Nnwom 135 - KYERƐW KRONKRON

Onyankopɔn tumi ne ahoni mmerɛwyɛ

¹ Munyi AWURADE ayɛ. Munyi AWURADE din ayɛ, O! AWURADE nkoa, munyi no ayɛ,

² mo a mugyina AWURADE fi, yɛn Nyankopɔn fi adiwo.

³ Munyi AWURADE ayɛ, na AWURADE ye, monto dwom mma ne din, na ɛyɛ fɛ.

⁴ Na AWURADE apaw Yakob afa, ɔde Israel ayɛ ne de.

⁵ Na me de, minim sɛ AWURADE so, na yɛn wura so sen anyame nyinaa.

⁶ Biribiara a AWURADE pɛ no, ɔyɛ, ɔsoro ne fam, ɛpo ne abun nyinaa mu.

⁷ Ɔma omununkum fi asase ano ba, ɔyɛ anyinam ma osutɔ, oyi mframa fi ne korabea.

⁸ Okum Misraim mmakan fi nnipa so kosii mmoa so.

⁹ Ɔmaa nsɛnkyerɛnne ne anwonwade baa wɔ, Misraim, mfinimfini, Farao ne ne nkoa nyinaa so.

¹⁰ Ɔbobɔɔ amanaman pii, na okum ahene atumfo:

¹¹ Amorifo hene Sihon, ne Basan hene Og, ne Kanaan ahenni nyinaa,

¹² na ɔde wɔn asase mae sɛ agyapade, ɔde yɛɛ ne man Israel agyapade.

¹³ O! AWURADE, wo din wɔ hɔ daa, O! AWURADE, wo nkae tena awo ntoatoaso nyinaa so.

¹⁴ Na AWURADE bebu ne man bem, na obehu ne nkoa mmɔbɔ.

¹⁵ Amanaman ahoni yɛ dwetɛ ne sika kɔkɔɔ, nnipa nsa ano nnwuma.

¹⁶ Wɔwɔ ano, na wɔnkasa, wɔwɔ aniwa, na wonhu ade,

¹⁷ wɔwɔ aso, na wɔnte asɛm, na ɔhome biara nni wɔn anom.

¹⁸ Wɔn a wɔyɛ wɔn, ne obiara a ɔde ne ho to wɔn so no, bɛyɛ sɛ wɔn ara.

¹⁹ Israel fifo, munhyira AWURADE, Aaron fifo, munhyira AWURADE.

²⁰ Lewi fifo, munhyira AWURADE, mo a musuro AWURADE, munhyira no.

²¹ Womfi Sion nhyira AWURADE, mo a mote Yerusalem no, munyi AWURADE ayɛ.