Mmebusɛm 5 - KYERƐW KRONKRON

Aguamammɔ ho kɔkɔbɔ

¹ Me ba, tie me nyansa, brɛ w’aso ase ma me ntease,

² na woahwɛ adwempa so, na w’ano akora nimdeɛ.

³ Na ɔbea sansani ano kyi ɛwo sosɔ, na n’anom yɛ toro sen ngo;

⁴ na n’akyi yɛ nwene sɛ awɔnwene, ɛyɛ nnam te sɛ nkrante anofanu.

⁵ N’anan sian kɔ owu mu, asaman na n’anammɔn tutu kɔ.

⁶ Nkwa kwan de, ɔnkɔ ara da, n’anammɔn kyinkyin kɔ nea onnim hɔ.

⁷ Na afei, me mma, muntie me, na munnyi mo ho mmfi m’anom nsɛm ho.

⁸ Ma wo kwan mfi ne ho nkɔ akyiri, na mmɛn ne fi pon ano;

⁹ na woamfa wo nidi amma ebinom, ne wo mfe amma otirimmɔdenfo;

¹⁰ na ahɔho anni w’ade ammee, na w’adwumade antena obi hunu fi;

¹¹ na wo nna a edi akyiri no, woampenepene, sɛ wo nipadua ne wo honam asa,

¹² na woanka se: Ao, sɛ metan nteɛso na me koma kyii animka ni!

¹³ Na mantie m’akyerɛkyerɛfo, na mammrɛ m’aso ase mamma me nyansakyerɛfo!

¹⁴ Ɛkaa kumaa ma esii me bɔne koraa, asafo ne guabɔ mu.

¹⁵ Nom w’abura mu nsu ne nsu a ɛsen fi wo nsuti mu.

¹⁶ Wo nsuaniwa bebu so afi adi ayɛ mmɔnten so asuten;

¹⁷ ɛbɛyɛ wo nko dea, na ɛnyɛ wo ne ahɔho bi dea.

¹⁸ Ma w’abura nyɛ nhyira, na wo ne wo mmerantebere mu yere ani nnye;

¹⁹ na ɔte sɛ ɔtwe bere dɔfo ne anuonyam wansan no. Ma ne mpokua nsɔ w’ani daa, tɔ ne dɔ mu ntintan daa yi.

²⁰ Me ba, adɛn na wotɔ ɔbea nanani ho ntintan, na wuso ɔbea hɔho kokom?

²¹ Na onipa akwan da AWURADE anim, na ɔtaataa n’anammɔn nyinaa.

²² Ɔbɔnefo amumɔyɛ so no mu, na ne bɔne nhama kyere no.

²³ Ɔkwati nteɛso nti obewu, na n’agyennyentwisɛm dodow nti ɔbɛyera.