Nnwom 142 - KYERƐW KRONKRON

Ɔboa ho adesrɛ

Dawid nnwenho dwom. Mpae a ɔwɔ ɔbodan mu no, ɔbɔe

¹ Mede me nne misu mefrɛ AWURADE, mede me nne mekotɔ mesrɛ AWURADE,

² mihwie me nkɔmmɔdi migu n’anim, meka m’ahohia mekyerɛ no.

³ Me honhom tɔ beraw me mu a, wo na wunim me kwan. Ɔkwan a menam so no so na wosum me afiri.

⁴ Mehwɛ nifa, na hwɛ, obi nni hɔ a n’ani ku me ho, guankɔbea abɔ me, obi nhwɛ me kra kyea.

⁵ Misu mefrɛ wo, AWURADE. Mise: Wone me guankɔbea, me kyɛfa, ateasefo asase so.

⁶ Wɛn w’aso tie me su, na magurow, yi me fi m’ataafo nsam, na wɔn ho yɛ den kyɛn me.

⁷ Yi me kra fi afiase, na mayi wo din ayɛ. Treneefo betwa me ho ahyia sɛ wo ne me adi no yiye.