Nnwom 7 - KYERƐW KRONKRON

Onyankopɔn bu atɛntrenee

Dawid adesrɛ dwom a Benyaminni Kus nsɛm nti ɔto maa AWURADE

¹ AWURADE, me Nyankopɔn, wo na miguan metoa wo. Gye me m’atiwfo nyinaa nsam, na yi me!

² Na wɔansunsuan me kra sɛ gyata antetew me a ogyefo bi nni hɔ.

³ AWURADE, me Nyankopɔn, sɛ mayɛ eyi, na amumɔyɛde bi wɔ me nsam,

⁴ sɛ mayɛ nea ɔne me te asomdwoe mu bɔne, na madi nea ɔhaw me kwa no amim bi a,

⁵ ma ɔtamfo ntaa me kra, na ɔnkyere me, na ontiatia me nkwa so wɔ ɛfam, na ɔmma m’anuonyam nyɛ fam.

⁶ AWURADE, sɔre w’abufuw mu, ma wo ho so tia m’ahohiahiafo anuɔden, na nyan ma me, wo a woahyɛ atemmu.

⁷ Na ma aman asafo ntwa wo ho nhyia, na san fi wɔn so kɔ soro.

⁸ AWURADE bebu aman atɛn; AWURADE di m'asɛm sɛnea me trenee ne bem a ɛwɔ me mu te.

⁹ Ao, ma ɔbɔnefo bɔne to ntwa ɛ! Na ma ɔteneneeni ntim. Na wone trenee Nyankopɔn a wosɔ koma ne adwene hwɛ.

¹⁰ Me kyɛm wɔ Onyankopɔn nsam, ɔno na ogye koma mu treneeni nkwa.

¹¹ Onyankopɔn ne ɔtemmufo trenee, ne Onyankopɔn a ɔteɛteɛ daa nyinaa.

¹² Sɛ obi annan n’akwan a Onyankopɔn bɛsew n’afoa, wakuntun ne tadua mu, na wasiesie.

¹³ Na wasiesie owu ade ama onii ko no, wayɛ n’agyan ma no hyew ade.

¹⁴ Hwɛ, omumɔyɛfo nyinsɛn amumɔyɛ, na ɔnyem ɔhaw, na ɔwo atoro.

¹⁵ Watu amoa, na wafunu mu, na ɔtɔ tokuru a ɔno ara tui no mu.

¹⁶ Ne mmusu resan abua n’atifi, na n’amim abua ne mpampam.

¹⁷ Mɛda AWURADE ase sɛnea ne trenee te, na mato ayeyi dwom mama AWURADE a ɔwɔ sorosoro no din.