Yakobo 3 - KYERƐW KRONKRON

Ɔkasa mu ahosohwɛ

¹ Me nuanom, monnyɛ akyerɛkyerɛfo bebree, na munim sɛ yebenya afobu kɛse mmom.

² Efisɛ yɛn nyinaa fom nneɛma pii mu. Sɛ obi mfom asɛm mu a, ɔno ara na ɔyɛ onipa a owie pɛyɛ a obetumi ato nipadua nyinaa nnareka adi so.

³ Yɛde nnareka to apɔnkɔ anom sɛ wontie yɛn, na yɛdannan wɔn aboa mu nyinaa.

⁴ Hwɛ, ɛhyɛn nso a ɛsosoe sɛɛ, na mframa a emu yɛ den pia no, wɔde kudɔɔ ketewaa na ɛdannan no kɔ baabiara a hyɛn kwankyerɛfo no pɛ.

⁵ Saa ara na tɛkrɛma nso yɛ ɔhonam akwaa mu ketewa, nanso ɛhoahoa ne ho ade kɛse ho. Ogya ketewa nso, monhwɛ kwae kɛse a ebetumi ahyew!

Bɔne a tɛkrɛma tumi yɛ

⁶ Na tɛkrɛma nso yɛ ogya. Tɛkrɛma wɔ yɛn akwaa mu a ɛyɛ nea ɛnteɛ. Ɛde nkekae keka nipadua nyinaa, na ɛsɔ nkwa nkyimii a etwa ne ho fi awo mu no, na efi amanehunu kurow no mu na wɔasɔ ano.

⁷ Na ntɔteboa ne ntakraboa ne mmoa a wɔwea ne mmoa a ɛwɔ po mu su nyinaa, nnipa de wɔn su dwudwo wɔn, na wɔadwudwo wɔn.

⁸ Na tɛkrɛma de, onipa biara ntumi nnwudwo no, ɛyɛ ade bɔne a ɛyɛ keka, awuduru ayɛ no ma.

⁹ Ɛno na yɛde hyira Awurade ne agya no, ɛno ara nso na yɛde dome nnipa a wɔayɛ wɔn Onyankopɔn suban so.

¹⁰ Ano koro no ara mu na nhyira ne nnome fi. Me nuanom, ɛnsɛ sɛ eyinom ba saa!

¹¹ So asuti bi fi nsu dɛdɛ ne nwenenwene wɔ ani koro mu?

¹² Me nuanom, so borɔdɔma betumi asow ngodua aba? Anaasɛ obobe betumi asow borɔdɔma? Saa ara nso na asuti nkyenenkyene rentumi mma nsu pa.

Nokware nyansa

¹³ Mo mu hena na ɔyɛ onyansafo ne nimdefo? Ɔmfa ɔbra pa nkyerɛ ne nnwuma wɔ odwo a nyansa wɔ mu mu.

¹⁴ Na sɛ mowɔ nitammɔne ne atutuw mo koma mu a, ɛnne monnhoahoa mo ho, na munnni atoro nntia nokware.

¹⁵ Saa nyansa yi mfi soro, na mmom ɛyɛ fam ne ɔkra ne ahonhommɔne de.

¹⁶ Na nea nitan ne atutuw wɔ no, ɛhɔ na sakasaka ne nneyɛe bɔne nyinaa wɔ.

¹⁷ Na nyansa a efi soro no de, nea edi kan ne sɛ ɛho tew, ɛwɔ asomdwoe, ɛwɔ odwo, ɛwɔ asoɔmmerɛw; mmɔborohunu ne aba pa ayɛ no ma, ennye akyinnye, ɛnyɛ nyaatwom.

¹⁸ Na wogu trenee aba asomdwoe mu ma wɔn a wɔyɛ asomdwoe ade.