Mmebusɛm 9 - KYERƐW KRONKRON

Nyansa frɛ

¹ Nyansa asi ne dan, wasen n’adum asɔn;

² wakum ne mmoa, wafra ne nsa, na wasiesie ne pon nso;

³ wasoma ne mmaawa, ɔkɔteɛm kurow mu sorɔnsorɔmmea so sɛ:

⁴ Nea ɔyɛ atetekwaa mman ha! Na nea onni ti no, ose no sɛ:

⁵ Mommra mmedi m’aduan no bi, na monnom me nsa a mafra no bi.

⁶ Munnyaw ntetekwaa na munnya nkwa, na monnantew nhumu kwan so.

⁷ Nea ɔteɛ ɔfɛwdifo so no soa aniwu, na nea ɔka ɔbɔnefo anim no nya nkekae.

⁸ Nka ɔfɛwdifo anim na wantan wo; ka onyansafo anim, na ɔbɛdɔ wo.

⁹ Tu onyansafo fo, na ɔbɛkɔ so ahu nyansa, ma ɔtreneeni nhu de, na ɔbɛkɔ so n’adenim mu,

¹⁰ Ampa ara nyansa mfiase ne AWURADE suro, na ɔkronkronni no ho nimdeɛ ne nhumu.

¹¹ Na me nti wo nna de bɛdɔɔso, na wɔde nkwa mfe bɛka wo ho.

¹² Sɛ wuhu nyansa a, wuhu fa, na sɛ wudi fɛw a, wo nko na wobɛsoa.

Nkwaseasɛm ho kɔkɔbɔ

¹³ Ɔbea kwasea yɛ ɔkasafo, tibɔnkɔso a onnim hwee;

¹⁴ ɔtena ne fi abobow ano, kurow mu sorɔnsorɔn hɔ agua so,

¹⁵ sɛ ɔrefrɛ wɔn a wɔresen ɔkwan so, wɔnam wɔn nkwammɔe so tee no sɛ:

¹⁶ Nea ɔyɛ atetekwaa mman ha! Na nea onni ti nso, ose no sɛ:

¹⁷ Nsu a wowia yɛ fremfrem, na ahintaduan yɛ dɛ!

¹⁸ Nso onii no nnim sɛ nsamanfo wɔ hɔ, asaman abun mu na wɔn a wahyia wɔn no wɔ.