Nnwom 53 - KYERƐW KRONKRON

Agyennyentwi

Wɔde ma dwonkyerɛfo. Dawid nnwenho dwom. Wɔnto no “Ɔyare” nne so

¹ Ogyennyentwi se ne komam sɛ: Onyankopɔn bi nni hɔ. Wɔasɛe, na wɔyɛ amumɔyɛde a wokyi, obi nni hɔ a ɔyɛ papa.

² Onyankopɔn fi soro hwɛ nnipa mma, sɛ obehu sɛ obi wɔ hɔ a ɔyɛ ɔbadwemma, obi a ɔhwehwɛ Onyankopɔn akyi kwan.

³ Wɔn nyinaa aman, wɔn nyinaa aporɔw, obi nni hɔ a ɔyɛ papa, obiako po nni hɔ.

⁴ So amumɔyɛfo anhu de, wɔn a wodi me man sɛnea wodi aduan, na wɔmfrɛ Onyankopɔn?

⁵ Ɛno na wɔn ho popoe, nea ahopopo nni hɔ, na Onyankopɔn petee wɔn a wɔbɔɔ wo so nsra nnompe, woahyɛ wɔn aniwu, na Onyankopɔn apa wɔn.

⁶ Hena na ɔde Israel nkwagye befi Sion aba? Da a Onyankopɔn de ne man nnommum bɛsan aba no, Yakob bedi ahurusi, na Israel ani agye.