Mateo 15 - KYERƐW KRONKRON

Honhom mu ahotew

¹ Ɛnna Kyerɛwfo ne Farisifo fi Yerusalem baa Yesu nkyɛn bɛkae sɛ:

² Adɛn nti na w’asuafo no nni mpanyimfo atetesɛm no so? Wɔnhohoro wɔn nsa ansa na wɔadidi.

³ Na Yesu bua see wɔn sɛ: Adɛn nti na mo nso mo atetesɛm nti munni Onyankopɔn ahyɛde so?

⁴ Na Onyankopɔn kae sɛ: Di w’agya ne wo na ni, na nea ɔka agya anaa ɛna ho asɛmmɔne no, owu na ma onwu.

⁵ Na mo de, muse: Obi a obese n’agya anaa ne na sɛ: Nea anka wubenya me ho no yɛ ayɛyɛde no,

⁶ na enni sɛ odi n’agya anaa ne na ni, na mo atetesɛm nti moasɛe Onyankopɔn asɛm.

⁷ Nyaatwomfo! Edi sɛ Yesaia hyɛɛ mo ho nkɔm sɛ:

⁸ Ɔman yi de wɔn anofafa na edi me ni, na wɔn koma de, atwe afi me ho kɔ akyirikyiri.

⁹ Na wɔsɔre me kwa, wɔkyerɛkyerɛ nsɛm a nnipa ahyehyɛ.

¹⁰ Na ɔfrɛɛ nkurɔfokuw no ka kyerɛɛ wɔn sɛ: Muntie, na monte ase.

¹¹ Ɛnyɛ nea ɛkɔ anom na egu onipa ho fi, na mmom nea efi anom ba na egu onipa ho fi.

¹² Ɛnna n’asuafo no baa ne nkyɛn bɛka kyerɛɛ no sɛ: Wunim sɛ Farisifo no tee asɛm yi no, ato wɔn hintidua?

¹³ Na obuae sɛ: Dua biara a ɛnyɛ me soro agya na oduae no, wobetu.

¹⁴ Munnyaa wɔn, wɔyɛ anifuraefo a wɔkyerɛ anifuraefo kwan; na sɛ onifuraefo kyerɛ onifuraefo kwan a, wɔn baanu nyinaa bɛtɔ amoa mu.

¹⁵ Na Petro bua see no sɛ: Kyerɛ yɛn bɛ no ase!

¹⁶ Na ose: Mo nso moda so nte ase ara?

¹⁷ Munhu sɛ ade biara a ɛkɔ anom no kɔ ɔyafunu mu na eyi fi gu yaane mu anaa?

¹⁸ Na nea efi anom fi adi de, efi onipa komam, na ɛno na egu onipa ho fi.

¹⁹ Na koma mu na adwemmɔne, awudisɛm, ayerefasɛm, aguamansɛm, awifosɛm, adansekurum ne abususɛm fi.

²⁰ Eyinom ne nneɛma a egu onipa ho fi; na wɔde nsa a wɔanhohoro didi a, engu onipa ho fi.

Abeawa ɔbosonsonni bi ayaresa

²¹ Na Yesu fi hɔ kɔɔ Tiro ne Sidon fam.

²² Na hwɛ, Kanaanni bea bi a ofi mpɔtam hɔ bae bɛteɛteɛɛm sɛ: O Awurade, Dawid ba, hu me mmɔbɔ, na honhommɔne bi rehaw me babea dodo!

²³ Nanso wammua no. Na n’asuafo no bae bɛsrɛɛ no sɛ: Gya no kwan na ɔnkɔ, na ɔteɛteɛm di yɛn akyi.

²⁴ Na Yesu buae sɛ: Israel fi nguan a ayera no nko ara nkyɛn na wɔsomaa me.

²⁵ Na ɔbea no bae bɛkotow no sɛ: Awurade, boa me!

²⁶ Na obuae sɛ: Ɛnyɛ fɛ sɛ wɔfa mma aduan tow ma akraman mma.

²⁷ Na ose: Ɛwom, Awurade, nanso akraman mma no nso di mporoporowa a efi wɔn wuranom pon so gu fam no bi.

²⁸ Ɛnna Yesu bua see no sɛ: O ɔbea, wo gyidi so; ɛnyɛ mma wo sɛnea wopɛ no. Na amonom hɔ ara ne babea no ho yɛɛ no den.

Yesu sa nyarewa ahorow

²⁹ Na Yesu fi hɔ baa Galilea po ho. Na ɔkɔɔ bepɔw so kɔtenaa ase wɔ hɔ.

³⁰ Na nkurɔfo akuwakuw pii de mpakye, mmubuafo, anifuraefo, mum ne afoforo pii baa ne nkyɛn, na wɔde wɔn beguu ne nan ase, na ɔsaa wɔn yare

³¹ ma ɛyɛɛ nkurɔfokuw no nwonwa, sɛ wohui sɛ mum rekasa, na mpakye ho san, na mmubuafo nantew, na anifuraefo hu ade; na wɔhyɛɛ Israel Nyankopɔn anuonyam.

Nnipa mpemnan aduanma

³² Na Yesu frɛɛ n’asuafo no see wɔn sɛ: Nkurɔfokuw yi yɛ me mmɔbɔ sɛ wɔatena me nkyɛn atoa so nnansa ni, na wonni biribi a wodi; nanso mempɛ sɛ migya wɔn kwan ma wɔde yafumpan kɔ, na wɔankɔtoto baha wɔ ɔkwan mu.

³³ Na asuafo no see no sɛ: Ɛhe na yebenya abodoo a ɛbɛso nkurɔfokuw pii sɛɛ, anwea pradada so ha?

³⁴ Na Yesu bisaa wɔn sɛ: Abodoo ahe na mowɔ? Na wose: Ason ne mpataa nketewaa bi.

³⁵ Na ɔhyɛɛ nkurɔfo akuwakuw no sɛ wɔntenatena fam.

³⁶ Na ɔfaa abodoo ason no ne mpataa no, na ɔdaa ase, na obubui de maa n’asuafo no, na asuafo no nso de maa nkurɔfo akuwakuw no.

³⁷ Na wɔn nyinaa di mee, na wɔtasetasee mporoporowa a ɛkae no nkɛntɛn ason mama.

³⁸ Na wɔn a wodii no yɛ mmarima mpemnan a wɔankan mmea ne mmofra anka ho.

³⁹ Na ogyaa nkurɔfo akuwakuw no kwan no, ɔtenaa ɔkorow mu na ɔbaa Magadan ahye so.