Nnwom 72 - KYERƐW KRONKRON

Asomdwoe hene ne n’ahenni

Solomon de

¹ Onyankopɔn, fa w’atemmu ma ɔhene, ne wo trenee ma ɔhene ba.

² Ma ɔmfa trenee nni wo man so, na ɔmfa atemmu nhwɛ w’amanehunufo.

³ Mmepɔw bɛsow asomdwoe ama ɔman, na nkoko nso de trenee aba.

⁴ Obedi ɔman mu amanehunufo asɛm ama wɔn, na wagye ahiafo mma nkwa, na wabubu nhyɛsofo mu pasapasa.

⁵ Owia ne ɔsram da so wɔ hɔ yi, wobesuro wo, awo ntoatoaso nyinaa mu.

⁶ Ɔbɛba sɛ osu a ɛtɔ gu sare a wɔahuw so so, sɛ osu kɛse a ɛtɔ dwudwo asase mu.

⁷ Ɔtreneeni besi frɔmm, ne bere so, na asomdwoe pii bɛba akodu sɛ ɔsram nni hɔ bio.

⁸ Obedi hene afi po so akosi po so, de afi asubɔnten no so akosi asase ano.

⁹ Wɔn a wɔte sare so bɛkotow n’anim, na n’atamfo ataforo mfutuma.

¹⁰ Tarsis ne nsupɔw mu ahene bɛba abɛyɛ ayɛ, Saba ne Seba ahene bɛba abɛkyɛ ade.

¹¹ Na ahene nyinaa bɛkotow asɔre no, amanaman nyinaa bɛsom no.

¹² Na obegye ohiani a osu frɛ no, ne ɔmanehunufo a onni boafo.

¹³ Ɔbɛkora ɔbrɛfo ne ohiani so, na wagye ahiafo kra nkwa.

¹⁴ Obegye wɔn kra afi nhyɛso ne atirimɔdensɛm mu, na wɔn mogya bo ayɛ den n’anim.

¹⁵ Na obenya nkwa, na ɔde Seba sika no bi bɛma no, na ɔno nso bɛbɔ mpae ama no daa, ahyira no daa adesae.

¹⁶ Asase no so aburofuw bedu mmepɔw atifi, ɛso aba bɛwosow sɛ Lebanon, na nkurow no asoa sɛ asase so wura.

¹⁷ Ne din bɛtena hɔ daa, na owia wɔ hɔ yi, ne din asi so, na nnipa de no ahyira wɔn ho, na amanaman nyinaa ahyira no.

¹⁸ Nhyira ne AWURADE Nyankopɔn, Israel Nyankopɔn a ne nko yɛ anwonwade,

¹⁹ na nhyira ne n’anuonyam din daa, na n’anuonyam nhyɛ asase nyinaa ma. Amen ne Amen.

²⁰ Yese ba Dawid mpaebɔ asa.