Yeremia 12 - KYERƐW KRONKRON

Asɛmmisa ne nkɔmmɔdi

¹ AWURADE, sɛ me ne wo bɔ nkuro a, wobedi bem ara; nanso me ne wo bɛkasa ara: Ɛdɛn nti na abɔnefo kwan si yiye na nkɔnkɔnsafo nyinaa nso ho dwo wɔn?

² Wotɛw wɔn, na wogye ntini; wonyinnyin na wɔsosow aba nso; wobɛn wɔn ano, na wo ne wɔn asaabo ntam pan.

³ Nanso wo, AWURADE, wunim me; wuhu me, na wosɔ me koma hwɛ, sɛ ɛte wo fam! Tutu wɔn sɛ nguan a wɔrekokum wɔn, na hyira wɔn so sie okum da.

⁴ Enkosi da bɛn na asase no nni nkɔmmɔ, na afum ahaban ntwintam? Ɛsofo bɔne no nti mmoa ne nnomaa awie sa, efisɛ wɔka sɛ: Ɔrenhu yɛn awiei.

AWURADE ma Yeremia mmuae

⁵ Sɛ wo ne anammɔnmufo po tu mmirika na wɔma wobrɛ a, ɛnne ɛbɛyɛ dɛn na wo ne apɔnkɔ besi ammirikakane? Na sɛ asase a ɛso da hɔ no so po, wohwe ase a, ɛnne wobɛyɛ dɛn Yordan kwae no mu?

⁶ Na wo nuanom nso ne w’agya fi, wɔn po twa wo nkontompo, wɔn nso teɛm dennen di w’akyi; sɛ wɔka adɔkɔdɔkɔsɛm kyerɛ wo a, nnye wɔn nni.

⁷ Magyaw me fi, matow m’agyapade magu; mede me kra adɔde mahyɛ n’atamfo nsa.

⁸ M’agyapade adan me sɛ kwae mu gyata; wama ne nne so ahyɛ me, enti mikyi no.

⁹ So m’agyapade adan me ɔkɔre a ɔdɛnsow? So akɔre atwa ne ho ahyia? Monkɔ nkɔboaboa wuram mmoadoma nyinaa ano mmra, na wommedidi.

¹⁰ Mmoahwɛfo pii asɛe me bobeturo atiatia me kyɛfa so, wɔadan me kyɛfa fɛfɛ no ayɛ no sare pradada;

¹¹ wɔasɛe no pasaa, ayɛ dwerɛbee na esu frɛ me; wɔasɛe asase no nyinaa, nso obi nni hɔ a ɔde sie ne koma mu.

¹² Asɛefo aba sare so mpampa nyinaa so, na AWURADE afoa retwitwa afi asase ano akosi asase ano; asomdwoe bi nni hɔ mma ɔhonam biara.

¹³ Woguu awi, na wotwaa nsɔe; wɔbrɛe, na wɔannya mu hwee. Na mo ani bewuwu mo nnɔbae ho, AWURADE abufuhyew no ano.

AWURADE bɛdom wɔn a wonu wɔn ho no

¹⁴ Sɛɛ na AWURADE ka wɔn a wɔtete me ho no nyinaa ho: Nnipa bɔne a wɔde wɔn nsa aka agyapade a mede memaa me man Israel sɛ wonni no, hwɛ, meretutu wɔn afi wɔn asase so, na metu Yuda fi mafi wɔn mu.

¹⁵ Na matu wɔn no, akyi no, mɛsan mahu wɔn mmɔbɔ, na mede wɔn nyinaa masan maba wɔn agyapade mu ne wɔn asase so mmiako mmiako.

¹⁶ Na sɛ wobesua me man akwan yiye aka me din ho ntam sɛ: Sɛ AWURADE te ase yi, sɛnea wɔkyerɛɛ me man sɛ wɔnka Baal ntam no a, ɛnne wɔde wɔn besisi me man mu.

¹⁷ Na sɛ wɔantie a, ɛnne metutu saa ɔman no magu, na metutu na maseɛ wɔn, AWURADE asɛm ni.