Nnwom 139 - KYERƐW KRONKRON

Onyankopɔn yɛ honhom

Wɔde ma dwonkyerɛfo. Dawid dwom

¹ O, AWURADE, woahwehwɛ me mu, na woahu me.

² Wo na wunim m’asetena, ne me sɔre, wuhu m’adwenem akyirikyiri.

³ Wopɛɛ me nantew ne me nna mu, na wunim m’akwan nyinaa mu yiye.

⁴ Na asɛm biara nni me tɛkrɛma so gye nea wo, O, AWURADE, wunim ne nyinaa.

⁵ Woaka me ahyɛm, m’akyi ne m’anim, na wode wo nsa ato me so.

⁶ Saa nimdeɛ yi yɛ me nwonwa dodo, ɛkɔ soro dodo, mintumi koraa.

⁷ Ɛhe na mefi wo honhom no anim maguan makɔ? Na ɛhe na mefi w’anim maguan makɔ?

⁸ Sɛ meforo soro a, wowɔ hɔ, na mekɔsɛw me kɛtɛ asaman a, wuni!

⁹ Sɛ mefa adekyee ntaban mitu mekɔtena po akyi noho a,

¹⁰ ɛhɔ nso na wo nsa bɛkɔ akogya me, na wo nsa nifa beso me mu.

¹¹ Na sɛ mise: Esum nko mmɛkata me so, na me ho hann nnan anadwo a,

¹² esum nso nnuru sum mma wo, na anadwo haran sɛ awia, esum ne hann yɛ wo pɛ.

¹³ Na wo na wobɔɔ m’asaabo, wonwenee me, me na yam.

¹⁴ Meda wo ase sɛ woyɛɛ me ma ɛyɛ hu ne nwonwa; wo nneyɛe yɛ nwonwa, na me kra nim saa yiye.

¹⁵ Me nnompe anhintaw wo, bere a wɔyɛɛ me ahintawee mu na wɔnwenee me anwonwa kwan so, asase mu tɔnn no.

¹⁶ Meyɛ mogya tɔw nko no, w’aniwa huu me, na wo nhoma mu wɔakyerɛw ne nyinaa, nna a wɔahyɛ asie na emu biako pɛ nnya mmae no.

¹⁷ Na me de, O, Onyankopɔn, w’adwene bo yɛ me den dɛn ara! Ɛdɔɔso dɛn ara!

¹⁸ Sɛ merekan a, ɛdɔɔso sen nwea, minyan a, meda so mewɔ wo ho ara.

¹⁹ O, Onyankopɔn, sɛ wubekum ɔbɔnefo, na mogyapɛfo afi me so akɔ ɛ!

²⁰ Wɔn a wɔkasa tia wo mmusu mu ne w’atamfo a wɔbɔ wo din ahuhude mu no.

²¹ AWURADE, wɔn a wɔtan wo no, mentan wɔn anaa? Na wɔn a wɔsɔre hyɛ wo no, me werɛ nhow wɔn anaa?

²² Mede ɔtan pa metan wɔn, mibu wɔn m’atamfo.

²³ Onyankopɔn, hwehwɛ me mu, na hu me koma, sɔ me hwɛ, na hu m’adwene,

²⁴ na hwɛ sɛ amane kwan bi wɔ me hɔ, na gya me kɔ daa kwan so!