwehwɛ ne nwera pa ne ntamabamma ne nkataanim.

²⁴ Na ohuam ananmu na ɔbon besi, na ntampe asi abɔso ananmu, na tipae asi mmɛsa ananmu, na ayitama asi atade ananmu, na ɔhyew twa asi ahoɔfɛ ananmu.

²⁵ Wo nnipa bɛtotɔ nkrante ano, ne wo nnɔmmarima ɔsa mu;

²⁶ na n’apon bedi obooboo na atwa adwo, na ɔbɛda mpan na watena fam.