Nnwom 22 - KYERƐW KRONKRON

Amanehunu dwom

Wɔde ma dwonkyerɛfo sɛ wɔnto no “Adekyee forote” nne so. Dawid dwom

¹ Me Nyankopɔn, me Nyankopɔn, dɛn nti na woagyaw me? Me su a misu mefrɛ wo ne me nkwagye ntam ware.

² Me Nyankopɔn, meteɛm mefrɛ wo awia, na wummua me, ne anadwo, nso minnya ɔhome.

³ Na woyɛ kronkron, wote ahengua so, na wo na Israel ayeyi nyinaa wɔ wo.

⁴ Wo so na yɛn agyanom de wɔn ho toe, wɔde wɔn ho too wo so, na wugyee wɔn.

⁵ Wo na wɔteɛɛm frɛɛ wo, na wonyaa nkwagye, wɔde wɔn ho too wo so, na wɔn ani anwu.

⁶ Na me de, meyɛ aboa,, na menyɛ onipa, meyɛ nnipa ahohorade ne ɔman akyiwade.

⁷ Wɔn a wohu me nyinaa di me ho fɛw tɛɛ wɔn anom wosow wɔn ti ka sɛ:

⁸ Dan to AWURADE so, ma onnye no, sɛ ɔpɛ no a, ma onyi no.

⁹ Na wo na wuyii me fii me na yam, mitua me na nufu ano no, na womaa me anidaso.

¹⁰ Mifi yafunum ara na wɔde me too wo so, wone me Nyankopɔn fi me na yam.

¹¹ Mma me ne wo ntam nnware, na ahohia abɛn, na ɔboafo bi nni hɔ.

¹² Anantwinini bebree atwa me ho ahyia, Basan anantwi akɛse abɔ me ho kɔntɔnkrɔn.

¹³ Wɔtɛɛ wɔn anom kyerɛ me sɛ gyata a ɔtetew na ɔbobom.

¹⁴ Wɔahwie me agu sɛ nsu, na me nnompe nyinaa ahunhuan n’akwaa so. Me koma ayɛ sɛ hweawa, anan wɔ me yam.

¹⁵ M’ahoɔden mu ayow sɛ kyɛmfɛre, na me tɛkrɛma afam me dodom, na wode me ato owu mfutuma mu.

¹⁶ Nnipa bɔne te sɛ akraman atwa me ho ahyia, na wɔbobom ba me so, wɔahwirew me nsa ne me nan mu.

¹⁷ Mitumi mekan me nnompe nyinaa, wɔn de, wɔhwɛ me de gye wɔn ani.

¹⁸ Wɔkyɛ me ntama mu fa, na m’atade so na wɔbɔ ntonto.

¹⁹ Na wo, AWURADE, ntena akyiri. M’ahoɔden, yɛ ntɛm bɛboa me.

²⁰ Hwim me kra fi nkrante ano, m’ade koro no fi akraman nsam.

²¹ Gye me fi gyata anom, na ɛko mmɛn mu na wutie me.

²² Mɛbɔ wo din makyerɛ me nuanom, mɛkamfo wo asafo mu.

²³ Mo a musuro AWURADE, munyi no ayɛ. Yakob asefo nyinaa, monhyɛ no anuonyam, na Israel asefo nyinaa, momfɛre no.

²⁴ Na wannyaw ɔmanehunufo n’amanem, na wannyi n’anim nhintaw no, na mmom osu frɛɛ no no, otiei.

²⁵ Wo na woma miyi wo ayɛ asafo kɛse mu, mɛma m’aboade, wɔn a wosuro no no anim.

²⁶ Ahobrɛasefo bedidi na wɔamee, wɔn a wɔpɛ AWURADE akyi kwan beyi no ayɛ. Mo koma nnya nkwa daa.

²⁷ Asase ano ano sofo nyinaa bɛkae adan aba AWURADE nkyɛn, na amanaman mmusuakuw nyinaa abɛkotow n’anim.

²⁸ Na ahenni wɔ AWURADE, na odi amanaman so.

²⁹ Asase so abran nyinaa bedidi na wɔakotow no, wɔn a wosian kɔ mfutuma mu nyinaa, ne nea anka ne kra nni nkwa no bɛkotow no.

³⁰ Nkyirimma bɛsom no, wɔbɛka AWURADE ho asɛm, awo ntoatoaso a edidi so mu.

³¹ Wɔbɛba abɛka ne trenee akyerɛ ɔman a wɔbɛwo wɔn no, sɛ ɔno na wayɛ.