Nnwom 67 - KYERƐW KRONKRON

Nnɔbaetwa so aseda dwom

Wɔde ma dwonkyerɛfo. Dwom a wɔto no asanku ano

¹ Onyankopɔn nnom yɛn nhyira yɛn, ɔntew n’anim nkyerɛ yɛn. Sela

² Na wonhu wo kwan asase so, wo nkwagye amanaman nyinaa mu.

³ Onyankopɔn, aman beyi wo ayɛ, aman nyinaa beyi wo ayɛ.

⁴ Aman ani begye na wɔato ahosan nnwom, sɛ wubu aman atɛntrenee na wokyerɛkyerɛ asase so aman kwan. Sela

⁵ Onyankopɔn, aman beyi wo ayɛ, aman nyinaa beyi wo ayɛ.

⁶ Asase abɔ n’aduan, Onyankopɔn, yɛn Nyankopɔn behyira yɛn.

⁷ Onyankopɔn behyira yɛn, na wɔn a wɔte asase ano nyinaa asuro no.