Nnwom 11 - KYERƐW KRONKRON

AWURADE mu ahotoso

Wɔde ma dwonkyerɛfo. Dawid de

¹ AWURADE na miguan metoa no, adɛn na muse me kra sɛ: Guan sɛ anomaa kɔ mmepɔw so.

² Na hwɛ, abɔnefo kuntun wɔn tadua mu, wɔde wɔn mmɛmma asi hama so, sɛ wɔde bɛtow abɔ komam teefo, esum mu.

³ Sɛ wɔsɛe nnyinaso no a, ɔtreneeni bɛyɛ dɛn?

⁴ AWURADE wɔ n’asɔrefi kronkron mu, AWURADE ahengua wɔ ɔsoro, n’ani tua nnipa mma, na n’anisuatɛtɛw kari wɔn hwɛ.

⁵ AWURADE sɔ ɔtreneeni hwɛ, na ɔbɔnefo ne nea ɔpɛ amim de, ne kra tan no.

⁶ Ɔbɛma nyansrama aduru abɔnefo, ogya ne sufre ne mframa a ɛdɛw na ɛbɛyɛ wɔn kuruwa mu kyɛfa.

⁷ Na AWURADE yɛ ɔtreneeni, na ɔpɛ asɛntrenee, wɔn a wɔteɛ behu n’anim.