Nnwom 4 - KYERƐW KRONKRON

Onyankopɔn asomdwoe

Wɔde ma dwonkyerɛfo sɛ wɔmfa asanku nto. Dawid dwom

¹ Me sufrɛ mu gye me so, me trenee Nyankopɔn! Ahohia mu, boa me. Hu me mmɔbɔ, na tie me mpaebɔ.

² Mo mmarima mma, m’anuonyam bɛdan ahohora akosi da bɛn? Mobɛdɔ ade hunu, mubedi atoro akyi akosi da bɛn? Sela

³ Na munhu sɛ AWURADE apaw ahotefo afa; sɛ misu mefrɛ AWURADE a, obetie.

⁴ Mo bo huru a, monnyɛ bɔne! Monkasa mo komam wɔ mo mpa so, na monyɛ komm. Sela

⁵ Mommɔ trenee afɔre, na momfa mo ho ntweri AWURADE.

⁶ Nnipa bebree bisa sɛ: Hena na ɔbɛma yɛahu papa? AWURADE, tew w'anim ma ɛnharan yɛn so.

⁷ Wode anigye ahyɛ me komam asen bere a wɔn aburow ne wɔn nsaforo dɔɔso no.

⁸ Asomdwoe mu na mɛkɔ makɔda, na mada prɛko; na wo, AWURADE, nko na woma metena hɔ dwoodwoo.