Yesaia 16 - KYERƐW KRONKRON

Moab ho atemmusɛm

¹ Momfa nguammaa mfi Sela mfa anwea so fam nkɔ Sion babea bepɔw no so nkɔma asase no sodifo no.

² Na Moab mmabaa bɛyɛ sɛ nnomaa a wotu kyini, sɛ berebuw a wɔayi, Arnon asutwaree.

³ Tu fo, bu atɛn; ma wo nwini nyɛ sɛ anadwo, awia ketee; fa wɔn a wɔapam wɔn hintaw, nyi aguanfo mma;

⁴ ma wɔn a wɔapam wɔn afi Moab no nsoɛ wo nkyɛn, yɛ wɔn hintabea, ɔsɛefo anim! Na opoobɔfo agyae, na ɔsɛe to atwa, na nhyɛsofo nsa asase no so.

⁵ Na wɔbɛma agua bi atim, adɔeyɛ so, na obi atena so, nokware mu, wɔ Dawid ntamadan mu a obu atɛn na ɔpɛ atɛntrenee, na ɔyɛ adetrenee ntɛm.

⁶ Yɛate Moab homan a wahoman dodo, sɛnea n’ahomaso te, n’ahantan ne n’ahokyerɛ ne n’anuɔden ne ahoahoasɛm huhuw no.

⁷ Enti ma Moab ntwa adwo, ma wɔn nyinaa ntwa Moab ho adwo, di awerɛhow pii wɔ Kir-hareset bobe aba tetare ho.

⁸ Na Hesbon mfuw ahome tew; na Sibma bobe, a n’abaa ma aniwa yɛ twann no, amanaman wuranom koduu Yaser, na ekyinii koduu anwea so, n’abaa trɛtrɛwee koduu amanaman so ma ekotwaa po.

⁹ Enti mede Yaser su misu Sibma bobe no, mede nusu migu wo so, Hesbon ne Eleale, na wo nnuaba ne w’abatew so na ɔko nteɛteɛm aba;

¹⁰ na wɔayi anigye ne ahosɛpɛw afi mfuw pa mu, na wɔnte ahurusi dwom anaa nteɛteɛm, bobe nturo mu, na nsakyifo nkyi nsa-kyi-amoa mu nsa, atiatiafo dwom nso, matwa so.

¹¹ Enti me kra ho yeraw no Moab ho sɛ ɔsanku, me yam nso hyehye me Kir-heres ho.

¹² Na sɛ Moab yi ne ho adi ba besu, na ɔbrɛ ne ho wɔ sorɔnsorɔmmea hɔ, na ɔhyɛn ne kronkronbea bɛbɔ mpae a, ɔrentumi nyɛ hwee.

¹³ Eyi ne asɛm a AWURADE aka atia Moab dedaw;

¹⁴ na afei AWURADE rekasa sɛ: Ɛha mfe abiɛsa a ɛte sɛ ɔpaani mfe no Moab anuonyam bɛsopa, ɔne ne nnipa dodow no nyinaa; na nkae no bɛyɛ kakraa bi a wɔnyɛ den.