Nnwom 9 - KYERƐW KRONKRON

Onyankopɔn atemmu ho aseda dwom

Wɔde ma dwonkyerɛfo sɛ wɔnto no “Mut labben! sanku nne so. Dawid dwom”

¹ Mede me koma nyinaa bɛda AWURADE ase, AWURADE, mɛka w’anwonwade nyinaa akyerɛ.

² Megye m’ani na madi ahurusi wɔ wo mu, mɛto wo a wowɔ sorosoro no din ho ayeyi dwom.

³ Efisɛ m’atamfo asan wɔn akyi, wɔatotɔ, na wɔayera w’anim.

⁴ Woatena atemmu agua so abu atɛntrenee, woadi m'asɛm abu me bem.

⁵ Woateɛteɛ amanaman, woasɛe abɔnefo, woapopa wɔn din korakorakora.

⁶ Atamfo awie sa, wɔadan daa amamfo, na wɔn nkurow ase ahyew, wɔn nkae ayera.

⁷ Na AWURADE de, ɔte n’ahengua so daa, ɔde n’agua asi hɔ rebu atɛn.

⁸ Ɔno na obebu wiase atɛntrenee mu, na wadi aman asɛntrenee mu.

⁹ AWURADE bɛyɛ guankɔbea ama nea wɔrepɛtɛw no, ahokyere bere mu guankɔbea.

¹⁰ Na wɔn a wonim wo din de wɔn ho bɛto wo so, efisɛ woannyaw wɔn a wɔhwehwɛ wo, AWURADE.

¹¹ Monto ayeyi dwom mma AWURADE a ɔte Sion, monka ne nneyɛe nkyerɛ, aman mu,

¹² sɛ, nea odi mogya so were no akae wɔn, na ne werɛ amfi abrɛfo nteɛm.

¹³ AWURADE, hu me mmɔbɔ, hwɛ m’amane a efi m’atamfo, wo a woma me so fi owu abobow ano,

¹⁴ na menka w’ayeyi nyinaa menkyerɛ, Sion babea aponkɛse mu, na minni ahurusi wo nkwagye mu.

¹⁵ Amanaman amemem amoa a wotui no mu, afiri a wosum hintawee no ayi wɔn ankasa.

¹⁶ AWURADE ayi ne ho adi, wabu atɛn, ɔde ɔbɔnefo nsam nneyɛe atoatoa no.

¹⁷ Abɔnefo bɛsan akɔ Asamando, amanaman a wɔn werɛ afi Nyankopɔn nyinaa.

¹⁸ Na ɛnyɛ daa na ne werɛ befi ohiani, na ɛnyɛ daa na mmɔborohununi anidaso bɛyera.

¹⁹ AWURADE, sɔre, mma ɔdesani nnni nim, ma wommu amanaman atɛn, w’anim.

²⁰ AWURADE, yi wɔn hu, na amanaman nhu sɛ wɔyɛ adasamma.