Nnwom 81 - KYERƐW KRONKRON

Nokware afahyɛ

Wɔde ma dwonkyerɛfo sɛ wɔnto no Gatfo sanku nne so. Asaf de

¹ Mommɔ ose mma Onyankopɔn, yɛn ahoɔden, munhuro mma Yakob Nyankopɔn.

² Monto dwom na monyan mpintin, mommɔ sanku dɛdɛ ne bɛnta sanku.

³ Monhyɛn torobɛnto ɔsram foforo so, ɔsram korokumatwa mu, mma yɛn afahyɛ da.

⁴ Na ɛnyɛ sɛnnahɔ mma Israel, atɔremude mma Yakob Nyankopɔn.

⁵ Ɔde adi adanse, Yosef mu, ɛbere a ofii adi faa Misraim asase so, metee obi a minnim no kasa.

⁶ Miyii ne mmati fii adesoa ase, ne ne nsa fii kyerɛnkyɛ ho;

⁷ wofrɛe ahohia mu, na miyii wo wɔ mu, mifi ɔprannaa mu migyee wo so. Mesɔɔ wo mehwɛe Meriba asu ho. Sela

⁸ Me man, tie, na minni wo adanse! O, Israel, sɛ wubetie me ɛ!

⁹ Mma Onyame nanani bi nntena wo mu, na nsɔre onyame nanani biara.

¹⁰ Me ara mene AWURADE wo Nyankopɔn a miyii wo Misraim asase so mebae no, tɛɛ w’anom tɛtrɛɛ na menhyɛ no ma.

¹¹ Nanso me man antie me nne, na Israel ampene me.

¹² Na migyaa wɔn wɔn koma denyɛ mu, ma wɔnantew wɔn ankasa tirim agyina a wotuu mu.

¹³ Ao, sɛ me man tie me ɛ, sɛ Israel nantew m’akwan so ɛ!

¹⁴ Anka ɛnkyɛ na mabrɛ wɔn atamfo ase, na madan me nsa mahyɛ wɔn ahohiafo.

¹⁵ Anka AWURADE atamfo bɛbrɛ wɔn ho ase ama no, na wɔn bere akyɛ akosi daa.

¹⁶ Na ɔde awi mu awi pa bɛyɛn wɔn, na mede abotan mu wo mɛma woamee.