Nnwom 86 - KYERƐW KRONKRON

Ahohia kɛse mu mpaebɔ

Dawid mpaebɔ

¹ AWURADE, brɛ w’aso ase tie me, na meyɛ mmɔboroni ne hiani.

² Hwɛ me kra so, na meyɛ ɔhotefo, wo, me Nyankopɔn, gye w’abofra a ɔde ne ho tweri wo.

³ O, AWURADE hu me mmɔbɔ, na wo na misu mefrɛ wo daa adesae.

⁴ Ma w’akoa kra ani nnye, na wo, Awurade, na mema me kra so mema.

⁵ Na wo, Awurade, wuye, na wode kyɛ, na w’adɔe dɔɔso ma wɔn a wɔfrɛ wo nyinaa.

⁶ AWURADE, yɛ aso ma me mpaebɔ, na tie me nkotɔsrɛ nne.

⁷ M’ahohia da mu mefrɛ wo, na wubegye me so.

⁸ Obiara nte sɛ wo, anyame mu, Awurade, na biribiara nte sɛ wo nnwuma.

⁹ Amanaman a woyɛe nyinaa bɛba abɛkotow w’anim, Awurade, na wɔabɛhyɛ wo din anuonyam.

¹⁰ Na woyɛ kɛse, na woyɛ anwonwade, wo nkutoo ne Nyankopɔn.

¹¹ AWURADE, kyerɛ me wo kwan, mɛnantew wo nokware mu, ka me koma bom ma ensuro wo din.

¹² O Awurade, me Nyankopɔn, mede me koma nyinaa mɛda wo ase, na mahyɛ wo din anuonyam daa,

¹³ sɛ w’adɔe so wɔ me so, na woayi me kra afi asaman bun mu.

¹⁴ Onyankopɔn, ahantanfo asɔre ahyɛ me, na atirimmɔdenfo asafo rehwehwɛ me kra, na wɔamfa wo ansi wɔn ani so.

¹⁵ Na wo, Awurade, woyɛ Onyankopɔn mmɔborohunufo ne ɔdomfo, wo boasetɔ kyɛ, na w’adɔe ne wo nokware dɔɔso.

¹⁶ Dan w’ani kyerɛ me, na dom me, fa w’ahoɔden ma w’akoa, na gye w’afenaa ba nkwa.

¹⁷ Yɛ me ho sɛnkyerɛnne ma ensi me yiye, na m’atamfo nhu, na wɔn ani nwu, sɛ wo, AWURADE, woaboa me akyekye me werɛ.