Nnwom 73 - KYERƐW KRONKRON

NHOMA A ƐTO SO ABIƐSA ( Nnwom 73—89 ) Gyidi mu tumi

Asaf dwom

¹ Ampa ara, Onyankopɔn ye ma Israel, ma wɔn a wɔn komam tew.

² Na me de, anka me nan reyɛ aman, m’anammɔn rekame awatiriw.

³ Na metwee ahupoofo ho ninkunu, efisɛ mihuu abɔnefo yiye a wodi no.

⁴ Wonhu owu mu aninyanne, na wɔwɔ ɔhonam ne ahoɔden.

⁵ Ɔdesani haw de, wonni bi, nanso wonguan wɔn ho sɛ nnipa binom.

⁶ Enti ahantan adi wɔn kɔn ho barehyia, na akokobirisɛm asi wɔn adurade.

⁷ Srade ama wɔn ani apupuw, wɔn komam adwene fi bu so.

⁸ Wosi atwetwe na wɔde tibɔne ka amimdi asɛm, wɔka akokurokosɛm.

⁹ Wɔma wɔn ano to ɔsoro, na wɔn tɛkrɛma nenam asase so.

¹⁰ Enti wɔn nkurɔfo twiw bɛdan wɔn, na wonya nsu kuruwa ma nom.

¹¹ Na wose: Ɛbɛyɛ dɛn na Onyankopɔn behu, so nimdeɛ wɔ ɔsorosoroni no tirim anaa?

¹² Hwɛ, eyinom ne abɔnefo, nanso wɔn ho dwo wɔn daa, wɔama wɔn ade adɔɔso.

¹³ Ampa ara, matew me koma ho kwa, na mahohoro me nsa bemdi mu kwa,

¹⁴ nanso wɔahaw me daa adesae na wɔatwe m’aso daa anɔpa.

¹⁵ Sɛ mise: Mɛka no sɛɛ de a, anka matwa wo mmasanten nkontompo.

¹⁶ Na misusuw ho sɛ mehu ade yi, ɛyɛɛ m’ani so den dodo,

¹⁷ kosii sɛ mekɔɔ Onyankopɔn kronkron mu hɔ mikohuu nea akyiri kowie wɔn.

¹⁸ Ampa ara, wode wɔn gyina nea ɛhɔ yɛ toro, wode wɔn hwe fam bubu wɔn pasaa.

¹⁹ Hwɛ sɛ wɔadan sɛ amamfo mprempren yi ara, ehu ama wɔawie sa.

²⁰ Sɛ ɔdae a wɔaso anyan, na wo, AWURADE, wohwanyan wo ho a, woma ani pa wɔn sunsumaban so.

²¹ Sɛ ɛyɛ me koma awerɛhow na m’asaabo mu wowɔ me a,

²² anka meyɛ ɔkwasea a minnim de, na mayɛ sɛ aboa, w’ani so.

²³ Na me de, mɛtena wo nkyɛn daa yi, woaso me nsa nifa mu.

²⁴ Wonam w’atirimpɔw so kyerɛkyerɛ me kwan, na akyiri no, woagye me akɔ anuonyam mu.

²⁵ Hena na mewɔ no ɔsoro? Na sɛ wowɔ me a, menhwehwɛ asase so hwee.

²⁶ Ma me honam ne me koma nwie sa, Onyankopɔn ne me koma botan ne me kyɛfa daa.

²⁷ Na hwɛ, wɔn a wofi wo nkyɛn kɔ akyiri no bɛyera, wobɛsɛe wɔn a wofi wo nkyɛn kɔbɔ aguaman nyinaa.

²⁸ Na me de, Onyankopɔn nkyɛn tena ye ma me, mede AWURADE mayɛ me guankɔbea, na maka wo nnwuma nyinaa.