Nnwom 83 - KYERƐW KRONKRON

Israel atamfo

Asaf dwom

¹ Onyankopɔn, nyɛ komm, mmua w’ano, na nhome, Onyankopɔn.

² Na hwɛ, w’atamfo yɛ gyegyeegye, na wɔn a wokyi wo ama wɔn ti so.

³ Wo man tiri so na wɔrepam anyansapam, na wɔkɔ wɔn a wɔahintaw no ti so agyina.

⁴ Wɔka sɛ: Mommra mma yɛntɔre wɔn ase mfi ɔman no mu, na wɔankae Israel din bio.

⁵ Na wɔde koma koro tu agyina, wo tiri so na wɔpam.

⁶ Edom ntamadan ne Ismaelfo, Moab ne Hagarfo,

⁷ Gebal ne Amon ne Amalek, Filistifo asase ne wɔn a wɔte Tiro.

⁸ Asaria nso de ne ho bataa wɔn ho, wɔaboa Lot mma. Sela

⁹ Yɛ wɔn sɛ Midian, sɛ Sisera, sɛ Yabin, Kison subon mu.

¹⁰ Wɔsɛee wɔ En-dor, na wɔyɛe sɛ nwura dodow maa asase.

¹¹ Yɛ wɔn ne wɔn adehye sɛ Oreb ne Seeb, na yɛ wɔn ahemfo nyinaa sɛ Sebah ne Salmuna,

¹² wɔn a wɔka sɛ: Momma yɛmfa Onyankopɔn afi nni no.

¹³ Me Nyankopɔn, yɛ wɔn sɛ ahum a edi kyinhyia, sɛ mframa anim ntɛtɛwa.

¹⁴ Sɛ ogya hyew kwae na ogyaframa taforo mmepɔw ho no,

¹⁵ saa ara na fa w’ahum taa wɔn, na fa wo mframa dennen no yi wɔn hu.

¹⁶ AWURADE, ma wɔn ani nwu, na wommisa wo din akyi kwan.

¹⁷ Ma wɔn anim ngu ase na wɔmmɔ twi daa, na wɔmmɔ adapaa na wɔnyera,

¹⁸ na wonhu sɛ wo a wo din de AWURADE no, wo nko ara ne ɔsorosoroni, asase nyinaa so.