Mmebusɛm 7 - KYERƐW KRONKRON

Aguamammɔ ne ɛso aba

¹ Me ba, di me nsɛm so, na fa me mmara nsɛm sie.

² Di me mmara nsɛm so na nya nkwa, na bu me mmara sɛ w’aniwa kurutiayisi.

³ Fa kyekyere wo nsatea so, kyerɛw wo koma pon so.

⁴ Ka kyerɛ nyansa sɛ: Me nuabea ne wo! Na frɛ nhumu sɛ w’adamfowa,

⁵ na ahwɛ wo so afi ɔbea sansani ho, afi ɔbea sansani a ɔka adɔkɔdɔkɔsɛm ho.

⁶ Na mifi me dan mfɛnsere mu, m’ahunuaniankansa mu mehwɛe;

⁷ na mehwɛɛ ntetekwaafo mu, mihuu mmofra no mu aberantewa bi a onni ti,

⁸ ɔperee abɔnten bɛn ne twea, na ɔsen faa ne fi kwan,

⁹ ɛbere a ade resa, anadwofa, anadwo kɔnkɔn ne sum mu.

¹⁰ Na hwɛ, ɔbea bi hyiaa no, ofura aguamantam, ne koma asen;

¹¹ wagyigya na n’aso asorow, ne nan ntena ne fi;

¹² mprempren ɔwɔ mmorɔn so, seisei yi ɔwɔ gua so, na ɔtetɛw twea nyinaa so.

¹³ Ɛnna osoo no mu, na ofew n’ano, na ɔhyɛɛ n’ani den ka kyerɛɛ no sɛ:

¹⁴ Asomdwoe afɔrebɔ da me so, ɛnnɛ na mama m’aboade;

¹⁵ enti na mifi mibehyiaa wo yi, mebɛhwehwɛɛ w’anim, na mahu wo yi.

¹⁶ Mede mmommo makata me mpa so, Misraim nkyeremu;

¹⁷ mede kurobow ne pɛprɛ ne dupapo mapete me nnae so.

¹⁸ Bra ma ɔdɔ mmee yɛn nkosi anɔpa, ma yɛmfa akɔnnɔde nsɛpɛw yɛn ho.

¹⁹ Na ofiwura nni fie, watu kwan kɔ akyirikyiri;

²⁰ wafa fotow ne sika akura, ɔsram korokumatwa da mu ansa na ɔbɛba fie.

²¹ Ɔde brada pii too no, ɔde n’ano fremfrem nyaa no de no kɔe.

²² Odii n’akyi prɛko sɛ nantwi a wɔrekokum no, sɛ mpokyerɛ a wɔde twe ogyimifo aso,

²³ kosii sɛ agyan hwirew ne mmerɛbo mu, te sɛ anomaa de ahoɔhare kɔ afiri mu, na onnim sɛ ne nkwa na ɛda mu.

²⁴ Na afei, me mma, muntie me, na monyɛ aso mma m’anom nsɛm.

²⁵ Mma wo koma mmman nnkɔ n’atempɔn so, mfom nkɔ n’akwan so.

²⁶ Na wapirapira nnipa pii agugu hɔ, na wɔn a wakunkum wɔn dɔɔso;

²⁷ ne fi ne asamando kwan, esan kɔ owu mpia mu.