Nnwom 132 - KYERƐW KRONKRON

Mpae a Dawid nti wɔbɔ ma Sion

Mforoso dwom

¹ AWURADE, kae Dawid brɛ ne ne bɔhyɛ nyinaa,

² sɛnea ɔkaa AWURADE ntam na ɔhyɛɛ Yakob tumfo no bɔ sɛ:

³ Merenkɔ me fi ntamadan mu, meremforo me mpa so mpikyi,

⁴ meremma m’aniwa nna, m’anisuatɛtɛ rentɔ nko

⁵ kosi sɛ menya baabi mama AWURADE, tenabea bi ama Yakob Tumfo no ansa.

⁶ Hwɛ, yɛkɔtee wɔ Efrata, yekohuu wɔ Yaar asase so.

⁷ Momma yɛnkɔ ne tenabea nkɔkotow ne nan ntiaso anim ɛ.

⁸ AWURADE, sɔre kɔ wo homebea, wo ne wo tumi adaka no.

⁹ Ma w’asɔfo nhyɛ trenee, na ma w’ahotefo nni ahurusi.

¹⁰ Esiane w’akoa Dawid nti, nnan nea woasra no no ani.

¹¹ AWURADE aka Dawid ntam nokwarem a ɔnnan ani: Mede wo yafumma mu bi matena w’agua so mama wo.

¹² Sɛ wo mma di m’apam ne m’adanse a mɛkyerɛkyerɛ wɔn no so a, wɔn mma nso bɛtena w’agua so daa.

¹³ Na AWURADE apaw Sion, wapɛ hɔ de ayɛ ne tenabea.

¹⁴ Eyi ne me homebea daapem, ɛha na mɛtena, na mepɛ ha.

¹⁵ Mede nhyira mehyira n’adidide, mɛma n’ahohiafo aduan adi amee.

¹⁶ Na mede nkwagye mɛhyɛ n’asɔfo, na n’ahotefo bɛto ahurusi dwom.

¹⁷ Ɛhɔ na mɛma tumi afi ama Dawid, masiesie ɔkanea hann mama nea masra no no.

¹⁸ Mɛhyɛ n’atamfo aniwu, na ɔno de, n’ahenkyɛw bɛhyerɛn n’atifi.