Nnwom 13 - KYERƐW KRONKRON

Onyankopɔn boa a ɛmma ntɛm no ho nkɔmmɔdi

Wɔde ma dwonkyerɛfo. Dawid dwom

¹ Ao! AWURADE, enkosi da bɛn? Wo were befi me daa? Wode w’ani behintaw me akosi da bɛn?

² Enkosi da bɛn na minni me kra mu yaw, na ade kye a, awerɛhow ntena me komam? Me tamfo nhoran me so nkosi da bɛn?

³ Hwɛ na gye me so, AWURADE, me Nyankopɔn, tew m’ani, na manna owu nna,

⁴ na me tamfo anka sɛ: Matumi no, na sɛ mihim a, m’ahohiahiafo anni ahurusi.

⁵ Na me de, m’ani da w’adɔe so, me koma bedi wo nkwagye mu ahurusi,

⁶ mɛto AWURADE dwom sɛ ɔne me adi no yiye.